Read Hmong Njua Tej Lug Qha 12 Bible Online

Tej Lug Qha 12 - Hmong Njua bible

Tej Lug Qha 12

¹Yog le ntawd, thaus mej tseem hluas, mej yuavtsum ncu ntsoov tug kws tsim mej, ua ntej lub naj lub xyoo txaav lug ze, hab nub phem yuav lug txug mej, thaus ntawd mej yuav has tas: “Kuv tsi xaav ua neej nyob ntxiv lawm.”

²Thaus ntawd lub nub, lub hli hab tej nubqub yuav tsaus dlub ncab, hab tej fuab kws ua naag tsaus nti yuav tsi txaav ntawm mej moog.

³Ces thaus ntawd mej ob txhais ncej npaab kws tiv thaiv mej yuav tsi muaj zug, hab mej ob txhais ceg kws nwgnuav muaj zug heev los yuav tsaug leeg. Mej cov nav los tsuas tshuav qee tug zum zaub mov lawm xwb, hab mej ob lub qhovmuag los yuav plooj pum kev tsi tseeb lawm.

⁴Mej qhovntsej yuav tsi nov tej suab nrov ntawm tej kev. Mej yuav tsi nov luas tej suab zum zeb lossis tej suab raaj hab suab nkauj nogncaas lawm, tabsis tej noog lub suab quaj yuav tsaa mej sawv.

⁵Mej yuav ntshai tej chaw sab, hab tsi tau luag taug kev. Mej cov plaubhau yuav dlawb taag, mej yuav fwj tsi tau mej lub cev, hab tsi ntshaw dlaabtsi le lawm. “Rua qhov suavdlawg yuav moog rua ntawm lub chaw kawg, hab yuav muaj kev quaj ntsuag nyob txhua txujkev.

⁶Txuj saw nyaj yuav hle, hab lub teeb tsaav kws muab kub nchuav los yuav poob tawg taag. Txuj hlua dlej ntawm lub qhov tshij los yuav tu, hab lub thoob ntaus dlej los yuav tawg taag.

⁷Peb lub cev yuav rov moog ua aav hab tug ntsujplig yuav rov moog cuag Vaajtswv tug kws muab txujsa rua peb.

⁸“Tug tuabneeg txawj ntse has tas, ‘Tsi muaj qaabhau! Tsi muaj qaabhau! Txhua yaam tsi muaj qaabhau le.’ ”

⁹Tabsis vim tug tuabneeg txawj ntse ntawd ntse heev, mas nwg txhaj qha rua tej tuabneeg suavdlawg paub yaam kws nwg paub. Nwg kawm paub ntau yaam paajlug hab nwg tau sim tej paajlug ntawd yeej muaj tseeb tag.

¹⁰Tug tuabneeg txawj ntse ua tuab zoo nrhav tej lug nplig sab, hab nwg sau tej lug tseeb xwb.

¹¹Tej paajlug kws cov tuabneeg txawj ntse has zoo ib yaam le cov tub yug yaaj tej paas kws puab taav puab cov yaaj, hab tej paajlug kws puab sau nyob moog ibtxhis ib yaam le tej ntsa hlau kws muab ntsa ruaj lawm. Tej paajlug ntawd yog Vaajtswv kws yog tug Tswv yug yaaj muab rua peb.

¹²Mivtub, tseem tshuav lwm yaam kws koj yuav tau ua tuab zoo saib, sau ntau phoo ntawv yuav tsi muaj nub xaus, hab kev kawm ntau yuav ua rua koj qaug zug.

¹³Thaus kawg nuav, yuavtsum fwm Vaajtswv hab ua lawv le nwg tej lug saamfwm, rua qhov nwg tsim tuabneeg lug ua teg num ntawd.

¹⁴Vaajtswv yuav txav txim rua txhua yaam kws peb ua, tsi has ua zoo lossis ua phem, hab tej yaam kws peb ua tsi pub leejtwg paub.