Read Hmong Njua Yaxayas 14 Bible Online

Yaxayas 14 - Hmong Njua bible

Yaxayas 14

¹Tug TSWV hlub hab ncu txug Yakhauj; nwg txhaj rov xaiv tsaav tuabneeg Yixalayees dlua, hab yuav tso puab rov qaab lug nyob huv puab lub tebchaws. Cov tuabneeg txawv tebchaws yuav lug nrug puab nyob.

²Ntau tsaav tuabneeg yuav paab coj cov Yixalayees rov qaab lug rua huv puab lub tebchaws kws tug TSWV muab pub rua puab lawm, hab cov tuabneeg txawv tebchaws yuav ua cov Yixalayees qhev nyob huv lub tebchaws ntawd. Cov tuabneeg kws thaus u nteg cov Yixalayees, nwgnuav cov Yixalayees yuav nteg puab, hab cov Yixalayees yuav tswjfwm cov tuabneeg kws thaus u tsimtxom puab.

³Tug TSWV yuav tso cov Yixalayees dlim ntawm puab tej kev lwj sab, kev txomnyem, hab kev raug luas yuam ua num nyaav.

⁴Thaus tug TSWV ua tej nuav, puab yuav thuam tug vaajntxwv kws kaav lub nroog Npanpiloos has tas: “Tug vaajntxwv kws limham tshaaj plawg tub qaug lawm! Nwg yuav tsi tau tsimtxom leejtwg ntxiv lawm!

⁵Tug TSWV tub muab tug tuabneeg nruj tsiv tug qws hab tug cwj luv povtseg,

⁶vim puab siv puab txujkev chim tsimtxom tej tuabneeg hab tsi tseg txujkev tsimtxom tej tsaav tuabneeg kws puab moog tua yeej le.

⁷Nwgnuav lub nplajteb muaj kev thaajyeeb nyob kaaj sab lug, hab txhua tug yuav hu nkauj zoo sab.

⁸Tej ntoo thuv hab ntoo cab kws nyob peg Roob Lenpanoos zoo sab heev hab has tas, ‘Tug vaajntxwv ntawd qaug lawm, yuav tsi muaj leejtwg tuaj ntuv peb lawm.’

⁹“Tubtuag teb qheb qhovrooj lug tog tug vaajntxwv kws kaav lub nroog Npanpiloos. Cov muaj fwjchim thaus u kws kaav lub nplajteb nuav tej plig sawv zum zawg tuaj tog koj thaus koj lug. Cov vaajntxwv ntawd tej plig tawm zum zawg sau puab tej zwmtxwv.

¹⁰Puab yuav has rua nwg tas, ‘Nwgnuav koj los yeej tsaug muas hab zoo ib yaam le peb lawm xwb.

¹¹Koj ibtxwm ntaus nkauj nogncaas qhuas koj, tabsis nwgnuav koj lug nyob huv tubtuag teb nuav lawm; koj pw sau lub txaaj kws muaj kaas ua koj dlaim choj pua hab dlaim choj vuv.’ ”

¹²Tug vaajntxwv kws kaav Npanpiloos, koj yog lub nubqub kws ci thaus yuav kaaj ntug, koj tau poob sau ntuj lug lawm! Yaav taag lug koj tua yeej ntau tsaav tuabneeg, tabsis nwgnuav koj tub raug muab pov rua huv aav lawm.

¹³Koj xaav has tas, koj yuav nce moog sau ntuj hab coj koj lub zwmtxwv moog teeb rua sau Vaajtswv tej nubqub kws sab tshaaj plawg. Koj xaav has tas koj yuav moog nyob le tug vaajtswv rua sau lub roob ntawd saab qaumteb, qhov chaw kws tej vaajtswv tuaj sis sau ua ke.

¹⁴Koj has tas, koj yuav nce moog sau cov fuab hab ua ib yaam le Vaajtswv tug kws muaj Fwjchim Luj kawg nkaus.

¹⁵Tabsis koj yuav raug luas muab coj moog pov rua huv tubtuag teb lub qhov kws tub tshaaj plawg.

¹⁶Cov tuabneeg tuag kws pum koj tuaj, yuav tsaa qhovmuag saib koj. Puab yuav nug has tas, “Tug txivneej nuav puas yog tug kws cu lub nplajteb hab txhua lub tebchaws ua zug koog?

¹⁷Tug txivneej nuav puas yog tug kws ua rua ntau lub nroog raug puamtsuaj hab muab lub nplajteb ntxeev ua suabpuam taag lawm? Tug txivneej nuav puas yog tug kws tsi tso nwg cov tuabneeg raug txim moog tsev le?”

