Read Hmong Njua Paajlug 5 Bible Online

Paajlug 5 - Hmong Njua bible

Paajlug 5

¹Mivtub, ua tuab zoo noog kuv lub tswvyim hab kuv tej kev txawj ntse.

²Koj txhaj yuav paub coj koj tug cwjpwm zoo, hab tej lug kws koj has yuav qha has tas, koj yog tug kws txawj ntse.

³Luas tej quaspuj lub qhovncauj has lug mog lug muas qaab zib ib yaam le zib ntaab hab nwg nwj nplua le pleev roj txiv ntoo,

⁴tabsis tom qaab ntawd nwg tsi muab dlaabtsi rua koj le, tsuas yog muab kev ab kev dlaw hab kev mob kev nkeeg rua koj xwb.

⁵Txujkev kws nwg taug yog txujkev tuag. Nwg yuav coj koj moog rua huv tubtuag teb.

⁶Nwg tsi taug txujkev kws muaj txujsa; tabsis nwg laam ua neej xwb, nwg tub tsi paub has tas yuav muaj xwm dlaabtsi tshwm lug rua nwg le.

⁷Mivtub, nwgnuav koj ca le noog kuv has, hab tsi xob muab kuv tej lug ib lus tso povtseg le.

⁸Ca le tsiv tawm ntawm tej quaspuj kws has taag lug nuav! Tsi xob moog ze ntawm nwg lub qhovrooj hlo le!

⁹Yog koj ua tsi zoo, lwm tug yuav tau txais koj lub koob meej, hab koj yuav tuag thaus koj tseem hluas rua tej tuabneeg kws tsi muaj kev taabncuab txhais teg,

¹⁰hab luas tej yuav tuaj txeeb koj tej qhov txhua chaw, hab tej kws koj khwv tau lug yuav poob moog ua luas tug.

¹¹Koj yuav pw quaj dlaa luam sau lub txaaj kws yog txujkev tuag, kaas yuav muab koj cev nqaj noj taag,

¹²ces koj yuav has tas, “Vim le caag kuv yuav tsi noog luas tej lug qhuab qha? Vim le caag kuv tsi ca luas qhuab ntuag kuv?

¹³Kuv tsi noog tej lug kws kuv tug xwbfwb qha. Kuv tsi quavntsej tej lug qha ntawd le.

¹⁴Hab tuab plag ntshis kuv ca le raug kev txaajmuag taabmeeg tej tuabneeg suavdlawg.”

¹⁵Koj yuavtsum ncaaj nceeg rua koj tug quaspuj hab hlub nwg tuab leeg xwb.

¹⁶Tej mivnyuas kws koj moog thaam lwm tug quaspuj muaj yuav tsi zoo rua koj.

¹⁷Tsimnyog ca koj tej mivnyuas ntawd luj hlub lug paab koj, tsi yog tso rua luas qhua.

¹⁸Koj ca le txaus sab rua koj tug quaspuj hab nrhav kev zoo sab nrug tug hluas nkauj kws koj yuav thaus koj tseem hluas,

¹⁹nwg zoo nkauj hab ntxim hlub ib yaam le tug xyuas muaslwj. Ca nwg lub xubndlag ua chaw suv sab rua koj, ca nwg txujkev hlub nyob puagncig koj.

²⁰Mivtub, vim le caag koj moog hlub dlua lwm tug quaspuj lawm? Vim le caag koj moog nyam lwm tug quaspuj lub xubndlag?

²¹Tug TSWV pum txhua yaam kws koj ua. Koj moog qhov twg los nwg yeej saib ntsoov koj.

²²Cov tuabneeg sab phem tej kev txhum yog lub vuj hlua ntaag. Nwg txujkev txhum ua lub vaag rov khwb nwg.

²³Nwg tuag rua qhov nwg tswj tsi tau nwg lub sab. Nwg txujkev ruag yuav xaa nwg moog rua huv nwg lub qhov ntxaa.