Read Hmong Njua Paajlug 4 Bible Online

Paajlug 4 - Hmong Njua bible

Paajlug 4

¹Mivtub, ca le noog koj txiv tej lug qhuab qha. Ua tuab zoo noog, koj txhaj le yuav totaub.

²Tej lug kws kuv qhuab qha koj yeej yog tej lug zoo xwb, yog le ntawd, koj yuavtsum ncu ntsoov txhua lu huv tuabsi.

³Thaus kuv tseem yog mivnyuas tub kws yog kuv nam hab kuv txiv tuab tug tub,

⁴mas kuv txiv tub yeej qhuab qha kuv lawm. Nwg has tas, “Ncu ntsoov tej lug kws kuv qha koj nuav rua nruab sab hab tsi xob muab tso tseg ib zag le. Ua ib yaam le kuv qha koj lawm, koj txhaj yuav muaj sa ua neej nyob.

⁵Ca le txais yuav lub tswvyim hab kev txawj ntse! Tsi xob tso kuv tej lug tseg.

⁶Tsi xob muab lub tswvyim tso povtseg, rua qhov nwg yuav tsomkwm koj; saib lub tswvyim kuas muaj nqes, nwg txhaj yuav paab kuas koj tau kev kaaj sab lug.

⁷Qhov tseemceeb tshaaj plawg yog lub tswvyim. Koj yuav ua yaam dlaabtsi los xij, koj yuavtsum xub nrhav kuas tau lub tswvyim.

⁸Saib lub tswvyim kuas muaj nqes, nwg yuav ua rua koj tau koob meej. Ca le puag nkaus lub tswvyim ca, nwg txhaj yuav ua rua koj tau ntsejmuag.

⁹Tswvyim yuav yog lub mom kub rua koj ntoo nto moo lug.”

¹⁰Mivtub, noog kuv tej lug. Khaws nkaus tej lug kws kuv qha koj nuav ca, koj txhaj muaj txujsa ua neej nyob ntev.

¹¹Kuv tau qha tswvyim rua koj hab coj koj ua neej rua txujkev ncaaj nceeg.

¹²Yog koj ua neej lawv le txujkev txawj ntse, yuav tsi muaj ib yaam dlaabtsi thaiv koj kev, hab tsi muaj ib yaam dlaabtsi dlawm koj kutaw thaus koj dlha.

¹³Ncu ntsoov txhua yaam kws koj tau kawm lug lawm tsi xob muab tso tseg. Koj tej kev kawm txawj kawm ntse yog koj txujsa ntaag, ca le ceev nwg kuas zoo.

¹⁴Tsi xob moog rua tej qhov chaw kws cov tuabneeg ua phem moog. Tsi xob xyum ua lawv le cov tuabneeg sab phem tug yaam ntxwv.

¹⁵Tsi xob ua phem ua qas hlo le! Ca le tsiv kuas dlhau txujkev phem qas ntawd! Tsi xob moog ua txujkev phem, saib ntsoov rua koj txuj hauv kev xwb.

¹⁶Tej tuabneeg sab phem yog tsi tau ua kev txhum, mas puab pw tsi tsaug zug. Yog puab tsi tau ua rua ib tug twg raug mob mas puab tsi pw le.

¹⁷Kev ua phem hab kev yuam cai zoo ib yaam le yog puab tej zaub mov hab dlej haus ntaag.

¹⁸Txujkev kws cov tuabneeg ncaaj nceeg taug mas zoo ib yaam le thaus lub nub taabtom tawm tuaj, pum kev txoog hab ci zuj zug moog txug rua thaus taav su.

¹⁹Cov tuabneeg sab phem taug txujkev tsaus ntuj nti, ib yaam le mo ntuj. Puab qaug tabsis tsi pum yaam kws puab dlawm le.

²⁰Mivtub, koj yuavtsum muab sab npuab tej lug kws kuv has. Ua tuab zoo noog kuv tej lug.

²¹Tsi xob ca kuv tej lug tawm ntawm koj moog. Ncu ntsoov kuv tej lug hab khaws nkaus ca rua nruab sab.

²²Tej lug ntawd yuav pub txujsa hab kev noj qaab nyob zoo rua txhua tug kws totaub tej lug ntawd.

²³Koj yuavtsum ceevfaaj hab xaav zoo zoo; rua qhov koj lub neej moog lawv le koj tej kev xaav.

²⁴Tsi xob has tej lug tsi tseeb. Tsi xob has lug dlaag hab tsi xob has tej lug kws tsi zoo.

²⁵Tsaa qhovmuag saib ncaaj nraim rua tom hauv ntej; hab saib ntsoov koj txuj hauv kev.

²⁶Ua tuab zoo xaav ua ntej kws koj yuav ua ib yaam dlaabtsi, mas koj txhaj ua tau qhov zoo.

²⁷Ca le tsiv tawm ntawm txujkev phem hab taug kev ncaaj nraim rua tom hauv ntej. Tsi xob moog rua saab xis lossis saab txhumphem.