Read Hmong Njua Xalumoos Tej Nkauj 3 Bible Online

Xalumoos Tej Nkauj 3 - Hmong Njua bible

Xalumoos Tej Nkauj 3

¹Txhua mo kws kuv pw sau kuv lub txaaj, kuv ua npau suav toog txug tug kws kuv hlub; kuv nrhav nwg, tabsis nrhav tsi tau le.

²Kuv txhaj sawv moog ncig thoob plawg huv lub nroog, moog txhua nrho txhua txujkev luj hab kev miv. Kuv nrhav tug kws kuv hlub nkaus xwb; kuv nrhav kawg, tabsis tsi pum nwg le.

³Thaus cov faajxwm kws ncig huv lub nroog pum kuv, kuv nug puab has tas, “Mej puas pum tug kws kuv hlub?”

⁴Thaus kuv ncaim puab moog ib plag xwb kuv txawm ntsib nwg, kuv khawm dlai lag nwg hab tsi pub nwg moog qhov twg le, moog txug thaus kuv coj nwg moog rua huv kuv nam lub tsev, hab moog rua huv chaav tsev kws kuv nam yug kuv.

⁵Ib tsoom quaspuj kws nyob huv nroog Yeluxalees, mej ca le coglug rua kuv; ca le coglug rua tej kauv hab tej muaslwj has tas, mej yuav tsi tuaj taabkaum wb txujkev hlub.

⁶Yaam kws taabtom tawm tom taj suabpuam tuaj zoo ib yaam le tej paa tawg nchu, hab tej tshuaj tsw qaab hab tej roj tsw qaab kws cov tub laag tub luam muag ntawd yog dlaabtsi?

⁷Xalumoos taabtom tuaj, nwg nyob quastsawg sau nwg lub zwmtxwv; muaj rau caum leej tubrog tsomkwm nwg tuaj, yog cov tubrog kws muaj zug tshaaj huv cov Yixalayees.

⁸Puab cov ntawd puavleej txawj tua ntaaj heev; hab puab yog cov tubrog kws txawj ntaus rog kawg le. Puab txhua tug puavleej tuav rawv ntaaj ntawm teg, hab npaaj rawv tog sis tua thaus tsaus ntuj.

⁹Vaajntxwv Xalumoos muab cov ntoo kws coj peg tebchaws Lenpanoos tuaj ua nwg lub zwmtxwv.

¹⁰Lub zwmtxwv ntawd muab nyaj vuam tej ceg huv tuabsi; dlaim kws thaiv nrau nrausqaum yog muab kub ua, dlaim ntaub tsaamxem kws pua lub zwmtxwv yog cov quaspuj huv nroog Yeluxalees ntus.

¹¹Cov quaspuj huv Xi-oos, ca le tawm tuaj saib Vaajntxwv Xalumoos; nwg ntoo rawv lub mom kub kws nwg nam muab rua nwg ntoo nub txis tshoob, nub kws nwg muaj kev zoo sab hab txaus sab kawg nkaus.