Read Hmong Njua Yaxayas 1 Bible Online

Yaxayas 1 - Hmong Njua bible

Yaxayas 1

¹Zaaj ywgtoog kws Vaajtswv qha rua Amauxes tug tub Yaxayas, kuas nwg pum txug cov Yudas hab lub nroog Yeluxalees, thaus lub sijhawm kws Uxiyas, Yauthaas, Ahas hab Hexekiyas puab ua vaajntxwv kaav cov Yudas.

²Tug TSWV has tas, “Lub ntuj hab lub nplajteb, ca le noog tej lug kws kuv has! Tej mivnyuas kws kuv yug hab tu hlub tau ntxeev sab rua kuv.

³Nyuj paub has tas leejtwg yog nyuj tug tswv, hab neeg luav paub has tas lub dlaab zaub kws tug tswv pub rua neeg luav noj nyob qhov twg. Tabsis cov Yixalayees tsi paub puab tug TSWV, kuv tsaav tuabneeg tsi totaub hlo le.”

⁴Tsaav tuabneeg kws ua txhum, mej yog cov kws muaj kev txhum luj. Cov noob kws ua phem ua qas, cov mivnyuas kws ua kev puamtsuaj! Mej tau tso tug TSWV tseg lawm. Mej tau tuam mom cov Yixalayees tug Vaajtswv kws dlawbhuv hab tig nrausqaum rua nwg.

⁵Vim le caag mej pheej yuav tsim kev nyuaj sab hab ntxeev sab tsi tseg le? Mej puas xaav kuas kuv rau txim rua mej ntxiv? Mej tej taubhau tub ua kav txhaab thoob plawg, hab mej tej sab tej ntsws tub mob ncug nco lawm.

⁶Txij ndlua huv kutaw moog nto plawg sau taubhau, thoob plawg mej lub cev tub tsi muaj ib qho zoo le; tsuas pum o, dloog hab ua qhov txhaab xwb. Mej tub tsi qhwv mej tej qhov txhaab, tsi tu kuas zoo hab muab tshuaj rua le.

⁷Mej lub tebchaws nyob qhuav qhawv tseg, mej tej nroog kub nyab taag tshuav txhaa aav lawm xwb. Lwm tsaav tuabneeg tuaj txeeb mej lub tebchaws kaav taabmeeg mej, hab muab txhua yaam kws mej muaj ua puamtsuaj taag.

⁸Tug TSWV tub muab Xi-oos tug ntxhais tso povtseg zoo le lub tsev pheebsuab kws nyob huv lub vaaj txiv maab lossis zoo le lub tsev kws nyob huv dlaim teb dlib lossis zoo le lub nroog kws luas vij lawm.

⁹Yog has tas tug TSWV kws muaj fwjchim luj tsi paab kuas peb qee leej dlim, peb yuav zoo ib yaam le lub nroog Xaudoos hab lub nroog Kaumaulas ntaag.

¹⁰Cov tuabneeg kws kaav lub nroog Xaudoos, mej ca le noog tug TSWV tej lug los mas! Cov tuabneeg kws nyob huv lub nroog Kaumaulas, mej ca le tig qhovntsej noog peb tug Vaajtswv tej lug qha.

¹¹Tug TSWV nug has tas, “Tej khoom kws mej coj tuaj fij ntau heev rua kuv ntawd, puas tseemceeb rua kuv? Tej yaaj hab tej roj tsaj kws mej muab tuaj hlawv fij rua kuv, dlhuav kuv heev lawm. Kuv yeej tsi txaus sab yuav tej ntshaav yaaj, ntshaav nyuj hab ntshaav tshis ntawd le.

¹²Leejtwg kuas mej nqaa tej nuav tuaj rua kuv thaus mej tuaj pehawm kuv? Leejtwg kuas mej ua tej nuav, hab ncig moog ncig lug ntawm kuv lub Tuamtsev?

¹³Tseg tsi xob nqaa mej tej khoom fij kws tsi muaj nqes tuaj lawm! Kuv dlhuav mej tej paa moov tshuaj tsw qaab kws mej hlawv ntawd kawg le. Kuv tiv tsi taug mej tej rooj noj rooj haus kws mej ua thaus Hli Xab, tej nub Xanpataus hab thaus mej tuaj txoos ua ke ua kevcai; mej ua txhum vim mej ua tsi ncaaj.

¹⁴Kuv ntxub qhov kws mej ua rooj noj rooj haus thaus Hli Xab, hab tej nub Xanpataus. Tej ntawd yog lub nraa kws kuv dlhuav ris heev lawm.

