Read Hmong Njua Yaxayas 17 Bible Online

Yaxayas 17 - Hmong Njua bible

Yaxayas 17

¹Tug TSWV has tas, “Damaxes yuav tsi tau ua ib lub nroog ntxiv lawm; nwg yuav puamtsuaj taag ua ib pawg.

²Cov Xilias tej nroog yuav ua suabpuam moog ibtxhis le. Tej nroog ntawd yuav ua tshaav zaub rua yaaj hab nyuj noj, hab tsi muaj leejtwg yuav lawv tau tej tsaj ntawd tawm tsiv.

³Cov Yixalayees tej chaw faajxwm kws txhim pobzeb zoo heev yuav pob puag taag hab lub nroog Damaxes yuav poob fwjchim. Cov Xilias los yuav poob ntsejmuag ib yaam le cov Yixalayees. Kuv yog tug TSWV kws muaj Fwjchim Luj kawg nkaus, kuv has cov lug nuav ntaag.”

⁴Tug TSWV has tas, “Nub ntawd cov Yixalayees lub fwjchim yuav raug muab txu kuas qeg, hab kev pluag yuav lug hloov puab kev npluanuj.

⁵Cov Yixalayees lub tebchaws yuav zoo ib yaam le thaaj teb kws tub hlais nplej hab sau qoob taag hab zoo ib yaam le dlaim teb huv lub Haav Lefayees thaus kws tuabneeg muab tej qoobloo sau taag lawm.

⁶Cov Yixalayees qee leej txhaj yuav dlim xwb, puab yuav zoo ib yaam le tsob txiv ntoo roj kws luas muab tej txiv dle taag tshuav ob peb lub txiv nyob sau ntsis lossis seem lub puav txiv nyob rua huv tej ceg kws qeg xwb. Kuv yog tug TSWV kws yog cov Yixalayees tug Vaajtswv, kuv has tej lug nuav ntaag.”

⁷Nub ntawd tej tuabneeg yuav tig rov lug cuag tug kws tsim puab, kuas paab puab, nwg yog cov Yixalayees tug Vaajtswv kws dlawbhuv.

⁸Puab yuav tsi mob sab rua tej thaaj kws puab txua tau ntawm puab teg lossis tsi ca sab rua tej kws puab txhais teg txua, tsi has tej mlom quaspuj Aselas hab tej thaaj hlawv moov tshuaj tsw qaab hlo le.

⁹Nub ntawd tej nroog kws muaj ntsaa yeej thaiv yuav raug muab rhuav kuas puamtsuaj ib yaam le cov Hivis hab cov Amaules tsiv cov Yixalayees hab muab puab tej nroog tso tseg ntaag.

¹⁰Cov Yixalayees, mej muab Vaajtswv kws yog mej tug cawmseej hab tug tiv thaiv mej ib yaam le phaab zeb tso tseg lawm. Mej tau moog xov tej vaaj tseemceeb kuas tau chaw pehawm cov tuabneeg txawv tebchaws tej vaajtswv.

¹¹Txawm yog tej noob ntawd tuaj mog nyoos hab tawg paaj kag taagkig sawv ntxuv kws mej cog ntawd los mej yuav tsi tau sau le. Nub ntawd tsuas muaj kev txomnyem hab kev mob nkaus xwb.

¹²Ntau tsaav tuabneeg tej suab quaj nrov ntsoog qeeg cuag le dlej havtxwv ndlaas, cov tuabneeg tej suab quaj suab qw nrov ntsoog qeeg cuag le dlej ntsawj.

¹³Ntau tsaav tuabneeg sawv lug ua suab nrov ntsoog qeeg cuag le dlej ndlaas, tabsis Vaajtswv tshev puab hab lawv puab tsiv moog dleb kawg le lawm, nwg muab puab lawv tsiv ib yaam le cua ntsawj tej moov aav sau roob, hab ib yaam le khaub zeeg cua ntsawj tej quavnyaab yaa ri quas nab.

¹⁴Thaus tsaus ntuj puab moog tsim kev kub ntxhuv, tabsis thaus kaaj ntug tsi muaj puab lawm. Tej ntawd yog nqe zug rua txhua tug kws tuaj fuab peb lub tebchaws.