Read Hmong Njua Xalumoos Tej Nkauj 1 Bible Online

Xalumoos Tej Nkauj 1 - Hmong Njua bible

Xalumoos Tej Nkauj 1

¹Tej nkauj zoo tshaaj plawg kws Xalumoos sau.

²Ca koj lub qhovncauj nwj kuv; koj txujkev hlub zoo tshaaj tej cawv txiv maab.

³Koj lub cev tsw qaab ntxag; thaus has txug koj lub npe kuv ncu txug koj tug ntxhab. Tsi muaj ib tug quaspuj kws yuav tsi nyam koj le.

⁴Coj kuv nrug koj hab wb ca le tsiv moog; ca le ua kuv tug vaajntxwv hab coj kuv moog rua huv koj chaav pw, wb yuav muaj kev zoo sab ua ke. Wb yuav qhuas txujkev hlub tshaaj tej cawv txiv maab. Tub yog vim le nuav txhua tug quaspuj txhaj nyam koj ua luaj!

⁵Ib tsoom quaspuj kws nyob huv nroog Yeluxalees, kuv dlub dloog, tabsis zoo nkauj heev, kuv dlub ib yaam le tej tsevntaub kws nyob tom taj suabpuam Kedas; tabsis kuv zoo nkauj ib yaam le tej ntaub tsuj huv Vaajntxwv Xalumoos lub loog.

⁶Tsi xob saib tsi taug kuv, vim kuv lub cev dlub dloog. Rua qhov tshaav ntuj zab kuv txhaj havtawv, kuv cov nug chim rua kuv, hab yuam kuv moog tu vaaj txiv maab. Kuv txhaj tsi muaj sijhawm tu kuv lub cev.

⁷Tug kws kuv hlub, ca le qha rua kuv saib, koj yuav coj koj paab yaaj moog noj zaub qhov twg? Thaus taav su koj cov tsaj yuav moog su qhov twg? Vim le caag kuv txhaj yuavtsum tuaj nrhav koj huv luas lwm paab tuabneeg zuv yaaj.

⁸Tug hluas nkauj kws kuv hlub tshaaj plawg, koj puas paub qhov chaw? Koj ca le lawv paab yaaj nuav qaab nrhav lub tshaav zaub rua koj cov tshis kws nyob ze ntawm cov yug yaaj tej tsevntaub.

⁹Tug kws kuv hlub, koj ntxim cov txivneej sab npaum nkaus le tug maum neeg ntxim cov txiv neeg xob kws hai Falaus tej tsheb neeg sab ntaag.

¹⁰Koj cov plaubhau zoo nkauj ntev nplwg loo npug koj lub plhu, hab dlauv moog rua ntawm koj lub cejdlaab ib yaam le tej saw kws zoo nkauj.

¹¹Tabsis peb yuav ua ib txuj saw kub kws muab tej qai nyaj dlai rua rua koj coj.

¹²Kuv tug vaajntxwv taabtom pw sau nwg lub txaaj qhuas, hab kuv cov tshuaj tsw qaab, tsw qaab ntxag puv tsev.

¹³Tug kws kuv hlub yog lub naab tshuaj kws tsw qaab ntxag rua kuv, hab pw rawv huv kuv lub ndlag.

¹⁴Tug kws kuv hlub zoo ib yaam le tej paaj nroj qus kws tawg nyob huv lub vaaj txiv maab huv Enkedis.

¹⁵Tug kws kuv hlub, ua caag koj yuav zoo nkauj ua luaj; koj muaj sais muag ntxim hlub kawg le!

¹⁶Tug kws kuv hlub, ua caag koj yuav zoo nraug taag npaum; ua caag koj yuav ua rua kuv zoo sab ua luaj! Tej nroj ntsuab yuav ua wb lub chaw pw;

¹⁷tej ntoo cab yuav ua wb tej nqaaj tse, hab tej ntoo thuv yuav ua wb dlaim vuag nthaab.