¹⁵“Thaus mej tsaa teg thov kuv, kuv yuav tsi saib mej. Txawm yog mej yuav thov ntev npaum le caag los kuv yuav tsi noog, rua qhov mej tej teg tua tuabneeg.

¹⁶Ntxuav kuas mej huv; tso plhuav tej kev phem kev qas kws kuv pum mej ua nuav tseg. Tso plhuav kev phem kev qas tseg

¹⁷hab xyum ua tuabneeg zoo, nrhav kev ncaaj nceeg, paab tej tuabneeg kws raug tsimtxom, ua ncaaj rua cov mivnyuas ntsuag hab paab cov puj ntsuag.”

¹⁸Tug TSWV has tas, “Peb ca le lug sis has txug zaaj nuav. Txawm yog mej tej kev txhum yuav lab cuag ntshaav, kuv yuav ua kuas dlawb paug le dlaus, Txawm yog mej tej kev txhum dlub dloog ncab los kuv yuav ua kuas dlawb paug le tej plaub yaaj.

¹⁹Yog mej noog kuv lug, mej yuav tau noj txhua yaam zoo kws cog huv lub tebchaws nuav;

²⁰tabsis yog mej tsi noog kuv lug, mej ua tuabneeg sab tawv hab ntxeev sab, mej yuav raug kev pluj kev tuag. Kuv yog tug TSWV kws has tej lug nuav ntaag.”

²¹Lub nroog kws muaj kev ncaaj nceeg, nwgnuav dlhau moog ua namndlav, thaus u muaj tuabneeg ncaaj nceeg nyob puv nkaus huv, tabsis nwgnuav tshuav cov tuabneeg tua tuabneeg nyob lawm xwb.

²²Lub nroog Yeluxalees, yaav taag lug koj zoo ib yaam le cov tseem nyaj, tabsis nwgnuav mej tub tsi muaj nqes le lawm. Yaav taag lug koj zoo le tej cawv txiv maab kws qaab heev, tabsis nwgnuav koj zoo ib yaam le cov cawv kws tov dlej lawm xwb.

²³Koj cov numtswv tau ntxeev sab, hab thooj sab koom ntsws nrug cov tuabneeg tubsaab; puab txaus sab rua tej nyaj kws luas coj tuaj xab hab tej khoom pub. Puab tsi paab txheem cov mivnyuas ntsuag huv tsev tu plaub, hab tsi noog cov puj ntsuag tej lug peev.

²⁴Yog le ntawd, koj ca le noog tug TSWV kws muaj Fwjchim Luj kawg nkaus kws yog cov Yixalayees tug Vaajtswv has tas, “Kuv yuav ua pauj rua mej kws yog kuv cov yeebncuab, kuas mej txhaj yuav tsi ua txhum rua kuv ib zag ntxiv lawm.

²⁵Kuv yuav tawmtsaam koj, kuv yuav muab koj tej teev dlub ntxuav kuas dlawb, hab yuav so koj qhov ceb kuas huv.

²⁶Kuv yuav pub kuas koj muaj cov thawjcoj hab cov tuavxaam ib yaam le thaus u koj muaj lawm. Ces luas txhaj yuav hu koj ua lub nroog kws zoo hab ncaaj nceeg.”

²⁷Vim Vaajtswv yog tug ncaaj nceeg, nwg txhaj cawm lub nroog Yeluxalees, hab txhua tug kws tso kev txhum tseg lawm kuas dlim.

²⁸Tabsis cov tuabneeg kws ntxeev sab rua Vaajtswv hab cov tuabneeg kws ua txhum, nwg yuav muab tsuj kuas puamtsuaj; txhua tug kws tso nwg tseg lawm, nwg yuav muab tua huv tuabsi.

²⁹Koj yuav raug txaajmuag, vim mej txaus sab rua tej ntoo qheb ntawd; koj yuav poob ntsejmuag, vim tej vaaj tseemceeb kws koj tau xaiv.

³⁰Koj yuav qhuav ntsws ntsee ib yaam le tug ntoo qheb kws tub tuag lawm, hab ib yaam le lub vaaj kws tsi muaj tuabneeg ywg dlej.

³¹Vim puab tej kev ua phem ua qas, cov tuabneeg muaj zug yuav raug kev puamtsuaj, ib yaam le suavtawg kub tej quavnyaab hab tsi muaj leejtwg tua tau le.