Read Hmong Njua Paajlug 6 Bible Online

Paajlug 6 - Hmong Njua bible

Paajlug 6

¹Mivtub, koj puas tau coglug rua leejtwg kws yuav paab them nwg tej nuj nqes?

²Koj tej lug puas rov khi koj hab koj tej lug cog tseg puas rov ua lub vuj hlua cuab koj kev?

³Mivtub, yog koj tau coglug le ntawd, ces koj poob rua tug tuabneeg ntawd qaab fwjchim lawm, koj ca le moog cuag nwg, hab thov thim koj tej lug cog tseg, kuas nwg tso koj, koj txhaj yuav dlim.

⁴Koj tsi xob pw tsaug zug lossis nyob ncaws nruj nris.

⁵Ca le tsiv tawm ntawm lub vuj hlua ib yaam le tug noog lossis tug muaslwj tsiv ntawm tug tuabneeg yos tua tsaj.

⁶Tug tuabneeg tubnkeeg, ca le moog saib ntsaum, saib ntsaum ua ntsaum lub neej le caag, koj txhaj le muaj tswvyim.

⁷Tej ntsaum tub tsi muaj thawjcoj, tsi muaj numtswv lossis tsi muaj ib tug thawjtswj kaav le,

⁸tabsis lub caij ntuj su puab txawj moog nrhav zaub mov lug npaaj ca noj rua lub caij ntuj no.

⁹Tug tuabneeg tubnkeeg, koj tseem yuav pw ntev le caag? Thaus twg koj maam le sawv?

¹⁰Tug tuabneeg tubnkeeg has tas, “Kuv tseem yuav tsaug ib tsig zug, hab kuv yuav khawm teg su ib chim tsaiv.”

¹¹Tabsis thaus nwg tseem pw tsaug zug, kev txomnyem yuav lug raug nwg ib yaam le tug tubsaab kws nqaa rawv qws tuaj fuab nwg lub neej ntaag.

¹²Cov tuabneeg tsi tsimtxaj hab sab phem tawm moog has lug dlaag rua nuav rua u.

¹³Puab txav muag hab ua tug pleeg tsawv ntxag koj nkaus xwb,

¹⁴txhua yaam kws puab xaav huv puab lub sab puavleej yog tej kev phem kev qas, hab ua kuas muaj teebmeem rua txhua qhov chaw.

¹⁵Vim le nuav, txujkev puamtsuaj txhaj yuav lug raug puab thaus puab tsi ncu ceevfaaj, hab puab tej nqaj yuav ndluag ua qhov txhaab khu tsi tau.

¹⁶Muaj xyaa yaam kws tug TSWV ntxub kawg nkaus hab zaam txim tsi tau rua le, yog le nuav: Ua qhovmuag qauj leg, tug nplaig kws has lug dlaag, ob txhais teg kws tua tej tuabneeg tsi muaj txhum, lub sab kws ntaus tswvyim ua phem, ob txhais kutaw kws maaj nrooj moog ua kev phem, ua timkhawv tsi tseeb ib tug dlhau rua ib tug, hab tug tuabneeg nkawg xaiv kuas tej phoojywg muaj teebmeem.

²⁰Mivtub, ca le ua lawv le koj txiv qha koj hab tsi xob tso koj nam tej lug qha tseg.

²¹Khaws nkaus obtug tej lug moog ua koj lub neej, hab khaws nkaus tej lug ntawd rua huv koj lub sab.

²²Obtug tej lug qhuab qha yuav coj koj txuj hauv kev thaus koj taabtom taug kev, yuav tsomkwm koj thaus tsaus ntuj, hab thaus nruab nub tej lug ntawd yuav ntuag koj.

²³Obtug tej lug qhuab ntuag yuav ua lub teeb ci ntsaa ab rua koj pum kev; obtug tej lug qhuab qha yuav paab tau koj kev ua neej.

²⁴Tej lug ntawd fwjxwm tsi pub koj txaav moog ti tej quaspuj sab phem, hab ntawm luas tej quaspuj tej lug haub ntxag.

²⁵Tsi xob ca puab tej kev zoo nkauj sim koj sab; tsi xob ca puab tej qhovmuag ua lub vuj hlua soo tau koj.

²⁶Ib tug txivneej muab ib lub ncuav ndlav tau ib tug namndlav, tabsis kev ntxag luas quaspuj yuav ua rua nwg puag npe moog taag simneej.

²⁷Koj puas tso tau suavtawg rua ntawm koj hauvsab kuas tsi xob kub koj tej rig tsho?

²⁸Koj puas moog tau sau cov ncaig tawg kws cig ntsaa thuav kuas tsi xob kub koj ob txhais kutaw?

²⁹Tug kws moog nrug luas quaspuj pw, yuav tsi dlim ib yaam le ntawd ntaag. Yog leejtwg ua, nwg yuav raug kev tsimtxom.

³⁰Tuabneeg tsi ntxub tug tubsaab, yog has tas nwg nyag zaub mov noj thaus nwg tshaib plaab;

³¹yog luas nteg tau nwg, nwg yuavtsum them xyaa npaug rov qaab, nwg yuav tau muab taagnrho tej kws nwg muaj moog them.

³²Tabsis tug txivneej kws ua txhum kev nkauj kev nraug, yog tug tuabneeg kws tsi txawj xaav; nwg rov ua rua nwg raug kev puamtsuaj ntaag.

³³Nwg yuav raug txaajmuag hab raug ntaus; hab nwg yuav raug txobthuam moog taag simneej.

³⁴Tsi muaj ib yaam kws ua rua tug quasyawg chim hab khib npaum le thaus kws luas tuaj txeeb nwg tug; mas thaus nwg ua pauj, nwg yuav pauj kuas txaus nkaus.

³⁵Tug quasyawg yuav tsi kaam txais yuav tej nyaj kws nplua ntawd le; txawm yog yuav muab nyaj ntau npaum le caag los yeej dlaws tsi tau nwg txujkev chim le.