Read Hmong Njua Paajlug 31 Bible Online

Paajlug 31 - Hmong Njua bible

Paajlug 31

¹Ntawm nuav yog tej lug tseemceeb kws Vaajntxwv Lemu-ees nam has rua nwg.

²“Kuv tug tub, koj yog leejtwg? Kuv tug tub kws yug huv kuv plaab lug, koj yog leejtwg? Kuv tug tub kws kuv tau coglug, koj yog leejtwg?

³Tsi xob muab koj tug zug siv rua kev ua nkauj ua nraug hab taagnrho koj tej nyaj txag rua tej quaspuj; puab tau ua rua tej vaajntxwv puamtsuaj taag.

⁴Lemu-ees, ca le noog kuv tej lug. Tej vaajntxwv tsi tsimnyog haus cawv txiv maab lossis tsi tsimnyog tej thawjcoj nyam haus tej cawv ntsim.

⁵Thaus puab haus cawv qaug lawm, puab tsi ncu qaab tej kevcai hab tsi quavntsej tej kev ua ncaaj rua tej pejxeem lawm.

⁶Tej cawv ntsim yog cov tuabneeg kws yuav raug puamtsuaj hab cov kws muaj kev nyuaj sab haus xwb.

⁷Ca puab haus kuas puab tsi xob ncu txug puab tej kev txomnyem hab tej kev nyuaj sab.

⁸“Ca le paab cov tuabneeg kws puab tsi muaj cuabkaav has puab zaaj. Ca le paab cov tsi txhum kws tsi muaj chaw vaamkhom txuj cai.

⁹Paab txheem cov pluag hab cov txomnyem txuj cai. Paab has hab txav txim kuas ncaaj nceeg.”

¹⁰Tug quaspuj kws tsimtxaj muaj nqes dlua nyaj hab kub, tabsis ceeblaaj nrhav tau ib tug quaspuj zoo le ntawd.

¹¹Nwg tug quasyawg tso sab plhuav rua nwg, hab nwg lub neej yuav tsi txomnyem le.

¹²Nwg ua zoo rua nwg tug quasyawg hab tsi ua phem ib zag le moog taag nwg lub neej.

¹³Nwg rau sab ntso ntus ntaub plaub yaaj hab ntaub maag lug xaws rig tsho naav.

¹⁴Nwg moog ris zaub mov tom tej teb lug, ib yaam le tej nkoj kws thauj khoom ua laag ua luam.

¹⁵Nwg sawv ntxuv lug ua zaub ua mov rua tsev tuabneeg noj hab qha num rua tej ntxhais qhev ua.

¹⁶Nwg moog saib luas tej laj teb hab rhu hlo nyaj yuav, nwg muab tej nyaj kws nwg khwv tau moog yuav txiv maab lug cog.

¹⁷Nwg muaj zug, nwg nquag hab rau sab khwv kawg le.

¹⁸Nwg paub has tas txhua yaam kws nwg khwv tau lug yeej muaj nqes, hab nwg ua num txug tej taag mo.

¹⁹Nwg saws ntuag hab ntus ntaub lug xaws rig tsho.

²⁰Nwg ua sab dlawb sab zoo rua cov tuabneeg pluag hab cov txomnyem.

²¹Lub caij lug dlaus los nwg tsi txhawj, rua qhov nwg tsev tuabneeg muaj rig tsho suv naav txhua tug.

²²Nwg ntus tej ntaub pua txaaj hab naav tej rig tsho ntaub maag tsaamxem kws zoo zoo xwb.

²³Nwg tug quasyawg yog ib tug tuabneeg tseemceeb hab muaj koob meej nto moo lug.

²⁴Nwg xaws rig tsho hab hlaab muag rua tej tub laag tub luam.

²⁵Nwg ua taug nam hab suavdlawg fwm nwg, nwg tsi txhawj txug lub neej yaav tom ntej.

²⁶Nwg has lug ntse ntsuav hab tsi muaj ib lug sab leejtwg.

²⁷Nwg rau sab ntso khwv hab saib ntshis tsi pub nwg tsev tuabneeg raug kev txomnyem.

²⁸Nwg tej mivnyuas ncu nwg txaj ntsig, hab nwg tug quasyawg qhuas ntxhas nwg.

²⁹Nwg tug quasyawg has tas, “Muaj ntau tug quaspuj yeej zoo kawg hab, tabsis koj yog tug kws zoo dlua suavdlawg.”

³⁰Cev zaam zoo nqug tau tuabneeg lub sab hab kev zoo nkauj txawj pluj moog, tabsis tsimnyog qhuas tug quaspuj kws fwm tug TSWV.

³¹Nwg ua num zoo, ca le ncu nwg txaj ntsig. Nwg yog tug kws tsimnyog suavdlawg fwm.