Read Hmong Njua Yaxayas 11 Bible Online

Yaxayas 11 - Hmong Njua bible

Yaxayas 11

¹Daviv caajceg zoo ib yaam le tsob ntoo kws tub muab ntuv lawm; tabsis lub hauvpaug rov hlaav dlua ib tug ntsuag tshab. Yog le ntawd, tug vaajntxwv tshab yuav sawv huv Daviv cov xeebntxwv lug.

²Vaajtswv tug ntsujplig yuav pub kuas nwg muaj tswvyim, muaj kev txawj ntse hab paub tswj nwg tsaav tuabneeg. Nwg yuav paub tug TSWV lub sab nyam hab fwm tug TSWV,

³hab nwg nyob kaaj sab lug vim nwg noog Vaajtswv lug. Nwg yuav tsi txav txim lawv le nwg lub qhovmuag pum lossis nwg lub qhovntsej nov,

⁴nwg yuav txav txim ncaaj nceeg rua cov tuabneeg pluag, hab tsaa cov tuabneeg kws tsi muaj leejtwg paab txuj cai. Nwg lu lug has zoo yaam le raab qws kws ntaus lub nplajteb nuav, hab nwg tej paa yuav tua cov tuabneeg sab phem.

⁵Kev ncaaj nceeg yuav ua nwg txuj hlaab sa, hab kev ua sab ncaaj yuav ua pluaj ntaub rua nwg paav dluav.

⁶Maa hab yaaj yuav nyob tau ua ke, tsuv pomtxwv yuav pw nrug mivnyuas tshis. Mivnyuas nyuj hab mivnyuas tsuv ntxhuav yuav noj zaub ua ke, hab tej mivnyuas yau yuav ua cov yug tej tsaj ntawd.

⁷Nyuj hab dlais yuav noj zaub ua ke, mivnyuas nyuj hab mivnyuas dlais yuav pw ua ke; tsuv ntxhuav yuav noj quavnyaab ib yaam le nyuj noj.

⁸Txawm yog tug mivnyuas yau kws tseem noj mig, moog ua si ze ntawm tug naab muaj taug lub qhov los tsi ntshai, hab mivnyuas yau yuav cev teg kov naab los naab tsi tum.

⁹Sau Xi-oos kws yog Vaajtswv lub Roob dlawbhuv yuav tsi muaj kev txhawj kev ntshai lossis kev phem kev qas. Tej tuabneeg thoob nplajteb yuav paub tug TSWV ib yaam le dlej puv nkaus havtxwv.

¹⁰Muaj ib nub Yexais tug Caag yuav sawv ua ib yaam cim tseemceeb rua txhua tsaav tuabneeg pum; puab yuav tuaj sis sau rua huv nwg lub nroog hab hawm nwg.

¹¹Nub ntawd, tug Tswv yuav siv nwg lub fwjchim moog coj nwg tsaav tuabneeg kws tseem tshuav nyob peg tebchaws Axilias hab nyob nraag tebchaws Iziv, huv tebchaws Pathalaus, tebchaws Sudaas, tebchaws Elames, tebchaws Npanpiloos, hab Hamas, hab tej tebchaws kws nyob lawv ntug dlej havtxwv, tej koog povtxwv huv havtxwv rov lug nyob rua huv puab tej qub teb qub chaw dlua.

¹²Tug Tswv yuav ua ib yaam cim qha rua txhua tsaav tuabneeg paub has tas, nwg taabtom sau cov Yixalayees hab cov Yudas kws tau tsiv moog nyob ua saab ua sua rua plaub ceg kaum ntuj lawm, rov qaab lug nyob ua ke dlua.

¹³Cov Yixalayees tej kev khib yuav yaaj taag moog, cov Yudas tej yeebncuab yuav raug txav kuas tu; cov Yixalayees yuav tsi khib cov Yudas ntxiv, hab cov Yudas yuav tsi ua yeebncuab rua cov Yixalayees lawm.

¹⁴Puab yuav sau zog ua ke moog tawmtsaam cov Filitees kws nyob saab nubpoob, hab puab ua ke moog fuab cov tuabneeg kws nyob saab nub tuaj. Puab yuav tua yeej cov Edoos hab cov Mau-am, hab cov Amoos yuav noog puab lug.

¹⁵Tug TSWV yuav ua kuas Havtxwv Xu-es qhuav hab tso khaub zeeg cua ntsawj tug dlej Efalates kuas nqhuab, tsuas tseg xyaa ceg dlej miv xwb, kuas leejtwg los hlaa tau.

¹⁶Yuav muaj ib txuj nam kev luj huv tebchaws Axilias rua nwg tsaav tuabneeg Yixalayees taug rov lug ib yaam le thaus u puab cov yawmkoob rov nraag tebchaws Iziv lug.