Read Hmong Njua Yaxayas 16 Bible Online

Yaxayas 16 - Hmong Njua bible

Yaxayas 16

¹Cov Mau-am tso tuabneeg caab ib tug mivnyuas yaaj huv lub nroog Xelas taug txujkev huv taj suabpuam tuaj rua sau lub roob Xi-oos, ua khoom pub rua tug nom kaav lub tebchaws kws nyob huv lub nroog Yeluxalees.

²Mau-am cov ntxhais moog sawv ntawm ntug Dlej Alenoos tog hlaa dlej, hab moog moog lug lug ib yaam le tej mivnyuas noog kws muab tshem tawm ntawm lub zeg.

³Puab has rua cov Yudas has tas, “Thov qha saib peb yuav ua le caag. Thov mej tsomkwm peb ib yaam le tug ntoo kws ua dluab ntxoov ntxoo txag zag thaus taav su, hab thov ca peb su huv mej tug dluab ntxoov ntxoo. Peb yog tuabneeg tawg rog; thov muab peb zais rua ntawm qhov chaw kws tsi muaj leejtwg tuaj nrhav tau hlo le.

⁴Thov ca peb nyob huv mej lub tebchaws, hab tsomkwm kuas peb dlim ntawm cov tuabneeg kws nrhav peb tua.” (Cov tuabneeg limham tub yuav dlhau moog, kev puamtsuaj tub yuav kawg, hab cov tuabneeg kws tsim kev kub ntxhuv rua lub tebchaws kuas puamtsuaj tub yuav pluj moog.

⁵Ces yuav tsaa Daviv ib tug xeebntxwv ua vaajntxwv, nwg yuav tswjfwm tsoom pejxeem ntawm lub sab ncaaj nceeg hab kev hlub. Nwg nrhav txujkev ncaaj nceeg hab maaj ceev nrooj ua kuas txujkev ncaaj nceeg ntawd tav.)

⁶Cov Yudas teb has tas, “Peb tub nov has tas cov Mau-am yog cov tuabneeg khaavtheeb. Peb paub puab yog tuabneeg khaavtheeb hab muaj plhus, tabsis puab tej lug khaavtheeb tsi muaj qaabhau le.”

⁷Cov tuabneeg Mau-am yuav quaj vim tej kev txomnyem kws puab raug ntawd. Puab txhua tug yuav quaj heev thaus puab ncu txug tej zaub mov qaab kws puab noj huv lub nroog Kis Heles. Yuav muab puab lawv tawm tsiv kuas pluj qaab ndlais.

⁸Tej teb kws nyob ze lub nroog Hesenpoos hab cov Xinpemas tej vaaj txiv maab raug puamtsuaj taag. Cov txiv maab ntawd yog cov kws luas dle lug ua cawv rua ntau tsaav tuabneeg haus. Muaj ib zag cov txiv maab ntawd hlaav moog dleb heev, moog txug ndlua ntawm lub nroog Yaxes saab nubtuaj hlaav moog txug ndlua taj suabpuam hab saab nubpoob, hab hlaav moog txug dlua ntawm Havtxwv Tuag saab tim u.

⁹Yog le ntawd, kuv txhaj quaj rua cov Xinpemas cov txiv maab ib yaam le kuv quaj rua cov tuabneeg Yaxes. Kuv tej kua muag poob rua lub nroog Hesenpoos hab Ele-ales, vim muaj kev sis ntaus sis tua qw ntshu nrooj lug raug mej tej qoobloo hab tej nplej kws mej tub sau tau lawm.

¹⁰Nwgnuav tsi muaj leejtwg zoo sab rua tej teb kws zoo qoobloo. Tsi muaj leejtwg qw lossis hu nkauj huv tej vaaj txiv maab. Tsi muaj leejtwg tsuam tej txiv maab ua cawv; tej suab qw zoo sab los ntsag taag lawm.

¹¹Kuv seev tu sab nrho rua lub tebchaws Mau-am, hab lub nroog Kis Heles.

¹²Thaus cov Mau-am pluav qaug quas zig nce moog rua sau lub roob kws yog qhov chaw puab teev dlaab, hab thaus puab moog txug rua huv lub tsev teev dlaab, puab thov los tsi tau dlaabtsi.

¹³Tej ntawm yog tug TSWV cov lug kws tub has rua cov Mau-am ntxuv lug lawm.

¹⁴Tabsis nwgnuav tug TSWV has tas, “Tshuav peb xyoos lawm xwb. Cov Mau-am lub meejmom yuav poob moog. Feem coob yuav puamtsuaj, tsuas tshuav qee leej seem nyob lawm xwb, puab yuav qaug zug kawg le.”