Read Hmong Njua Yaxayas 15 Bible Online

Yaxayas 15 - Hmong Njua bible

Yaxayas 15

¹Ntawm nuav yog cov lug kws has txug lub tebchaws Mau-am. Ib mos xwb lub nroog Ales hab lub nroog Kis raug kev puamtsuaj taag, hab lub tebchaws nyob ntsag tu.

²Cov tuabneeg huv lub nroog Dinpoos nce moog quaj huv puab tej tsev teev dlaab sau tej ncov roob. Cov Mau-am kws nyob thoob plawg lub nroog Nenpus hab Medinpas quaj tu sab nrho, muab puab tej plaubhau hab tej fwjtxwv chais povtseg.

³Tej tuabneeg puavleej npua ntaub tsaaj moog nyob tom tej kev; cov tuabneeg moog quaj nyav huv plawv nroog hab sau tej ruv tsev.

⁴Cov tuabneeg huv lub nroog Hesenpoos hab Ele-ales tsaa suab hlo quaj, puab tej suab quaj nrov moog txug tim Yahaxes. Tub yog vim le nuav cov tubrog txhaj ntshai tshee nyo, hab puab zug ntaug taag huv tuabsi.

⁵Kuv lub sab quaj dlhi rua lub tebchaws Mau-am! Cov tuabneeg tawg tsiv moog rua huv lub nroog Xau-as, hab moog rua huv lub nroog Elas Selesiyas. Muaj qee leej quaj taug kev nce moog rua peg lub nroog Luhithas, muaj qee leej taug kev tsiv moog rua huv lub nroog Haulauna-ees, puab quaj nrov heev rua puab tej kev pemsij ntawd.

⁶Tug Dlej Nimilees nqhuab lawm, tej nyom kws tuaj ntawm ob saab ntug dlej tuag taag, hab tsi tshuav ib yaam nroj tsuag dlaabtsi tseem ntsuab nyob qhov twg le.

⁷Cov tuabneeg nrhav kev coj puab tej khoom kws seem tsiv moog hlaa lub Haav Vilaus.

⁸Tej suab quaj nrov thoob plawg tebchaws Mau-am. Nyob huv lub nroog Ela-ees hab Npe-elimes los yeej nov tej suab quaj huv tuabsi.

⁹Tug dlej huv lub nroog Dinpoos tsuas pum ntshaav lab ploog. Tsi taag le ntawd xwb, Vaajtswv tseem muab tej yaam kws phem tshaaj plawg, tsub ntxiv rua cov tuabneeg kws nyob huv hab. Cov tuabneeg Mau-am kws tsiv dlim hab cov kws seem nyob huv lub tebchaws, puavleej raug tsuv ntxhuav tum tuag taag.