Read Hmong Njua Yaxayas 19 Bible Online

Yaxayas 19 - Hmong Njua bible

Yaxayas 19

¹Ntawm nuav yog cov lug kws has txug lub tebchaws Iziv. Saib lauj, tug TSWV caij rawv ib tauv fuab ceev heev nqeg lug rua huv lub tebchaws Iziv lawm. Cov tuabneeg Iziv tej mlom yuav raug tsuj taabmeeg ntawm nwg xubndlag, puab poob sab hab zug ntaug taag.

²Tug TSWV has tas, “Kuv yuav tshoov cov Iziv sab kuas puab tej kwvtij sawv tawmtsaam tej kwvtij, zej zog yuav sawv tawmtsaam zej zog, ib lub nroog yuav sawv tawmtsaam ib lub nroog, hab ib lub tebchaws yuav sawv tawmtsaam ib lub tebchaws.

³Kuv yuav ua kuas cov Iziv tej tswvyim pluj taag, hab ua kuas puab tej kev xaav puamtsuaj. Puab yuav moog thov puab tej mlom paab puab, moog saib yaig hab moog thov cov tuabneeg kws tuag lawm tej ntsujplig paab puab.

⁴Kuv yuav muab cov Iziv cob rua tug nom kws sab tawv heev txhais teg, hab tsaa tug vaajntxwv kws nruj tsiv tshaaj plawg kaav puab. Kuv yog tug TSWV kws muaj Fwjchim Luj kawg nkaus, kuv has tej lug nuav ntaag.”

⁵Tug dlej Niles yuav nqhuab, hab tug nam dlej yuav tu.

⁶Tej kwj dleg yuav tsw lwj ntxag, hab cov dlej huv tebchaws Iziv kws ndlwg lug tshuam tug dlej Niles yuav tu hab nqhuab taag. Tej lojkov hab kavtheej los yuav qhuav nkig nkuav,

⁷tej nroj tsuag kws tuaj ntawm ob saab ntug dlej Niles, hab tej qoobloo kws cog lawv ob saab ntug dlej los yuav qhuav nkig nkuav hab cua yuav muab ntsawj yaa taag.

⁸Cov kws nrhav noj yug nwg lub neej kws yog nuv ntseg hab muab vaag ntaus ntseg huv tug dlej Niles, yuav tu sab hab quaj; puab yuav tsi siv puab tej nuv hab tej vaag ntxiv lawm.

⁹Cov tuabneeg ntsis paaj los yuav pluj, hab cov tuabneeg ntus ntaub los yuav taag kev ca sab;

¹⁰cov tuabneeg ntus ntaub huv lub tebchaws yuav raug caij tsuj, hab cov tuabneeg kws moog nrhav zug yuav tu sab heev.

¹¹Cov thawjcoj huv lub nroog Xau-as, puavleej yog tuabneeg ruag! Falaus cov tuabneeg txawj ntse los tuavxaam ruag kawg le! Mej yuav ua le caag has rua Falaus has tas, “Peb puavleej yog tub txawg tub ntse hab peb yog cov vaajntxwv thaus u tej xeebntxwv?”

¹²Falaus, koj cov tuavxaam kws txawj ntse nyob qhov twg? Ca puab maam le qha rua koj hab ua rua koj paub, saib tug TSWV kws muaj Fwjchim Luj kawg nkaus, muaj homphaj le caag rua lub tebchaws Iziv?

¹³Cov thawjcoj huv lub nroog Xau-as puavleej yog tuabneeg ruag, cov thawjcoj huv lub nroog Meephis raug kev ntxeev ntxag, cov kws ua ncej zeb txheem nwg tsaav tuabneeg, tau coj cov Iziv moog yuam kev taag.

¹⁴Tug TSWV ua kuas puab muab tej lug tuavxaam tsi totaub lug has. Cov Iziv txhaj ua txhua yaam yuam kev hab qaug puj poog ib yaam le tug tuabneeg qaug cawv kws nwg rov tsuj nwg cov ntuav qaug.

¹⁵Tsi muaj ib yaam dlaabtsi kws yuav paab tau lub tebchaws Iziv le, tsi has taubhau lossis kutwv, nplooj toovlaaj lossis tej lojkov.

¹⁶Nub ntawd cov Iziv yuav muaj lub sab muas ib yaam le tej quaspuj. Puab yuav ntshai tshee nyo, thaus puab pum tug TSWV kws muaj Fwjchim Luj kawg nkaus tsaa nwg txhais teg rau txim rua puab.

¹⁷Cov Yudas yuav ua rua cov Iziv ntshai heev; txhua tug kws nov yuav ntshai kawg nkaus, rua qhov tug TSWV kws muaj Fwjchim Luj kawg nkaus npaaj tseg rua puab lawm.

¹⁸Thaus ntawd tsuas tshuav tsib lub nroog huv tebchaws Iziv txhaj has lug Henplais lawm xwb. Cov tuabneeg kws nyob huv yuav tuav tug TSWV kws muaj Fwjchim Luj kawg nkaus lub npe thov. Cov nroog ntawd muaj ib lub yuav hu ua “Lub Nroog Nub.”

¹⁹Nub ntawd yuav muaj ib lub thaaj rua tug TSWV nyob huv tebchaws Iziv, hab muaj ib tug ncej zeb muab fij rua tug TSWV nyob ntawm Iziv tug nrimteb.

²⁰Ob yaam ntawd yuav ua cim hab ua timkhawv rua tug TSWV kws muaj Fwjchim Luj kawg nkaus nyob huv tebchaws Iziv. Thaus puab quaj hu thov txug tug TSWV, vim muaj tuabneeg tuaj tsimtxom puab, tug TSWV txhaj khaiv ib tug lug cawm puab, tsomkwm puab, hab tso puab dlim.

²¹Nub ntawd tug TSWV yuav qha nwg rua cov tuabneeg Iziv paub, puab yuav paub tug TSWV hab pehawm nwg, puab yuav coj khoom hab khoom theej txhoj tuaj fij rua nwg. Puab coglug rua nwg hab ua lawv le tej lug kws puab cog tseg.

²²Tug TSWV yuav rau txim rua cov Iziv, tabsis nwg yuav rov khu kuas puab zoo. Puab yuav tig lug cuag nwg hab nwg yuav noog puab tej lug thov, hab yuav khu kuas puab tej mob zoo.

²³Nub ntawd yuav muaj ib txuj nam kev luj nraag tebchaws Iziv moog txug rua peg tebchaws Axilias. Cov Axilias yuav moog nraag tebchaws Iziv, cov Iziv yuav tuaj peg tebchaws Axilias, hab cov Iziv yuav nrug cov Axilias pehawm Vaajtswv ua ke.

²⁴Nub ntawd cov Yixalayees yuav muaj vaajfuam sis luag ib yaam le cov Iziv hab cov Axilias, hab peb tsaav tuabneeg nuav yuav ua rua tuabneeg nplajteb tau koob moov.

²⁵Tug TSWV kws muaj Fwjchim Luj kawg nkaus yuav foom koob moov rua puab has tas, “Kuv foom koob moov rua cov Iziv kws yog kuv tsaav tuabneeg, cov Axilias kws kuv tsim, hab cov Yixalayees kws kuv xaiv tseg.”