Read Hmong Njua Yaxayas 2 Bible Online

Yaxayas 2 - Hmong Njua bible

Yaxayas 2

¹Tej lug kws Vaajtswv qha rua Amauxes tug tub Yaxayas kuas has rua cov Yudas hab lub nroog Yeluxalees:

²Yaav tom ntej nuav lub roob kws lub Tuamtsev nyob rua sau, yuav sab dlua tej hauv roob txhua lub huv tuabsi, ntau tsaav tuabneeg yuav sau nthwv tuaj rua sau lub roob ntawd.

³Ntau tsaav tuabneeg yuav tuaj hab has tas, “Peb ca le moog sau tug TSWV lub roob, moog kuas txug sau cov Yixalayees tug Vaajtswv lub Tuamtsev. Nwg yuav qha peb tej kws nwg xaav kuas peb ua; peb yuav taug txujkev kws nwg xaiv rua peb taug. Vaajtswv tej lug qhuab qha tawm huv lub nroog Yeluxalees tuaj; hab nwg has lug huv Xi-oos tuaj rua nwg tsaav tuabneeg.”

⁴Nwg yuav ua tug txav txim rua txhua tsaav tuabneeg, puab yuav muab puab tej ntaaj hab rag lug ntaus ua khais, hab muab tej muv ntaus ua lag. Ntau tsaav tuabneeg yuav tsi ua tsuv ua rog hab yuav tsi muaj leejtwg npaaj cuabyeej sis nkaug sis tua ntxiv le lawm.

⁵Yakhauj cov xeebntxwv, nwgnuav peb ca le taug txujkev kaaj nrig kws tug TSWV tub pub rua peb lawm.

⁶Vaajtswv, koj tau muab koj tsaav tuabneeg kws yog Yakhauj cov xeebntxwv tso povtseg lawm; rua qhov puab lub tebchaws puv nkaus cov tuabneeg ua khawvkoob kws tuaj saab nubtuaj tuaj hab tuaj huv tebchaws Filitees tuaj. Puab xyum ua lawv le cov tuabneeg txawv tebchaws ua.

⁷Puab lub tebchaws muaj nyaj muaj kub nplua mag, hab puab tej nyaj txag yeej tsi paub taag ib zag le. Puab lub tebchaws los muaj neeg nyob puv nkaus huv, hab puab ua tsheb neeg tsi paub tso tseg le.

⁸Mlom nyob puv nkaus huv puab lub tebchaws, hab puab pe tej kws puab txhais teg puab.

⁹Puab txhua tug yuav raug txu fwjchim hab poob ntsejmuag. Tug TSWV, thov tsi xob zaam txim rua puab hlo le!

¹⁰Puab yuav tsiv moog nkaum huv tej qhov tsua sau tej roob tsuas, lossis khawb qhov nkaum kuas dlim tug TSWV txujkev chim, hab tsiv nkaum nwg lub fwjchim hab tug tshwjchim kws ci ntsaa ab!

¹¹Nub ntawd cov tuabneeg khaavtheeb yuav raug txu fwjchim hab thaus ntawd cov tuabneeg sab phem yuav raug kev puamtsuaj. Ces Vaajtswv tuab leeg xwb txhaj le yog tug zoo tshaaj plawg.

¹²Nub ntawd tug TSWV kws muaj Fwjchim Luj kawg nkaus yuav muab txhua tug kws muaj fwjchim, txhua tug kws khaavtheeb hab cov tuabneeg kws xaav ua tug luj txu fwjchim kuas taag.

¹³Nwg yuav ua kuas cov ntoo cab peg Roob Lenpanoos hab taagnrho cov ntoo qheb huv tebchaws Npasaas puamtsuaj taag huv tuabsi.

¹⁴Nwg yuav rhuav tshem tej roob sab hab tej hauv roob kuas puamtsuaj,

¹⁵rhuav txhua lub chaw tsomfaaj hab tawmtsaam tej ntsaa yeej kws txhim zeb khov kho;

¹⁶tawmtsaam lub nroog Talasis tej nkoj hab tej nkoj kws zoo nkauj kuas tawg taag.

¹⁷Cov tuabneeg khaavtheeb yuav raug txu kuas qeg hab muab cov tuabneeg nruj tsiv ua kuas puamtsuaj. Nub ntawd tug TSWV tuab leeg yog tug yuav tau ntsejmuag.

¹⁸Hab tej mlom yuav pluj moog taag huv tuabsi.

¹⁹Tej tuabneeg suavdlawg yuav tsiv moog nkaum taag rua huv tej qhov tsua sau tej roob tsuas hab khawb qhov nkaum kuas dlim tug TSWV txujkev chim, hab tsiv nkaum nwg lub fwjchim hab tug tshwjchim kws ci ntsaa ab thaus nwg nqeg lug cu lub nplajteb nuav.

²⁰Nub ntawd, puab yuav muab tej nyaj tej kub, hab tej mlom kws puab puab, coj moog povtseg kuas taag huv tuabsi hab tso tseg rua tsuag hab puav lug ua zeg rua.

²¹Thaus Vaajtswv nqeg lug cu lub nplajteb, tej tuabneeg suavdlawg yuav tsiv moog nkaum huv tej qhov aav hab qhov tsua sau tej roob tsuas, kuas txhaj tsiv dlim nwg txujkev chim, nwg lub fwjchim hab tug tshwjchim kws ci ntsaa ab.

²²Tsi xob tso sab rua cov tuabneeg kws txawj tuag. Puab muaj nqes npaum le caag?