Read Hmong Njua Xalumoos Tej Nkauj 2 Bible Online

Xalumoos Tej Nkauj 2 - Hmong Njua bible

Xalumoos Tej Nkauj 2

¹Kuv yog ib lub nyuas paaj ntoos kws nyob huv Saloos, yog lub paaj lilis kws nyob ntawm tej haav.

²Zoo ib yaam le tsob paaj lilis kws tuaj xyaw tej maab xuavpaug, nwg yog kuv tug hluas nkauj kws nyob nrug ib tsoom quaspuj.

³Yog muab tug kws kuv hlub pev rua lwm tug txivneej, nwg zoo ib yaam le tsob txiv dluaj kws tuaj xyaw tej ntoo haav zoov ntaag. Kuv nyam nyob huv qaab nwg tug dluab ntxoov ntxoo, hab kuv saaj nwg tej txiv qaab zib kawg nkaus le.

⁴Nwg coj kuv moog rua huv lub tsev kws luas npaaj muaj rooj noj rooj haus, nwg tsaa nwg tug chij roog kuv qha has tas nwg hlub kuv.

⁵Nwg muab tej txiv maab qhuav rua kuv noj kuas kuv rov muaj zug, hab muab txiv dluaj rua kuv noj ua rua kuv laaj sab kawg! Vim txujkev hlub ua rua kuv tsaus muag.

⁶Nwg xyaab loo nwg saab npaab txhumphem tuaj rau kuv ncoo, hab cev loo nwg saab teg xis tuaj puag nkaus kuv.

⁷Ib tsoom quaspuj kws nyob huv nroog Yeluxalees, mej ca le coglug rua kuv; ca le coglug rua tej kauv hab tej muaslwj has tas mej yuav tsi tuaj taabkaum wb txujkev hlub.

⁸Kuv nov tug kws kuv hlub lub suab. Nwg dlha ceev nrooj hlaa tej laaj roob tuaj, dlha ceev heev hlaa tej pov roob lug cuag kuv.

⁹Tug kws kuv hlub zoo ib yaam le tug txiv sua kauv, hab zoo ib yaam le tug thaav sai; nwg sawv npuab ntawm saab phaab ntsaa nwg xauj ntawm qhovrais tuaj hab xauj ntawm lub qhov tsev tuaj.

¹⁰Tug kws kuv hlub tsaa ncauj nrug kuv thaam. Tug kws kuv hlub, koj ca le tawm tuaj, kuv tug hluas nkauj, koj ca le tawm tuaj nrug kuv moog.

¹¹Caij ntuj no tub dlhau hab caij ntuj naag tub tu lawm;

¹²nyob tim tej ntug nroog, paaj ntoos tawg ntsaa ab. Taamsim nuav yog lub caij hu nkauj lawm ntaag; nov nquab quaj zum zawg huv tej teb tuaj.

¹³Tej txiv ncuav pas taabtom cuab sav; tej txiv maab taabtom tawg paaj zum zawg hab tsw qaab ntxag. Tug kws kuv hlub, ca le tawm tuaj. Kuv tug hluas nkauj, ca le tawm tuaj nrug kuv moog

¹⁴Koj zoo ib yaam le tug nquab kws moog nkaum huv tej kis zeb. Thov ca kuv pum koj lub ntsejmuag kws ntxim hlub, hab ca kuv nov koj lub suab kws has tej lug qaab zib.

¹⁵Ca le nteg cov maa hab tej mivnyuas maa lug rua wb, ua ntej kws cov maa ntawd yuav lug rhuav wb lub vaaj txiv maab kws taabtom tawg paaj ntsaa ab.

¹⁶Tug kws kuv hlub yog kuv tug, hab kuv yog nwg tug. Nwg yug nwg paab yaaj huv lub haav paaj lilis

¹⁷moog txug thaus sawv ntxuv kws muaj cov cua laaj ntxag tuaj hab qhov tsaus ntuj los pluj moog lawm. Tug nraugxwb kws kuv hlub, rov qaab lug ib yaam le tug txiv sua kauv, hab ib yaam le tug thaav sai kws nyob sau tej roob huv Npethes.