Read Hmong Njua Paajlug 9 Bible Online

Paajlug 9 - Hmong Njua bible

Paajlug 9

¹Lub tswvyim ua nwg lub tsev, hab txhus xyaa tug ncej txheem lub tsev ntawd.

²Nwg muab ib tug tsaj tua ua pluag noj pluag haus, muab cawv xyaw rua, hab coj moog txawb rua sau rooj.

³Nwg tso nwg cov ntxhais qhev moog rua sau qhov chaw sab huv lub nroog hu tuaj has tas:

⁴“Cov tuabneeg ruag, mej ca le lug ntawm nuav!” Hab nwg has rua cov txivneej ruag has tas,

⁵“Ca le tuaj, tuaj noj kuv tej zaub mov hab haus tej cawv kws kuv tov tau lawm.

⁶Ca le tso plhuav txujkev ruag tseg, hab lawv txujkev txawj ntse qaab, koj txhaj le yuav muaj sa nyob.”

⁷Yog koj ntuag tug tuabneeg kws luag lwm tug plig, mas koj yuav raug thuam. Yog koj thuam tej tuabneeg ua phem, mas koj yuav raug lug tsi zoo.

⁸Tsi xob moog ntuag tug tuabneeg kws luag lwm tug plig hlo le, nyob tsaam nwg yuav ntxub koj. Tabsis yog koj ntuag tug tuabneeg txawj ntse, mas nwg yuav fwm koj.

⁹Txhua yaam kws koj has rua tug tuabneeg txawj ntse yuav ua rua nwg muaj tswvyim ntxiv. Tej kws koj qha rua tug tuabneeg ncaaj nceeg yuav ntxiv kuas nwg muaj kev txawj ntse.

¹⁰Tug kws muaj tswvyim, yog tug kws paub fwm tug TSWV. Yog koj paub Vaajtswv tug kws Dlawbhuv, koj txhaj yog tug totaub tag.

¹¹Lub tswvyim yuav ntxiv kuas koj muaj sa ua neej nyob ntau xyoo.

¹²Yog koj muaj tswvyim, koj yuav muaj koob muaj meej, tabsis yog koj muab lub tswvyim povtseg, koj yuav raug kev txomnyem.

¹³Kev ruag zoo le tug quaspuj kws suab nrov, tawv ncauj hab tsi paub txaajmuag le.

¹⁴Nwg nyob rawv ntawm nwg lub qhovrooj lossis sau lub chaw kws sab tshaaj plawg huv nroog,

¹⁵hab hu tej tuabneeg kws dlua kev tuaj moog ua puab tej num has tas:

¹⁶“Cov tuabneeg tawv ncauj, ca le lug ntawm nuav!” Nwg has rua tug txivneej ruag has tas,

¹⁷“Cov dlej kws nyag lug yeej qaab zib dlua. Tej ncuav kws nyag lug yeej qaab tshaaj.”

¹⁸Puab tsi paub has tas, cov tuabneeg kws tuag lawm, tub yog cov kws moog huv tug quaspuj ntawd tsev. Cov tuabneeg kws moog rua huv nwg tsev lawm, yog cov kws nyob huv tubtuag teb qhov kws tub tshaaj plawg.