Read Hmong Njua Xalumoos Tej Nkauj 4 Bible Online

Xalumoos Tej Nkauj 4 - Hmong Njua bible

Xalumoos Tej Nkauj 4

¹Tug kws kuv hlub, ua caag koj yuav zoo nkauj ua luaj! Koj ob lub qhovmuag kws nyob saab huv dlaim ntaub kws npug koj lub ntsejmuag ci hob ntxim hlub kawg le; koj cov plaubhau ntxhee yeeg ib yaam le paab tshis kws dlha peg tej pov roob Nkile-as lug.

²Koj cov nav dlawb ib yaam le paab yaaj kws luas nyavnyuas muab txav plaub hab ntxuav taag. Txhua tug puavleej yug mivnyuas ntxaib tsi muaj ib tug mooj le.

³Koj ob dlaim tawv ncauj zoo ib yaam le pluaj ntaub lab; thaus koj has lug, ua caag koj ob dlaim tawv ncauj ntxim hlub ua luaj. Koj ob saab plhu zoo ib yaam le ob saab txiv ntsab pobkws nyob huv dlaim ntaub kws npug koj lub ntsejmuag.

⁴Koj lub cejdlaab zoo ib yaam le Daviv lub chaw tsomfaaj kws kheej dlu ndlaug leeg, muab ib txuj saw dlai ib txheeb tug ncais rua koj coj puagncig cejdlaab.

⁵Koj ob lub mig zoo ib yaam le ob tug mivnyuas kauv ob tug mivnyuas kauv ntxaib kws taabtom noj zaub huv lub haav paaj lilis.

⁶Kuv yuav nyob sau lub pov roob kws muaj tshuaj tsw qaab, lub pov roob kws muaj tej ntoo tsw qaab moog txug thaus sawv ntxuv kws muaj cua ntsawj laaj ntxag tuaj, hab qhov tsaus ntuj pluj moog lawm.

⁷Tug kws kuv hlub, ua caag koj zoo nkauj ua luaj; ua caag koj yuav zoo ua luaj tsi muaj ib qhov phem le.

⁸Kuv tug nkauj nyaab, koj ca le nqeg sau Roob Lenpanoos lug nrug kuv moog; koj ca le nqeg sau Roob Lenpanoos lug cuag kuv. Koj ca le nqeg sau Roob Amanas lug, ca le nqeg sau Roob Xenis hab sau Roob Helemoos, qhov chaw kws tej tsuv ntxhuav hab tsuv txaij nyob lug.

⁹Kuv nplooj sab, kuv tug nkauj nyaab, koj ob lub qhovmuag kws saib ntsoov kuv, hab tej saw kws koj coj ntawm cejdlaab tub nyag kuv nplooj sab lawm.

¹⁰Koj txujkev hlub ua rua kuv txaus sab kawg nkaus le. Kuv nplooj sab hab kuv tug nkauj nyaab, koj txujkev hlub zoo tshaaj tej cawv txiv maab, koj tej tshuaj tsw qaab tseem tsw qaab tshaaj tej txumlom lawm hab.

¹¹Tug kws kuv hlub, koj ob dlaim tawv ncauj qaab npaum le zib ntaab koj tug nplaig yog kua mig hab yog zib ntaab rua kuv. zib ntaab hab kua mig nyob huv koj tug qaab nplaig. Koj cev rig tsho tsw qaab ntxag le tug ntxhab peg Lenpanoos.

¹²Kuv nplooj sab, kuv tug nkauj nyaab, koj yog lub vaaj kws nyob nraim nkoog, lub vaaj kws xov laajkaab thaiv, hab lub qhovdlej kws tub muaj tswv lawm;

¹³nyob huv lub vaaj ntawd tej txiv ntoo hlub zoo heev. Tej txiv ntoo ntawd hlub mog nyoos ib yaam le tej txiv ntsab pobkws hab txi txiv zoo kawg nkaus le. Nyob qhov ntawd tsw qaab ntxag le henas hab naj,

¹⁴Xafiloos, kalamus hab kinamoos; lossis tsw qaab ntxag le txhua yaam tshuaj tsw qaab. Muaj tej nroj mules hab alau-es tuaj huv lub vaaj ntawd nrug txhua yaam ntoo tsw qaab kws siv ua tej tshuaj tsw qaab tshaaj plawg.

¹⁵Yog lub vaaj kws muaj qhovdlej txhawv, yog tug dlej kws ndlwg ntshab si, yog tug dlej kws txhawv hab ndlwg peg Roob Lenpanoos lug.

¹⁶Cov cua saab qaumteb, ca le sawv! Cov cua saab qaabteb, ca le ntsawj tuaj rua huv kuv lub vaaj; kuas tej paa tsw qaab ntxag moog rua txhua qhov. Ca tug kws kuv hlub tuaj rua huv nwg lub vaaj, hab ca nwg lug noj tej txiv ntoo kws qaab tshaaj plawg.