Read Hmong Njua Tej Lug Qha 2 Bible Online

Tej Lug Qha 2 - Hmong Njua bible

Tej Lug Qha 2

¹Kuv xaav has tas, ca kuv sim kev lomzem saib yuav zoo sab npaum le caag, tabsis kuv pum has tas, tej ntawd kuj tsi muaj qaabhau le hab.

²Kuv pum has tas kev luag yog ib yaam kws ruag kawg, hab tej kev lomzem yeej coj tsi tau ib yaam dlaabtsi lug rua yug le.

³Kuv xaav muaj tswvyim heev, kuv txhaj sim haus cawv hab ua kev lomzem. Kuv xaav has tas, “Qhov nuav yog yaam zoo tshaaj plawg rua tuabneeg ua tuabneeg lub neej kws nyob ib nyuas ntu huv nplajteb nuav”.

⁴Kuv ua ntau teg num tseemceeb kawg le. Kuv ua tau ntau lub tsev hab ua ntau dlaim teb txiv maab.

⁵Kuv ua ntau dlaim teb cog txiv ntoo, hab kuv cog ntau yaam txiv rua huv.

⁶Kuv khawb ntau lub paag dlej, txhaj tau dlej ywg kuv tej txiv maab txiv ntoo.

⁷Kuv yuav tubqhe hab nkauj qhe coob heev, kuv muaj tej tubqhe kws yug huv kuv tsev, kuv muaj nyuj, muaj tshis hab muaj yaaj coob dlua cov vaajntxwv kws xub nyob ua ntej kuv huv lub nroog Yeluxalees nuav.

⁸Kuv muaj nyaj hab kub ntau kawg le; tej ntawd yog kuv sau cov vaajntxwv nyob huv cov tebchaws kws kuv kaav tej nyaj lug khaws ca. Kuv muaj cov tub hab cov ntxhais hu nkauj ua rua kuv zoo sab, hab kuv muaj ntau tug quaspuj txaus kuv sab kawg le.

⁹Kuv tau ua tug luj dlua cov tuabneeg kws xub nyob ua ntej kuv huv lub nroog Yeluxalees nuav hab kuv tej tswvyim kuj nyob nrug nraim kuv.

¹⁰Txhua yaam kws kuv xaav yuav los kuv kuj tau. Kuv xaav ua kev lomzem los kuv yeej tsi tswj kuv lub sab le. Kuv txaus sab rua txhua yaam num kws kuv ua, hab tej nuav yog kuv tej nqe zug.

¹¹Kuv xaav txug txhua yaam num nyaav kws kuv tau siv zug khwv nyob huv qaab ntuj nuav, mas kuv pum has tas txhua yaam ntawd tsi muaj qaabhau le, tsuas zoo ib yaam le caum cua xwb.

¹²Tug vaajntxwv twg los tsuas ua tej kws cov vaajntxwv kws xub nyob ua ntej nwg lug lawm ua xwb. Ces kuv txhaj ua tuab zoo xaav txug kev txawj ntse, kev vwm hab kev ruag saib zoo le caag.

¹³Kuv pum has tas, “Kev ntse zoo dlua kev ruag ib yaam le qhov pum kev zoo dlua qhov tsaus ntuj.

¹⁴Cov tuabneeg ntse pum puab txuj hauv kev, tabsis cov tuabneeg ruag xuas dlub moog kev.” Txawm yog le ntawd los kuv pum has tas, thaus kawg puab cov ntawd lub neej zoo ib yaam nkaus.

¹⁵Kuv xaav huv kuv lub sab has tas, “Thaus kawg cov tuabneeg ruag lub neej zoo le caag, ces kuv lub neej yuav zoo ib yaam nkaus le ntawd. Yog le ntawd, tej kev txawj ntse kws kuv muaj yuav zoo dlaabtsi? Tej kev txawj ntse nuav los yeej tsi muaj qaabhau rua kuv le.”

¹⁶Tsi muaj leejtwg yuav ncu txug cov tuabneeg txawj ntse hab cov tuabneeg ruag, ib nub tom ntej luas kuj yuav tsi ncu txug peb ib yaam nkaus, cov tuabneeg ntse los yuav tuag ib yaam nkaus le cov tuabneeg ruag hab.

¹⁷Kuv xaav has tas kev ua neej tsi muaj qaabhau, rua qhov txhua yaam xwm kws kuv raug taag lug ua rua kuv ntxhuv sab kawg le. Txhua yaam ntawd puavleej tsi muaj qaabhau, tsuas zoo ib yaam le caum cua xwb.

¹⁸Tej num kws kuv ua hab tej kws kuv khwv tau nyob huv qaab ntuj nuav yeej tsi muaj qaabhau rua kuv, rua qhov kuv paub has tas, kuv yuav muab tej ntawd tso tseg rua tug kws yuav lug hloov kuv chaw.

¹⁹Hab leejtwg yuav paub has tas tug kws yuav lug ntawd, nwg yog tug ntse lossis yog tug ruag. Txawm yog nwg yuav zoo le caag los xij nwg yeej yuav tau tej kws kuv lub tswvyim khwv tau rua huv qaab ntuj nuav lawm, tej ntawd los tsi muaj qaabhau le.

²⁰Yog le ntawd kuv txhaj rov khauvxwm txug tej num nyaav kws kuv tau ua nyob huv qaab ntuj nuav.

²¹Tuabneeg siv tswvyim, kev paub, hab kev txawj ntse ua num tau nyaj hab ib puas tsaav yaam khaws ca, tabsis kuj muab tej ntawd tso tseg rua lwm tug kws tsi tau siv dlaag siv zug khwv le yuav, tej ntawd kuj tsi muaj qaabhau hab tsi tsimnyog le.

²²Yug yuav tau dlaabtsi lug ntawm qhov kws yug siv siv zug khwv hab fuas ua ntxhuv sab quas nyo huv qaab ntuj nuav?

²³Yug txujsa yuav nyob ntev le caag los xij, txhua yaam kws yug ua tsuas yog coj kev txhawjxeeb hab kev ntxhuv sab lug rua yug xwb. Txawm yog ntuj teb taag mo los yug lub sab yeej tsi tau su le. Tej nuav los tsi muaj qaabhau le.

²⁴Yaam kws zoo tshaaj plawg rua ib tug tuabneeg yog kev noj kev haus, hab txaus sab rua tej kws nwg khwv tau lug ntawd. Txawm le ntawd los kuv pum has tas tej ntawd puavleej yog lug ntawm Vaajtswv.

²⁵Yog tsi lug ntawm Vaajtswv lug, leejtwg yuav tau tej ntawd noj hab muaj kev zoo sab?

²⁶Vaajtswv pub tswvyim, kev txawj ntse hab kev kaaj sab rua tug kws ua hum nwg sab, tabsis Vaajtswv kuas cov tuabneeg txhum ua num nyaav, Vaajtswv txhaj tau tej ntawd pub rua cov tuabneeg kws ua hum Vaajtswv sab. Tej nuav kuj tsi muaj qaabhau le, tsuas yog zoo ib yaam le caum cua xwb.