Read Hmong Njua Tej Lug Qha 8 Bible Online

Tej Lug Qha 8 - Hmong Njua bible

Tej Lug Qha 8

¹Tsuas yog tug tuabneeg ntse txhaj le paub lub ntsab lug meej xwb. Tswvyim ua rua nwg muaj ntsejmuag luag ntxhi hab ua rua nwg txujkev chim pluj moog.

²Ca le ua lawv le vaajntxwv has, hab tsi xob maaj coglug rua Vaajtswv.

³Vaajntxwv yeej muaj cuabkaav ua lawv le nwg sab nyam, yog le ntawd ca le tsiv ntawm nwg moog ua ntej koj raug kev puamtsuaj.

⁴Vaajntxwv yeej muaj fwjchim ua tau txhua yaam, hab tsi muaj leejtwg yuav has tau rua nwg has tas, koj ua dlaabtsi le ko?

⁵Yog koj noog nwg lug, koj yuav tsi raug puamtsuaj, tug tuabneeg ntse yeej paub lub sijhawm hab paub has tas yuav ua le caag txhaj zoo.

⁶Yeej muaj lub caij zoo hab muaj txujkev zoo lug ua txhua yaam, tabsis peb tsuas paub mivntsiv xwb!

⁷Peb yeej tsi muaj ib tug twg paub txug tej yaam kws yuav tshwmsim lug, hab tsi muaj leejtwg qha peb le.

⁸Tsi muaj leejtwg tsiv dlim txujkev tuag lossis tshem tau nub tuag tawm ntawm nwg moog. Qhov nuav yog npluav rog kws peb tsiv tsi dlhau, hab nyag kev tsiv tsi dlim le.

⁹Kuv pum tej xwm kws tshwmsim huv lub qaab ntuj nuav, mas ibtxha muaj fwjchim hab ibtxha raug txomnyem vim kev tswjfwm ntawm cov tuabneeg muaj fwjchim.

¹⁰Kuv pum luas muab cov tuabneeg ua phem kws tuag lawm coj moog log, puab pheej nkaag moog hab tawm huv qhov chaw dlawbhuv lug; tabsis tseem muaj tuabneeg qhuas puab nyob huv tej nroog kws puab ua kev phem kev qas. Tej ntawd los tsi muaj qaabhau le.

¹¹Vim le caag tuabneeg pheej nyam ua kev txhum ua luaj? Rua qhov puab ua txhum le ntawd los puab tsi raug txim taamsim ntawd.

¹²Tug tuabneeg txhum txawm ua txhum quas pua zag los nwg tseem ua neej nyob. Txawm le ntawd los kuv paub has tas, “Tug kws fwm Vaajtswv txhaj yog tug kws muaj kev kaaj sab,

¹³tabsis cov tuabneeg ua phem ua qas yuav tsi tau txujkev kaaj sab ntawd. Puab txujsa tsuas zoo ib yaam le tug dluab ntxoov ntxoo hab puab yuav tuag thaus puab tseem hluas, vim puab tsi fwm Vaajtswv.”

¹⁴Muaj tej yaam kws tshwmsim rua lub nplajteb nuav: Qee zag cov tuabneeg ncaaj nceeg raug txim theej cov tuabneeg kws ua phem ua qas. Hab cov tuabneeg ua phem ua qas tau txais cov tuabneeg ncaaj nceeg tej nqe zug. Kuv txhaj le has tas, tej ntawd tsi muaj qaabhau le.

¹⁵Yog le ntawd kuv txhaj has tas, nyag yuavtsum txaus sab rua nyag lub neej, rua qhov tsi muaj dlaabtsi yuav zoo tshaaj kev noj kev haus hab txaus sab rua nwg lub neej lawm. Nwg tsuas ua tej num kws Vaajtswv pub rua nwg ua thaus kws nwg tseem ua neej nyob huv nplajteb nuav xwb.

¹⁶Thaus kuv muab sab rau nrhav kev txawj ntse, hab kev ua num nyob huv nplajteb nuav, kuv pum has tas nruab nub hab mo ntuj los tsi muaj leejtwg tau su le,

¹⁷hab tsi muaj leejtwg totaub has tas Vaajtswv ua dlaabtsi. Txawm yog koj rau sab nrhav npaum twg los koj yeej tsi paub. Cov tuabneeg txawj ntse khaav has tas puab paub, tabsis puab yeej tsi paub le.