Read Hmong Njua Xalumoos Tej Nkauj 6 Bible Online

Xalumoos Tej Nkauj 6 - Hmong Njua bible

Xalumoos Tej Nkauj 6

¹Tug hluas nkauj kws zoo nkauj tshaaj plawg, tug kws koj hlub moog qhov twg lawm? Qha rua peb saib tug kws koj hlub moog rua txujkev twg lawm, peb txhaj paub nrug koj nrhav nwg.

²Tug kws kuv hlub moog rua huv nwg lub vaaj, qhov chaw kws muaj tej ntoo tsw qaab lawm. Nwg tso nwg cov tsaj moog noj zaub huv vaaj hab nwg moog dle tej paaj lilis.

³Tug kws kuv hlub yog kuv tug hab kuv yog nwg tug; nwg tso nwg cov yaaj moog noj zaub huv lub haav paaj lilis.

⁴Tug kws kuv hlub, koj zoo nkauj ib yaam le lub nroog Tilexas, hab ntxim nyam le lub nroog Yeluxalees. Hab zoo ib yaam le thaus kuv pum tej nroog luj ua rua kuv hlu ib suab.

⁵Ca le tig koj ob lub qhovmuag kws saib kuv moog rua lwm qhov; puab taabtom nteg kuv ca; koj cov plaubhau ntxhee yeeg ib yaam le paab tshis kws dlha peg tej pov roob Nkile-as lug.

⁶Koj cov nav dlawb ib yaam le paab yaaj kws tawm huv qhov chaw luas ntxuav lug; txhua tug puavleej yug mivnyuas ntxaib tsi muaj ib tug mooj le.

⁷Koj ob saab plhu zoo le ob saab txiv ntsab pobkws nyob saab huv dlaim ntaub kws npug koj lub ntsejmuag.

⁸Vaajntxwv muaj rau caum tug puj vaajntxwv, yim caum tug nam yau, hab muaj hluas nkauj coob heev suav tsi txheeb.

⁹Tabsis kuv tsuas hlub ib tug xwb, nwg ntxim kuv sab npaum le tug nquab; nwg yog nwg nam tuab tug ntxhais nkaus xwb, nwg yog tug kws nwg nam hlub tshaaj plawg. Txhua tug quaspuj puavleej saib nwg hab qhuas nwg; Vaajntxwv cov puj vaajntxwv hab cov nam yau puavleej hu nkauj qhuas nwg.

¹⁰Tug quaspuj nuav yog leejtwg? Saib mas tshab le thaus sawv ntxuv, nwg zoo nkauj heev hab ci ntsaa ab ib yaam le lub nub lossis lub hli.

¹¹Kuv tub nqeg moog rua huv lub haav ntoo txiv qaab rog lawm, moog saib tej ntsuag ntoo kws nyob huv lub haav, moog saib tej maab kws taabtom ua cos pib hlaav nplooj hab tej ntoo txiv ntsab pobkws kws tawg paaj.

¹²Kuv ib ce tshee nyo; vim koj ua rua kuv qaug rua txujkev hlub ib yaam le nyob huv lub tsheb neeg kws caij moog ntaus rog.

¹³Tug hluas nkauj Sulas, ca le seev cev, seev cev los mas! Ca peb saib koj seev cev. Vim le caag mej txhaj xaav saib kuv thaus kuv seev cev nyob nruab nraab ntawm ob paab tuabneeg?