Read Hmong Njua Yaxayas 13 Bible Online

Yaxayas 13 - Hmong Njua bible

Yaxayas 13

¹Vaajtswv kuas Amauxes tug tub Yaxayas has cov lug nuav rua lub nroog Npanpiloos.

²Tsaa ib tug chij ntaus rog rua sau lub ncov roob dlo dlo, qw nrov nrov rua cov tubrog; hab cu teg rua puab kuas ca le moog txeem cov numtswv tej roojvaag nroog.

³Tug TSWV txhaj hu nwg cov tubrog kws muaj cuabkaav hab sab tawv tuaj tua npluav rog dlawbhuv hab rau txim rua cov tuabneeg kws nwg chim rua.

⁴Noog cov suab nrov sau roob, yog cov tuabneeg kws coob coob tej suab, ntau tsaav tuabneeg hab ntau lub tebchaws tej suab tuaj sis sau ua ke. Vaajtswv kws yog tug thawj rog, taabtom txhij nwg cov tubrog moog ntaus rog.

⁵Puab tuaj huv tej tebchaws kws nyob dleb tim qaab ntug kawg tuaj. Vim tug TSWV txujkev chim, nwg txhaj lug tawmtsaam tej tebchaws ntawd kuas puamtsuaj taagnrho.

⁶Mej ca le ntsaaj los mas! Nub kws tug TSWV yuav lug tub ze heev lawm, yog nub kws tug muaj Fwjchim Luj kawg nkaus coj kev puamtsuaj lug rua mej.

⁷Txhua tug tuabneeg txhais npaab yuav tsaug leeg, hab txhua tug txivneej yuav qaug zug taag.

⁸Puab yuav ntshai heev hab ib ce mob cuag le tug quaspuj mob plaab yug mivnyuas. Puab ntshai kawg, ib leeg tsaa qhovmuag saib ib leeg, hab puab lub ntsejmuag kub cuag suavtawg txhab, vim puab txujkev txaajmuag.

⁹Nub kws tug TSWV lug, yuav muaj kev nruj tsiv, kev npautawg hab kev chim. Lub nplajteb yuav ua suabpuam taag, hab txhua tug tuabneeg txhum yuav raug kev puamtsuaj.

¹⁰Txhua lub nubqub sau nruab ntug hab tej ntsauv nubqub yuav tsi ci, lub nub los yuav tsaus, hab lub hli los yuav tsi pum kev.

¹¹Tug TSWV has tas, “Kuv yuav tso kev puamtsuaj luj heev lug rua lub nplajteb, hab rau txim rua cov tuabneeg ua phem ua qas vim puab tej kev txhum, rua qhov puab muaj txim. Kuv yuav txu cov tuabneeg khaavtheeb lub fwjchim hab rau txim rua cov tuabneeg sab phem kws ua nruj ua tsiv.

¹²Cov tuabneeg kws seem muaj nqes tshaaj tej tseem kub.

¹³Nub ntawd, kuv kws yog tug TSWV kws muaj Fwjchim Luj kawg nkaus, yuav qha kuv txujkev chim, kuv yuav ua kuas lub ntuj cu ua zug koog, hab cu lub nplajteb kuas txaav tawm ntawm nwg qhov chaw moog.

¹⁴“Cov tuabneeg txawv tebchaws kws nyob huv lub nroog Npanpiloos yuav tsiv rov qaab moog rua huv puab lub tebchaws, ib yaam le tej kauv kws tuabneeg moog lawv tua, hab zoo ib yaam le paab yaaj kws tsi muaj tug tswv saib.

¹⁵Tug kws luas ntsib yuav raug muab no kuas tshaab, hab tug kws luas nteg tau yuav raug muab ntaaj tua kuas tuag.

¹⁶Thaus ntawd puab yuav nrhav tsi muaj kev paab lawm, puab tej mivyuas mog yuav raug luas nplawm kuas tuag taabmeeg puab, puab tej tsev yuav raug luas txeeb, hab puab tej quaspuj yuav raug luas coj moog yuam.”

¹⁷Tug TSWV has tas, “Kuv taabtom tshoov cov Medes sab kuas moog tua lub nroog Npanpiloos. Nyaj los puab tsi quavntsej hab kub los puab yeej tsi ntshaw le.

¹⁸Puab yuav muab neevnti hab xub vug tua cov tub hluas. Puab yuav tsi taabncuab cov mivyuas mog hab tsi hlub tshua cov mivnyuas yau le.

¹⁹Lub nroog Npanpiloos kws zoo nkauj tshaaj plawg tej nroog huv tuabsi; yog lub nroog kws muaj cov tuabneeg khaavtheeb. Tabsis kuv kws yog tug TSWV, yuav hlawv lub nroog Npanpiloos povtseg ib yaam le kuv tub hlawv lub nroog Xaudoos hab lub nroog Kaumaulas lawm!

²⁰Yuav tsi muaj tuabneeg moog nyob rua huv ntxiv lawm. Cov tuabneeg Alav los yuav tsi moog teeb puab tej tsevntaub, hab tej tuabneeg yug yaaj los tsi caab puab tej yaaj moog noj zaub rua huv lawm hab.

²¹Lub nroog ntawd yuav ua qhov chaw rua tej tsaj tom taj suabpuam lug nyob, hab ua chaw rua plaas lug ua zeg. Yuav ua qhov chaw rua noog ntxhuav nyob, sai yuav lug nyob hab tsuj kuas puamtsuaj taag.

²²Tej chaw faajxwm hab tej loog yuav ua chaw rua maa lab hab maa ntsuab nqov ntuj. Npanpiloos lub sijhawm tub lug yuav txug! Nwg lub caij tub yuav dlhau.”