Read Hmong Njua Tej Lug Qha 10 Bible Online

Tej Lug Qha 10 - Hmong Njua bible

Tej Lug Qha 10

¹Yoov tuag ua rua fwj roj tsw qaab tsw phem, hab txujkev ruag kws miv miv yuav ua rua lub tswvyim kws luj pluj taag.

²Lawv le ibtxwm, mas tug tuabneeg ntse tsuas ua qhov yog, hab tug tuabneeg ruag txhaj ua tej yaam kws tsi yog xwb.

³Cov tuabneeg ruag, txawm yog puab moog qhov twg los puab tug yaam ntxwv yeej qha rua luas paub has tas, puab yog tuabneeg ruag.

⁴Yog koj tug thawjtswj npautawg rua koj, koj tsi xob tsiv tso koj teg num tseg, rua qhov kev ua sab ntev txhaj taav tau txujkev chim.

⁵Tej kev phem kws kuv pum nyob huv lub qaab ntuj nuav: yog tej kws cov thawjcoj ua tsi ncaaj, xws le:

⁶muab cov tuabneeg ruag lug tuav lub meejmom sab, tabsis muab cov tuabneeg muaj txag npluanuj lug tuav lub meejmom qeg.

⁷Kuv pum cov tuabneeg ua qhev caij neeg hab cov numtswv moog kutaw ib yaam le cov qhev.

⁸Yog leejtwg khawb qhov, tug ntawd yeej yuav poob rua huv lub qhov ntawd; hab yog leejtwg rhuav phaab ntsaa, naab yuav tum tug ntawd.

⁹Yog leejtwg txaug pobzeb, pobzeb yuav tais tug ntawd, yog leejtwg phua ntoo, ntoo yuav raug tug ntawd.

¹⁰Yog koj raab taus npub lawm, koj tsi huv, yuav qeg koj tug zug heev. Tabsis lub tswvyim yuav paab tau koj ua num tav.

¹¹Yog koj xub ca naab tum tau koj, ces koj ntxag tsi tau naab lawm.

¹²Tej lug kws tug tuabneeg txawj ntse has ua rua luas qhuas nwg, tabsis tej lug kws tug tuabneeg ruag has, ua rua nwg poob ntsejmuag.

¹³Yog nwg pib has tej lug ruag, thaus kawg yuav ua rua muaj kev chim hab npautawg.

¹⁴Tug tuabneeg ruag thaam ib zaaj taag pib ib zaaj tuaj. Tsi muaj leejtwg paub tej kws yuav tshwmsim lug yaav tom ntej, hab tsi muaj leejtwg qha tau has tas, tom qaab kws tuag lawm, yuav muaj dlaabtsi tshwmsim.

¹⁵Tug tuabneeg ruag kws tsi paub nrhav kev rov qaab moog tsev, mas ua rua nwg saab heev.

¹⁶Lub tebchaws kws tug vaajntxwv tseem hluas, hab cov numtswv pheej muaj rooj noj rooj haus tsheej taag mo, mas yuav raug kev puamtsuaj.

¹⁷Tabsis lub tebchaws kws tug vaajntxwv paub txav txim sab ua qhov zoo, hab cov thawjcoj kws noj haus muaj caij muaj nyoog puab tswj tau puab hab tsi quav cawv, mas yog lub tebchaws kws tau koob moov.

¹⁸Tug txivneej kws tubnkeeg khu nwg lub ruv tsev, ces lub tsev yuav xaw naag, hab pob puag taag.

¹⁹Rooj noj rooj haus yuav ua rua koj zoo sab hab cawv txiv maab yuav ua rua koj kaaj sab, tabsis yog koj tsi muaj nyaj txag, koj yeej tsi tau tej ntawd.

²⁰Tsi xob thuam koj tug vaajntxwv, txawm yog yuav xaav tuabywv xwb los tsi xob xaav le. Hab tsi xob thuam cov tuabneeg npluanuj, txawm yog yuav sis ntxhi tuabywv huv koj lub txaaj los tsi xob ntxhi le. Nyob tsaam noog yuav coj koj tej lug moog has qha rua luas paub.