¹⁸Taagnrho tej vaajntxwv ntawm txhua tsaav tuabneeg, nyag yuav pw huv nyag lub qhov ntxaa,

¹⁹tabsis koj tsi muaj qhov ntxaa, hab muab koj lub cev povtseg lwj tsug rua saab nrau. Tej tubrog kws tuag rua huv tshaav rog tej cev tsuam koj lub cev sis xyaw rua huv lub qhov pobzeb hab muab txhub rua.

²⁰Rua qhov koj muab koj lub tebchaws ua puamtsuaj taag hab koj tua koj tsaav tuabneeg, yuav tsi muaj leejtwg muab koj coj moog faus le lwm tug vaajntxwv. Yuav tsi pub koj tsev tuabneeg kws ua phem ib tug seem hlo le.

²¹Npaaj qhov chaw coj nwg cov tub moog tua, vim tej kev txhum kws puab cov yawmkoob tau ua lug lawm, tsi xob pub puab tau kaav lub nplajteb nuav hab tsim tej nroog kuas puv nplajteb hlo le.

²²Tug TSWV kws muaj Fwjchim Luj kawg nkaus has tas, “Kuv yuav ua rua lub nroog Npanpiloos kuas puamtsuaj taag. Kuv tsi tseg ib yaam dlaabtsi hlo le, mivnyuas yau los tsi tseg ca, tsi pub kuas muaj ib tug seem. Kuv yog tug TSWV kws has tej lug nuav ntaag.

²³Kuv yuav muab lub nroog Npanpiloos ntxeev ua haav av, hab ua chaw rua plaas nyob. Kuv yuav muab raab qws rhuab kws yog kev puamtsuaj cheb lub nroog Npanpiloos hab txhua yaam moog povtseg. Kuv yog tug TSWV kws has tej lug nuav ntaag.”

²⁴Tug TSWV kws muaj Fwjchim Luj kawg nkaus coglug has tas, “Kuv tau kom tseg le caag lawm, kuv yuav ua lawv le ntawd. Kuv tau npaaj sab le caag, kuv yuav ua kuas tav le ntawd.

²⁵Kuv yuav muab cov Axilias ua kuas puamtsuaj taag rua huv kuv lub tebchaws kws cov Yixalayees nyob, hab muab puab log rua sau kuv tej hauv roob. Kuv yuav tso kuas kuv tsaav tuabneeg dlim ntawm cov Axilias tug quabtwg hab kuas dlim ntawm tej kev nyuaj sab kws puab raug.

²⁶Ntawm nuav yog kuv lub homphaj rua lub nplajteb, hab kuv tsaa kuv txhais teg moog rau txim rua ntau tsaav tuabneeg.”

²⁷Tug TSWV kws muaj Fwjchim Luj kawg nkaus npaaj sab ua le nuav: nwg tsaa nwg txhais teg rau txim, hab tsi muaj leejtwg cheem tau nwg.

²⁸Xyoo kws Vaajntxwv Ahas tuag, muaj ib tsaab xuv tuaj has le nuav:

²⁹Cov tuabneeg Filitees, tug nplawm kws nplawm mej luv lawm, tabsis mej tsi xob rawm zoo sab. Thaus ib tug naab tuag lawm, muaj dlua lwm tug kws nyaum tshaaj lug hloov tug ntawd chaw. Lub qai naab dlaug tau ib tug zaaj kws yaa tau.

³⁰Tug TSWV yuav ua tug tswv yug yaaj rua cov tuabneeg txomnyem kws yog nwg tsaav tuabneeg hab yuav ca puab nyob kaaj sab lug. Tabsis nwg yuav tso kev tshaib nqhes lug rua cov Filitees, hab yuav tsi pub kuas ib tug muaj sa nyob le.

³¹Cov Filitees tej nroog, ca le quaj qw thov kev paab los mas! Mej ca le ntshai! Yuav muaj paa nchu auv nab saab peg qaumteb tuaj, ua rua cov tubrog tsi muaj ib tug sab tawv tiv tau hlo le.

³²Peb yuav teb cov Filitees tsaab xuv kws puab has tuaj rua peb le caag? Peb yuav teb rua puab has tas, “Vaajtswv yog tug txhim khu lub roob Xi-oos, kuas nwg tsaav tuabneeg kws raug kev txomnyem txhaj tau chaw cawm sav.”