Read Hmong Njua Yaxayas 10 Bible Online

Yaxayas 10 - Hmong Njua bible

Yaxayas 10

¹Cov tuabneeg kws rhawv kevcai tsi ncaaj nceeg hab cov tuabneeg kws sau kevcai lug tswj kuv tsaav tuabneeg,

²tsi pub kev ncaaj nceeg rua cov tuabneeg txomnyem hab txwv kuv tsaav tuabneeg pluag txuj cai kuas mej tau cov puj ntsuag hab cov mivnyuas ntsuag tug, mas mej yuav raug kev puamtsuaj lauj.

³Mej yuav ua le caag thaus txug nub kws Vaajtswv txav txim rua mej? Mej yuav ua le caag thaus nwg coj lwm tsaav tuabneeg kws nyob dleb tuaj ua kuas mej puamtsuaj? Mej yuav moog kuas leejtwg paab mej, hab mej yuav muab mej tej nyaj coj moog tso rua qhov twg?

⁴Mej yuav raug tua tuag taag rua huv tshaav rog lossis raug caab moog kaw nrug cov tuabneeg raug txim. Vim tej nuav nwg chim heev; nwg txhais teg txhaj rau txim tsi tseg rua mej.

⁵Vaajtswv has tas, “Axilias! Kuv yuav siv cov Axilias ua raab qws rau txim rua cov tuabneeg kws ua rua kuv chim.

⁶Kuv tso cov Axilias moog tawmtsaam tsaav tuabneeg kws tsi leeg yuav Vaajtswv, kuv has kuas puab moog tawmtsaam cov tuabneeg kws ua rua kuv chim, kuas moog txeeb, moog nyag hab moog tsimtxom cov tuabneeg ntawd ib yaam le tsuj tej moov aav huv tej plawv kev.”

⁷Tabsis tej nuav tsi lawv le fuabtais xaav, nwg lub sab tsi xaav le ntawd, nwg lub homphaj yog xaav ua kuas puamtsuaj xwb, hab txav txhua tsaav tuabneeg kuas tu kev nrho.

⁸Nwg khaav has tas, “Tsi yog kuv cov thawj tubrog txhua tug puavleej yog vaajntxwv huv tuabsi los?

⁹Kuv txeeb tau lub nroog Kanaus hab lub nroog Kakhemis, lub nroog Hamas hab lub nroog Alepas. Kuv txeeb tau lub nroog Xamalis hab lub nroog Damaxes huv tuabsi.

¹⁰Kuv txhais teg rau txim rua cov tebchaws kws pe mlom, cov mlom ntawd tseem ntau tshaaj cov kws nyob huv lub nroog Yeluxalees hab lub nroog Xamalis.

¹¹Kuv tub ua rua lub nroog Xamalis hab tej mlom kws nyob huv raug puamtsuaj taag huv tuabsi lawm, kuv yuav ua ib yaam le ntawd rua lub nroog Yeluxalees hab cov mlom kws nyob huv kuas puamtsuaj hab.”

¹²Tabsis tug Tswv has tas, “Thaus kuv ua kuv tej num sau Roob Xi-oos hab huv lub nroog Yeluxalees taag lawm, kuv yuav rau txim rua tug fuabtais kws kaav tebchaws Axilias, vim nwg txujkev khaavtheeb.”

¹³Tug fuabtais kws kaav tebchaws Axilias khaav has tas, “Tej num nuav yog kuv tuab leeg ua tav xwb. Kuv muaj zug, muaj tswvyim hab ntse heev. Kuv naam lwm tsaav tuabneeg tej nrim dlej nrim aav hab txhaav puab tej nyaj txag nqaa lug. Kuv zoo le tug txiv nyuj kws nrau cov tuabneeg kws nyob sau tej zwmtxwv kuas poob taag.

¹⁴Txhua tsaav tuabneeg kws nyob huv nplajteb nuav zoo ib yaam le tej zeg noog, kuv muab puab tej nyaj txag yoojyim ib yaam le kuv muab tej qai noog; tsi muaj ib tug twg ntxuaj tis kuas kuv ntshai hab tsi muaj ib tug twg qheb qhovncauj nthe kuv.”

¹⁵Tug TSWV has tas, “Raab taus muaj peevxwm tsaav tau fwjchim luj dlua tug kws siv raab taus los? Raab kaw tseemceeb dlua tug kws siv raab kaw los? Raab qws nqaa tsi taug tug tuabneeg kws siv raab qws? Tsuas yog tug tuabneeg kws siv raab qws txhaj nqaa taug raab qws xwb.”

¹⁶Tug TSWV kws muaj Fwjchim Luj kawg nkaus yuav tso kaab mob lug rau txim rua cov tuabneeg kws puab txaav kuas puab rog rog. Huv puab lub nrog cev yuav kub ib yaam le suavtawg hlawv.

