Read Hmong Njua Paajlug 8 Bible Online

Paajlug 8 - Hmong Njua bible

Paajlug 8

¹Ca le noog! Lub tswvyim taabtom hu. Txujkev totaub tsaa nwg lub suab hu.

²Lub tswvyim yeej sawv nreg nroog sau tej ncov roob kws nyob ze rua ntawm tej ntug kev hab ntawm tej kev tshuam.

³Lub tswvyim tuaj ntawm tej ncauj ke kws nkaag moog rua huv nroog, hab sawv ntawm tej roojvaag ib saab hu has tas:

⁴“Tuabneeg, kuv tub hu mej lawm; kuv hu txhua tug kws nyob huv nplajteb nuav huv tuabsi.

⁵Mej tseem yog mivnyuas mog xwb los? Ca le kawm ua le tej laug ua. Mej yog tuabneeg ruag los? Ca le kawm kuas ntse los mas.

⁶Ua tuab zoo noog kuv tej lug kws zoo tshaaj plawg nuav; txhua yaam kws kuv qha mej yeej yog yaam tseeb xwb.

⁷Yaam kws kuv has yog qhov tseeb; kuv ntxub tej lug dlaag kawg le.

⁸Txhua yaam kws kuv has puavleej yog lug tseeb; tsi muaj ib lus twg yog lug dlaag lossis yuam kev le.

⁹Tug tuabneeg kws txawj ntse, nwg totaub tej lug nuav zoo; hab txhua yaam yoojyim rua tug kws txawj ntse.

¹⁰Khaws kuv tej lug qhuab ntuag ca zoo dlua le khaws tej nyaj txag; khaws tej kev txawj ntse ca zoo dlua le khaws tej tseem kub.

¹¹“Kuv yog lub tswvyim, kuv zoo dlua tej hlaws muaj nqes; txhua yaam kws mej xaav yuav yeej pev tsi tau kuv le.

¹²Kuv yog lub tswvyim, hab kuv muaj kev txawj ntse heev; kuv muaj kev txawj ntse hab paub txav txim.

¹³Qhov kws fwm tug TSWV, yog ntxub txujkev phem kev qas; kuv ntxub txujkev khaavtheeb, txujkev limham txujkev phem qas hab tej lug dlaag kawg le.

¹⁴Kuv tub npaaj tau tswvyim hab yuav siv tej tswvyim ntawd tawm ntaag. Kuv yog tug thoob tsib to nrog, hab kuv yog tug muaj zug nchaav.

¹⁵Kuv paab tej vaajntxwv tswj teb kaav chaw hab tej numtswv rhawv kevcai tswjfwm ncaaj nceeg.

¹⁶Txhua tug numtswv kws kaav huv lub nplajteb, kuv yog tug kws paab puab, tej coj plaub tsaws ntug hab tej numtswv qeb sab los ib yaam nkaus.

¹⁷Kuv hlub cov kws hlub kuv; yog leejtwg nrhav kuv yeej yuav ntsib kuv.

¹⁸Nyaj txag hab meejmom, kev npluanuj hab kev vaammeej kuv puavleej muaj.

¹⁹Tej kws koj tau ntawm kuv lug zoo dlua tej tseem kub hab zoo dlua tej tseem nyaj.

²⁰Kuv taug kev ncaaj nceeg; kuv ua lawv le txujkev tseeb,

²¹kuv muab kuv tej nyaj txag rua tug kws hlub kuv, puab tej tsev tuabneeg muaj nyaj muaj txaj nplua mag.

²²“Tug TSWV xub tsim kuv ua ntej dlua ib puas tsaav yaam huv tuabsi, kuv yog teg num kws nwg xub ua thaus u lug lawm.

²³Nwg yeej tsim kuv thaus chivkeeb, kuv yeej nyob thaus tsi tau tsim lub nplajteb nuav lug lawm.

²⁴Kuv tseem xub muaj nyob dlua thaus tseem tsi tau muaj havtxwv hab tej dlej txhawv.

²⁵Kuv tseem xub yug dlua tej hauv roob, ua ntej tej ncov roob nyob muaj chaw,

²⁶ua ntej Vaajtswv tsim lub nplajteb hab tej taj nraag lossis thawj phoov teg aav.

²⁷Thaus Vaajtswv muab lub ntuj moog tso nyob muaj chaw, kuv tub yeej nyob ntawd lawm, thaus nwg nthuav lub ntuj kuas tug npoo ntuj moog hlaa dlej havtxwv,

²⁸thaus nwg muab tej fuab moog tso rua sau nruab ntug, thaus nwg qheb tej qhovdlej havtxwv,

²⁹hab has kuas tej havtxwv tsuas ndlwg txij tej nrim kws nwg kom tseg. Thaus nwg puab tej caag nplajteb kuv tub yeej nyob ntawd lawm.

³⁰Kuv yeej nyob rawv ntawm nwg ib saab ib yaam le tug kws tsaa tsev ntaag, kuv yog tug kws naj nub ua rua nwg zoo sab, hab nrug nwg nyob suv sab so,

³¹kuv zoo sab rua lub nplajteb hab txaus sab rua txhua tsaav tuabneeg.

³²“Cov tub hluas, nwgnuav mej ca le noog kuv has! Ua le kuv has, mej txhaj yuav tau zoo nyob kaaj sab lug.

³³Ca le noog tej lug kws kuv qha mej nuav. Tsi xob muab tso tseg; mej txhaj yuav txawj ntse.

³⁴Tug tuabneeg kws noog kuv tej lug, tug tuabneeg kws naj nub tuaj sawv ntawm kuv lub qhovrooj tog yuav lug huv kuv lub tsev, yuav tau nyob kaaj sab lug.

³⁵Tug tuabneeg kws nrhav kuv yog nwg nrhav txujsa ntaag, hab tug TSWV yuav txaus sab rua nwg.

³⁶Tug tuabneeg kws tsi lug nrhav kuv, tug ntawd rov txuv nwg txujsa. Leejtwg ntxub kuv ces yog nwg nyam txujkev tuag.”