Read Hmong Njua Yaxayas 21 Bible Online

Yaxayas 21 - Hmong Njua bible

Yaxayas 21

¹Zaaj lug kws has ntsig txug cov tuabneeg Npanpiloos tej kev puamtsuaj tawm huv lub tebchaws kws txaus ntshai heev tuaj ib yaam le cov khaub zeeg cua ntsawj hlaa taj suabpuam tuaj.

²Tej xwmtxheej phem kws kuv ua ywgtoog pum, cov tuabneeg ntxeev sab tawm moog tsim kev kub ntxhuv hab cov tuabneeg tubsaab tawm moog nyag luas. Cov Elames, ca le tawm moog ua rog los mas! Cov Medias, ca le tawm moog vij luas tej nroog! Kuv yuav ua kuas tej suab quaj suab qw kws yog cov Npanpiloos ua ntawd ntsag moog.

³Thaus kuv ua ywgtoog pum zaaj nuav, kuv ntshai heev hab ua rua kuv mob dluav npaum nkaus le tug quaspuj kws mob plaab yug mivnyuas ntaag.

⁴Kuv taubhau kiv heev, hab kuv ntshai ua ib ce tshee nyo. Kuv tog ib nub tsaus ntuj, tsi muaj dlaabtsi ua rua kuv ca sab, tsuas yog kev txhawj kev ntshai xwb.

⁵Nyob rua huv zaaj ywgtoog ntawd, muaj ib rooj mov kws tub npaaj tav lawm; luas muab cov ntaub tuab nthuav pua rua cov qhua nyob. Thaus puab taabtom noj haus, taamsim ntawd txawm muaj lug saamfwm tuaj has tas, “Cov numtswv, ca le npaaj mej cov thaiv nav ntaaj!”

⁶Tug TSWV has rua kuv tas, “Ca le tso ib tug txivneej moog saib, hab ca nwg qha tej kws nwg pum rua mej.

⁷Yog has tas nwg pum cov txivneej caij neeg, ib nkawg quas ib nkawg, hab cov txivneej kws caij neeg luav hab caij ntxhuav tuaj, mas nwg yuavtsum ua tuab zoo saib kuas tseeb tseeb.”

⁸Tug faajxwm hu lug has tas, “Kuv tug tswv, kuv tau sawv sau qhov chaw faajxwm saib taag nub taag mo.”

⁹Saib maj! cov txivneej kws caij neeg, ib nkawg quas ib nkawg tuaj lawm lauj! Puab teb has tas, “Lub nroog Npanpiloos tub poob lawm! Tej vaajtswv kws puab pe poob rua huv aav hab tawg taag lawm.”

¹⁰Kuv tsaav tuabneeg Yixalayees, mej raug ntaus ib yaam le ntaus nplej, tabsis nwgnuav kuv yuav qha rua mej paub txug tej xuv zoo kws kuv nov lug ntawm tug TSWV kws yog cov Yixalayees tug Vaajtswv kws muaj Fwjchim Luj kawg nkaus.

¹¹Zaaj lug kws has txug lub nroog Edoos. Muaj ib tug tuabneeg hu tom Xe-iles tuaj rua kuv has tas, “Tug faajxwm, tshuav ntev le caag maam kaaj ntug? Qha rua kuv saib thaus twg maam kaaj ntug?”

¹²Kuv teb has tas, “Tub kaaj ntug lawm, tabsis tub yuav rov tsaus ntuj dlua. Yog koj xaav rov nug ntxiv, ca le hu rov tuaj hab nug los tau.”

¹³Zaaj lug kws has txug cov Alavv. Cov tuabneeg Dedaas, mej taug kev tsheej paab lug su rua ntawm cov Alav tej roob mojsaab qhua,

¹⁴muab dlej rua cov tuabneeg kws tuaj nrhav dlej ntawm mej haus. Mej cov tuabneeg kws nyob huv tebchaws Temas, muab zaub mov rua cov tuabneeg tawg rog noj.

¹⁵Vim puab tsiv ntawm tej nav ntaaj nav rag kws yuav tua puab, hab tsiv ntawm tej neevnti kws ntaa tog yuav tua puab, hab ntawm tej kev tsuv kev rog.

¹⁶Tug TSWV has rua kuv tas, “Tshuav ib xyoos ib yaam le luas ndlav tub zug lawm xwb, mas cov Kedas lub meejmom kws luj yuav dlhau moog.

¹⁷Cov Kedas kws txawj tua neevnti hab sab tawv, tsuas tshuav qee leej seem lawm xwb. Kuv yog tug TSWV kws yog cov Yixalayees tug Vaajtswv, kuv has tej lug nuav.”