¹⁷Vaajtswv yog cov Yixalayees lub teeb kws ci pum kev, nwg yog lub cubtawg ntawd ntaag. Cov Yixalayees tug Vaajtswv kws dlawbhuv yuav ua tug nplaim tawg, nub ntawd yuav kub txhua yaam, txawm yog tej maab xuavpaug hab tej ntoo xuavpaug los yuav kub nyab taag huv tuabsi.

¹⁸Tug TSWV yuav muab nwg tej haav zoov hab nwg tej teb ua kuas puamtsuaj taag, tsi has tug ntsujplig hab lub cev, yuav zoo ib yaam le tej kaab mob phem lug raug cov tuabneeg ntawd kuas puamtsuaj ntaag.

¹⁹Huv lub haav zoov ntawd tsuas tshuav tsob puav ntoo lawm xwb, txawm yog tej mivnyuas yau los yeej suav txheeb.

²⁰Nub ntawd cov Yixalayees kws seem yuav tsi vaamkhom lub tebchaws kws muab puab ua puamtsuaj ntawd. Tabsis puab yuav muab sab npuab tug TSWV kws yog cov Yixalayees tug Vaajtswv kws dlawbhuv, tug ncaaj nceeg hab tug tseeb.

²¹Cov Yixalayees kws seem, yuav rov lug cuag puab tug Vaajtswv kws muaj fwjchim luj kawg nkaus.

²²Txawm yog cov Yixalayees coob npaum le tej xuabzeb ntawm ntug havtxwv los cov kws tau rov lug muaj tsawg kawg le. Kev txav txim yeej muaj teem tseg rua tuabneeg lawm, hab yeej tsimnyog puab raug kawg le.

²³Tug TSWV tug kws muaj Fwjchim Luj kawg nkaus yuav tso kev puamtsuaj lug rua huv lub nplajteb nuav lawv le nwg has tseg lawm.

²⁴Tug TSWV kws muaj Fwjchim Luj kawg nkaus has tas, “Kuv tsaav tuabneeg kws nyob huv lub nroog Xi-oos, mej tsi xob ntshai cov Axilias thaus puab nqaa qws hab nqaa nplawm tuaj ntaus mej, ib yaam le cov Iziv tau ua rua mej.

²⁵Kuv txujkev chim kws rau txim rua mej tub yuav dlhau, kuv txujkev chim yuav ua kuas puab raug kev puamtsuaj.

²⁶Kuv yog tug TSWV kws muaj fwjchim luj kawg nkaus, kuv yuav muab kuv tug nplawm ntaus puab ib yaam le kuv ntaus cov Midias ntawm lub Pobzeb Aules, hab kuv tsaa kuv tug nplawm rua sau cov dlej havtxwv, ib yaam le kuv ua rua cov Iziv.

²⁷Nub ntawd, kuv yuav tso kuas mej dlim ntawm cov Axilias, puab lub nraa nyaav yuav nplaam sau mej xubpwg, hab puab tug quabtwg ntawm mej cejdlaab yuav luv.”

²⁸Cov tubrog Axilias tau moog txeeb lub nroog A-is; puab tuaj dlhau lub nroog Minkaloos, puab txhaj muab puab tej khoom coj tuaj tso rua huv lub nroog Mikamas.

²⁹Puab hlaa dlhau plawg lub kwj haa rua saab tid, hab puab pw ib mos huv lub nroog Nkenpas! Cov pejxeem kws nyob huv lub nroog Lamas ntshai heev, hab cov tuabneeg kws nyob huv Vaajntxwv Xa-ules lub zog Nkinpe-as tsiv taag lawm.

³⁰Cov tuabneeg Nkalees, ca le quaj los mas! Cov tuabneeg La-isas, ca le noog! Cov tuabneeg Anathaus, ca le teb nwg!

³¹Cov tuabneeg Mamenas taabtom tsiv, hab cov tuabneeg Nkenpas yuavtsum tsiv tag kuas dlim.

³²Nub nua yeebncuab tub tuaj puv taag rua huv lub nroog Naunpas lawm, hab puab yuav yog nrig rua lub Roob Xi-oos kws nyob huv lub nroog Yeluxalees.

³³Tug TSWV kws muaj Fwjchim Luj kawg nkaus yuav muab puab txu kuas poob ib yaam le txu tej ceg ntoo. Puab txujkev khaavtheeb hab tsaav fwjchim kws sab heev yuav raug muab ntuv kuas qaug hab poob tsim.

³⁴Tug TSWV yuav muab taus ntuv puab ib yaam le ntuv ntoo huv plawv zoov, txawm yog tej ntoo kws zoo heev peg Roob Lenpanoos los yeej yuav qaug taag tuabsi!