Read Hmong Njua Yaxayas 20 Bible Online

Yaxayas 20 - Hmong Njua bible

Yaxayas 20

¹Xyoo kws Xalenkoos ua vaajntxwv kaav tebchaws Axilias, nwg tau tso ib tug thawj tubrog tuaj tua lub nroog Asedaus hab txeeb tau lub nroog ntawd.

²Lub sijhawm ntawd, tug TSWV has rua Yaxayas kws yog Amauxes tug tub has tas, “Ca le muab cev rig tsho ntaub maag kws koj naav hab muab nkawm khau khab kws koj rau hle tseg.” Yaxayas moog kev labqaab hab tsi rau khau le tug TSWV tau has rua nwg ntawd.

³Thaus lub nroog Asedaus raug luas txeeb tau lawm, tug TSWV has tas, “Kuv tug tubkhai Yaxayas moog kev labqaab hab tsi rau khau tau peb xyoos. Qhov nuav ua lub cim qha has tas, yuav muaj tej xwmtxheej lug raug cov Iziv hab cov Sudaas.

⁴Axilias tug vaajntxwv yuav muab cov Iziv hab cov Sudaas kws nwg nteg tau ntawd hle rig tsho labqaab coj moog ua tuabneeg poob tebchaws. Cov hluas hab cov laug yuav moog kev labqaab pobtw lab vog hab tsi rau khau, ua rua cov Iziv txaajmuag kawg le.

⁵Cov tuabneeg kws ca sab rua cov Sudaas hab khaavtheeb rua cov Iziv yuav thim rov qaab hab txaajmuag heev.

⁶Cov tuabneeg kws nyob ntawm ntug havtxwv kws npuab tebchaws Axilias has tas, ‘Mej sim saib, cov tuabneeg kws peb ca sab rua hab cov tuabneeg kws peb moog cuag kuas coj peb tsiv tawm ntawm cov Axilias tug vaajntxwv, raug luas nteg lawm! Zag nuav peb yuav ua le caag txhaj tsiv dlim?’ ”