Read Hmong Njua Tej Lug Qha 4 Bible Online

Tej Lug Qha 4 - Hmong Njua bible

Tej Lug Qha 4

¹Kuv rov pum dlua tej kev tsi ncaaj nceeg kws muaj nyob huv lub qaab ntuj nuav. Muaj cov tuabneeg kws raug luas tsimtxom quaj quas ntsuag, tabsis tsi muaj leejtwg paab puab le. Qhov kws tsi muaj leejtwg paab puab, vim cov tuabneeg kws tsimtxom puab ntawd yog cov kws muaj fwjchim.

²Kuv nrug cov tuabneeg kws tuag lawm zoo sab, vim puab tau zoo dlua cov kws tseem ua neej nyob.

³Tabsis tseem muaj cov kws tau zoo tshaaj cov caj hab cov tuag, cov ntawd yog cov kws tsi tau yug lug, puab tsi tau pum tej kev tsi ncaaj nceeg kws nyob huv lub qaab ntuj nuav.

⁴Kuv paub has tas, qhov kws tuabneeg siv zug ua num nyaav kuas puab muaj, tub yog vim puab khib tej kws luas zej zog tub muaj lawm. Tabsis tej ntawd tsi muaj qaabhau le, tsuas zoo ib yaam le caum cua xwb.

⁵Tug kws luas has tas yog tuabneeg ruag, yog tug kws puag teg puag taw ca nwg tuag tshaib.

⁶Qhov kws ca yug muaj kev kaaj sab mivntsiv zoo dlua le yug ob txhais teg ua num txhua lub sijhawm, tej ntawd tsuas zoo ib yaam le caum cua xwb.

⁷Kuv tseem pum muaj dlua lwm yaam nyob huv qaab ntuj nuav kws tsi muaj qaabhau.

⁸Yog tug txivneej kws nyob tuab leeg txawm yog nwg tsi muaj tub, tsi muaj kwvtij los nwg pheej rau sab ntso ua num nyaav hab tsi txaus sab rua nwg tej kev muaj txag npluanuj le. Nwg khwv tseg rua leejtwg, nwg txhaj pheej tsi su kuas muaj kev zoo sab le? Tej nuav los tsi muaj qaabhau, hab nwg tseem ua lub neej txomnyem ntsuav xwb.

⁹Ob leeg zoo dlua ib leeg, rua qhov ob leeg ua num tau nqe zug ntau dlua.

¹⁰Yog ib tug qaug lawm, ib tug yuav nqug nwg teg sawv. Tabsis tsi zoo rua tug kws nwg tuab leeg xwb, yog nwg qaug lawm tsi muaj leejtwg yuav nqug nwg teg sawv.

¹¹Lub caij ntuj no, ob leeg pw ua ke txhaj le suv, tabsis tug kws pw tuab leeg xwb yuav ua le caag suv taug?

¹²Yog ob leeg koom ua ke yuav tawmtsaam yeej ib leeg. Txuj hlua kws muaj peb ntswg nqug tsi tu yoojyim.

¹³Ib tug tuabneeg txomnyem yeej muaj cuabkaav lug ua tau vaajntxwv kaav tebchaws lossis tug tuabneeg raug txim muaj cuabkaav tawm huv tsev lojcuj moog nyob sau lub zwmtxwv, tabsis tug vaajntxwv laug kws tsi noog luas tej lug tuavxaam, tub zoo tsi cuag tug tub hluas kws txomnyem hab txawj ntse.

¹⁵Kuv xaav txug txhua tug tuabneeg kws nyob huv qaab ntuj nuav, kuv paub has tas, nyob huv cov tuabneeg ntawd, yuav muaj ib tug tub hluas lug hloov vaajntxwv chaw.

¹⁶Txawm yog tej pejxeem kws vaajntxwv kaav ntawd, yuav muaj coob hab tsawg los tom qaab kws nwg tuag lawm, tsi muaj leejtwg yuav ncu txug tej txaj ntsig kws nwg ua taag lug. Tej ntawd tsi muaj qaabhau, tsuas zoo ib yaam le caum cua xwb.