Read Hmong Njua Paajlug 7 Bible Online

Paajlug 7 - Hmong Njua bible

Paajlug 7

¹Mivtub, koj ncu ntsoov kuv tej lug, hab khaws kuv tej lug ca rua nruab sab.

²Ua koj lub neej le kuv qha, koj txhaj yuav muaj sa ua neej nyob. Koj yuavtsum ua tuab zoo khaws kuv tej lug qha, ib yaam le koj txuag koj ob lub qhovmuag.

³Ncu ntsoov kuv tej lug qha txhua lub sijhawm; muab khaws nkaus rua nruab sab.

⁴Suav has tas, lub tswvyim yog koj tug muam, hab kev txawj ntse yog koj tug phoojywg zoo.

⁵Tej lug ntawd yuav tswj tsi pub kuas koj moog ti luas tej quaspuj, hab tej quaspuj kws has lug mog lug muas.

⁶Muaj ib zag kuv tuaj huv kuv lub tsev saib ntawm qhovrais moog,

⁷kuv pum muaj ib paab tub hluas kws tsi tau paub qaabhau taug kev tuaj, tabsis muaj ib tug yog tug ruag tshaaj cov.

⁸Ces nwg txawm taug kev moog ze rua ntawm kev tshuam kws tug quaspuj ntawd nyob. Hab nwg moog ze rua ntawm tug quaspuj ntawd lub tsev,

⁹thaus nub poob qho kws tub tsaus ntuj zuag lawm.

¹⁰Ces tug quaspuj txawm tawm tuaj cuag tug hluas ntawd; tug quaspuj ntawd naav tsoog zoo nkaus le tug namndlav hab npaaj tej tswvyim dlaag ntxag.

¹¹Nwg ua tug muaj plhus ntxhas tsi paub txaajmuag rua tej tuabneeg kws dlua kev le,

¹²lossis moog sawv ntawm tej kev tshuam tog, muaj qee zag nwg moog sawv pav yeev huv tej plawv kev, muaj qee zag nwg moog sawv pav yeev huv tej kab tej khw.

¹³Nwg xyaab hlo npaab moog puag nkaus tug tub hluas ntawd nwj kag, saib ntsoov tug tub hluas tsi ntsais muag le hab has tas,

¹⁴“Nub nua kuv tua tsaj fij hab muaj tej nqaj theej txhoj ntawd ntau heev.

¹⁵Yog le ntawd, kuv txhaj tawm tuaj nrhav koj. Mas kuv xaav ntsib koj kawg le, muaj moo kuv txhaj ntsib koj ntawm nuav!

¹⁶Kuv tub muab tej ntaub maag txaij nraug zeeg kws coj nraag tebchaws Iziv tuaj lug pua kuv lub txaaj lawm.

¹⁷Kuv tub muab tshuaj tsw qaab alu-es hab kinamoos lug pleev kuv lub txaaj tsw qaab ntxag lawm.

¹⁸Ca le nrug kuv moog! Wb yuav sis puag pw zoo sab ib mos kaaj ntug. Wb ib leeg yuav txaus sab rua ib leeg txhais npaab.

¹⁹Kuv tug quasyawg tsi nyob huv tsev. Nwg moog kev dleb lawm.

²⁰Nwg nqaa hlo lub naab nyaj nrug nwg moog lawm, hab nwg yuav moog ntev txug ob lub limtam maam le rov qaab lug.”

²¹Tug quaspuj ntawd has tej lug mog lug muas haub ntxag, ces tug tub hluas txhaj qaug sab hlo rua tug quaspuj ntawd tej lug ntxag.

²²Taamsim ntawd nwg ca le nrug tug quaspuj moog ib yaam nkaus le luas caab tug txiv nyuj moog khi ntawm tswg tua, hab ib yaam le luas puav muaslwj dlha moog maag vuj hlua.

²³Yog qhov chaw kws xibxub vug yuav chob moog ti nkaus rua huv nwg lub plawv. Nwg zoo ib yaam le tug noog kws yaa moog maag luas lub vaag. Nwg tsi paub has tas, nwg txujsa tub poob moog rua txujkev puamtsuaj lawm.

²⁴Cov Mivtub, nwgnuav mej ca le noog kuv has. Hab khaws kuv tej lug ca.

²⁵Tsi xob pub tej quaspuj kws zoo le tug quaspuj nuav ntxag tau mej lub sab; tsi xob ua tug tuabneeg kws tsi paub qaabhau dlaabtsi hab tsi xob lawv nwg qaab moog.

²⁶Nwg tub ua rua ntau tug txivneej raug puamtsuaj hab ua rua coob leej tuag lawm suav tsi txheeb.

²⁷Yog koj moog rua huv nwg tsev, ces yog koj taabtom taug kev moog rua huv tubtuag teb lawm ntaag. Qhov ntawd yog txujkev kws tuag sai kawg nkaus le.