Read Hmong Njua Yaxayas 18 Bible Online

Yaxayas 18 - Hmong Njua bible

Yaxayas 18

¹Tsuas nov tej suab tis ntxuaj nrov tim lub tebchaws kws nyob ntawm tug ntug Dlej Sudaas

²kws yog cov numtswv tsaav cov nkoj kws muab tej lojkov ua, tawm huv lub tebchaws taug tug dlej Niles tuaj. Mej cov tuabneeg xaa xuv kws dlha ceev heev, mej ca le moog rua huv lub tebchaws kws muaj cov tuabneeg luj hab nqaj tawv mog nyoos, moog rua ntawm tsaav tuabneeg kws nyob dleb hab nyob ze los luas ntshai, hab moog rua ntawm tsaav tuabneeg kws muaj fwjchim hab muaj zug heev kws muaj dlej quas puab lub tebchaws lawm.

³Txhua tug kws nyob huv nplajteb nuav ca le noog! Tsaa qhovmuag saib tug chij kws yuav tsaa rua sau hauv roob! Hab thaus nov luas tshuab raaj tshuab xyu, ca le noog!

⁴Tug TSWV has rua kuv tas, “Kuv yuav nyob sau ntuj nuav saib tuaj, ib yaam le ntsu lwg thaus mo ntuj lub caij ntuj tsaug kws sau qoobloo, hab ib yaam le tshaav tuaj zab thaus nruab nub.

⁵Ua ntej sau qoobloo, thaus kws tej paaj txiv maab zeeg hab tej txiv maab pib sav, yeebncuab yuav tuaj tua cov Sudaas yoojyim ib yaam le muab rag txav tej ceg txiv maab.

⁶Luas yuav muab puab cov tubrog kws tuag lawm tso tseg rua tej tsaj qus hab noog noj. Lub caij ntuj qhua noog yuav tau noj puab, hab lub caij ntuj no tej tsaj yuav tau noj puab.”

⁷Thaus txug lub sijhawm ntawd, tug TSWV kws muaj Fwjchim Luj kawg nkaus yuav tau txais tej khoom fij kws luas coj tim lub tebchaws kws muaj dlej quas nruab nraab tuaj pub rua nwg. Tsaav tuabneeg ntawd yog tsaav tuabneeg kws muaj zug hab muaj fwjchim heev. Puab luj sab hab nqaj tawv mog nyoos, tej tuabneeg kws nyob dleb hab ze los puavleej ntshai puab. Puab yuav tuaj rua sau Roob Xi-oos, qhov chaw kws pehawm tug TSWV kws muaj Fwjchim Luj kawg nkaus.