Read Hmong Njua Xalumoos Tej Nkauj 8 Bible Online

Xalumoos Tej Nkauj 8 - Hmong Njua bible

Xalumoos Tej Nkauj 8

¹Kuv xaav has tas kheev laam koj yog kuv tug nug kws kuv nam pub mig rua noj ntawm nwg lub xubndlag. Yog kuv moog ntsib koj nyob ntawm kev, kuv yuav nwj kag koj hab yuav tsi muaj leejtwg xaav le caag.

²Kuv yuav coj koj moog rua huv kuv nam lub tsev, hab koj yuav qha txujkev hlub rua kuv. Kuv yuav muab cov cawv kws qaab heev rua koj haus, yog kuv cov cawv txiv ntsab pobkws kws tsw qaab ntxag.

³Koj saab teg txhumphem yuav ua kuv lub tog rau ncoo hab koj saab teg xis yuav puag kuv pw.

⁴Ib tsoom quaspuj kws nyob huv lub nroog Yeluxalees, mej ca le coglug rua kuv has tas, mej yuav tsi tuaj taabkaum wb txujkev hlub.

⁵Leejtwg taabtom tuaj tom taj suabpuam tuaj, hab nwg txhais teg tuav rawv tug kws nwg hlub? Kuv tsaa koj sawv huv qaab tsob txiv dluaj kws yog qhov chaw yug koj.

⁶Tsi xob muab koj lub sab hlub leejtwg, tabsis ca hlub kuv xwb; koj tsi xob tuav leejtwg teg le, tabsis tuav kuv teg xwb. Txujkev hlub muaj zug ib yaam le txujkev tuag; txujkev khib muaj zug ib yaam le lub qhov ntxaa nwg cig ib yaam le nplaim tawg hab kub ib yaam le suavtawg.

⁷Muab dlej tua los tsi tau; dlej fuam tuaj nyaab los yeej tsi tuag. Tabsis yog leejtwg muab nyaj txag moog yuav txujkev hlub nwg yuav raug thuam luj kawg nkaus.

⁸Peb muaj ib tug muam yau, nwg ob lub mig tseem tsi tau o. Peb yuav ua le caag rua nwg thaus kws muaj ib tug tub hluas tuaj yuav nwg ua quaspuj?

⁹Yog has tas nwg yog ib saab phaab ntsaa, peb yuav muab nyaj ua ib lub chaw tsomfaaj rua nwg. Yog has tas nwg yog ib lub roojvaag, peb yuav muab tej txag ntoo cab lug thaiv nwg.

¹⁰Kuv yog saab phaab ntsaa, kuv ob lub mig yog ob lub chaw tsomfaaj. Tug kws kuv hlub yeej paub has tas, yog kuv moog nrug nwg nyob mas kuv yuav tau txais kev kaaj sab lug xwb.

¹¹Xalumoos muaj ib lub vaaj txiv maab nyob ntawm Npa-aas Hamoos. Nwg muab lub vaaj ntawd rua cov tuabneeg ua teb cog txiv maab; puab ib leeg them ib txheeb lub nyaj rua nwg.

¹²Xalumoos, koj ca le txais ib txheeb lub nyaj kws yog koj tug zoo sab hlo, cov ua teb tau txais ib leeg ob puas lub nyaj ua nqe zug; lub vaaj txiv maab ntawd yog kuv tug.

¹³Tug kws kuv hlub, thov ca kuv nov koj lub suab has lug huv vaaj tuaj; kuv cov phoojywg los tog ntsoov noog koj has lug xwb.

¹⁴Tug kws kuv hlub, ca le lug cuag kuv ib yaam le tug kauv lossis tug thaav sai kws nyob sau roob qhov chaw kws muaj tej nroj tsw qaab.