Read Hmong Njua Tej Lug Qha 5 Bible Online

Tej Lug Qha 5 - Hmong Njua bible

Tej Lug Qha 5

¹Koj yuavtsum ceevfaaj qhov kws moog huv lub Tuamtsev. Koj moog noog zoo dlua koj coj khoom moog fij ib yaam le tug tuabneeg ruag kws tsi paub has tas, qhov twg yog hab qhov twg tsi yog.

²Yuavtsum ua tuab zoo xaav ua ntej koj maam has, hab tsi xob laam tau laam coglug rua Vaajtswv. Vaajtswv yog tug nyob sau ntuj hab koj yog tug nyob huv qaab ntuj nuav, yog le ntawd tsi xob has ib lus tshaaj tej kws koj ua tau.

³Yog koj yimfuab txhawjxeeb yuav ua rua koj yimfuab ua npau suav ntau, hab yog koj yimfuab has lug ntau, yuav ua rua koj has tej lug tsi zoo.

⁴Yog le ntawd thaus koj coglug rua Vaajtswv, koj yuavtsum maaj ua kuas tej lug cog tseg ntawd tav. Nwg yeej tsi txaus sab rua tug tuabneeg ruag le. Koj yuavtsum ua lawv le koj tej lug cog tseg rua nwg lawm.

⁵Yog koj ua tsi tau le koj has, mas zoo dlua le kws koj tsi xob coglug.

⁶Tsi xob ca koj tej lug cog tseg ua rua koj ua txhum, hab tsi xob moog has rua Vaajtswv cov povthawj has tas, koj has yuam kev lawm xwb. Vim le caag koj ua kuas Vaajtswv npautawg rua koj? Vim le caag koj ca Vaajtswv rhuav tej kws koj ua ntawd puamtsuaj taag lawm?

⁷Tsi has ua npau suav ntau, ua tej num kws tsi tseemceeb ntau lossis has lug ntau yeej tsi muaj qaabhau. Yog le ntawd koj yuavtsum fwm Vaajtswv xwb.

⁸Tsi xob xaav tsi thoob thaus koj pum numtswv tsimtxom cov tuabneeg pluag, tsi tsaa puab cai hab txav txim tsi ncaaj rua puab. Txhua tug numtswv yeej muaj ib tug ua tug luj dlua saib nwg, hab tseem muaj ib tug kws muaj meejmom sab dlua saib puab.

⁹Txawm yog vaajntxwv los yeej ca sab rua tej qoobloo.

¹⁰Yog koj ntshaw nyaj txag, ces koj yuav tsi muaj kev txaus sab taag koj simneej le; yog koj ntshaw npluanuj, koj yuav tsi tau tej kws koj ntshaw ntawd. Tej ntawd yeej tsi muaj qaabhau le.

¹¹Yog koj yimfuab npluanuj, ces yimfuab muaj ntau leej kws koj yuav tau pub rua noj. Tej kws koj tau tsuas yog lu lug kws has tas, “Koj muaj txag npluanuj xwb.”.

¹²Tug tuabneeg kws ua num nyaav, txawm yog muaj ntau muaj tsawg los nwg yeej pw tsaug zug zoo. Tabsis tug tuabneeg muaj txag npluanuj, muaj ntau yaam kev nyuaj sab ua rua nwg pw tsi tsaug zug.

¹³Kuv pum dlua ib yaam kws xaav tsi thoob nyob huv qaab ntuj nuav: yog qhov kws tuabneeg pheej khaws nyaj ca rua lub sijhawm kws puab cheemtsum siv.

¹⁴Yog muaj tej yaam xwm tsi zoo, ua rua cov nyaj ntawd taag dlu lug, ces puab yuav tsi tshuav dlaabtsi tseg rua puab tej mivnyuas le.

¹⁵Peb nam yug peb lug labqaab, ces thaus peb rov moog los peb yuav moog labqaab; tej kws peb khwv tau, peb yuav coj tsi tau nrug peb moog.

¹⁶Qhov nuav yog ib yaam tsi zoo; peb yug lug le caag, peb yuav rov qaab moog le ntawd. Qhov kws peb ua num nyaav, peb tau dlaabtsi? Tsuas zoo ib yaam le caum cua xwb.

¹⁷Dlua le ntawd peb ua lub neej tsaus ntuj nti, muaj kev tu sab, kev ntxhuv sab, kev chim hab kev mob kev nkeeg taag moog le xwb.

¹⁸Yaam zoo kws kuv pum yog le nuav: Ca le noj hab haus hab txaus sab rua tej kws peb khwv tau lug thaus Vaajtswv pub peb ua neej nyob ib nyuas ntu huv qaab ntuj nuav. Tej nuav yog feem kws Vaajtswv pub rua peb.

¹⁹Yog Vaajtswv pub rua ib tug tuabneeg twg muaj txag npluanuj, muaj laj muaj teb, nwg ca le txaus sab rua tej ntawd. Nwg yuavtsum ua Vaajtswv tsaug, hab zoo sab rua tej kws nwg khwv tau lug. Rua qhov tej ntawd yog Vaajtswv pub rua nwg.

²⁰Yog Vaajtswv pub nwg muaj kev zoo sab, ces nwg yuav tsi muaj kev ntxhuv sab rua lub neej kws nyob ib ntus ntawd.