Read Hmong Njua Yaxayas 22 Bible Online

Yaxayas 22 - Hmong Njua bible

Yaxayas 22

¹Ntawm nuav yog cov lug kws has rua lub Haav Ywgtoog. Muaj xwmtxheej dlaabtsi? Vim le caag cov tuabneeg huv lub nroog nce taagnrho moog rua sau ruv tsev?

²Lub nroog kws puv nkaus tej suab luag ua nqaaj ua nqug, hab tej suab lomzem zoo sab. Mej cov tuabneeg kws tuag, tsi yog tuag rua nav ntaaj nav rag lossis tuag rua huv tshaav rog.

³Mej cov thawjcoj tau tsiv tawm hab tsi raug tua ib nee le; puab puavleej raug nteg. Txawm yog puab tsiv dleb lawm los, puab tseem raug nteg coj lug rau txim.

⁴Yog le ntawd kuv txhaj has tas, “Tsi xob quavntsej kuv; ca kuv quaj rua txujkev lwj sab kws kuv tsaav tuabneeg tuag taag lawm. Tsi xob tuaj nplig kuv sab le.”

⁵Tug TSWV kws muaj Fwjchim Luj kawg nkaus tau teem ib nub tseg, tso tej kev mob kev nkeeg, kev swb hab kev ntxuv sab lug rua peb huv lub Haav Ywgtoog. Tej ntsaa yeej kws thaiv peb lub nroog tau qaug tawg taag hab tej suab quaj thov paab nrov ntxhe moog thoob plawg peg tej ncov roob.

⁶Cov tubrog caij neeg huv tebchaws Elames tuaj, puab khuam rawv neevnti hab xub vug. Cov tubrog kws tuaj huv tebchaws Kis tuaj, npaaj rawv puab tej thaiv nav ntaaj.

⁷Tsheb neeg yuav nyob puv nkaus rua huv cov haav kws aav zoo heev huv tebchaws Yudas, hab cov tubrog caij neeg tuaj sawv tsheej paab ntawm lub nroog Yeluxalees tej roojvaag.

⁸Tug TSWV tau muab tej cuabyeej tiv thaiv cov Yudas tshem povtseg lawm. Nub kws muaj tej xwmtxheej nuav, mej yuav moog nrhav tej cuabyeej ntawd huv lub Tsev Haav Zoov,

⁹mas mej pum tug ntsaa yeej kws thaiv Daviv lub Nroog hab lub paag dlej kws mej tauv rua ntawm Theem Qeg tawg ntau qhov,

¹⁰mej suav cov tsev huv lub nroog Yeluxalees, hab mej muab cov tsev ntawd tsoo yuav tej pobzeb moog txhim tug ntsaa yeej kws tawg ntawd.

¹¹Mej ua tau ib lub rhawv rua ntawm ob tug ntsaa yeej kis nruab nraab ntim cov dlej kws ndlwg huv lub qub paag dlej lug. Tabsis mej tsi tig qhovntsej noog Vaajtswv tug kws npaaj tej nuav, hab ua kuas muaj tej nuav thaus u lug tej lug hlo le.

¹²Nub ntawd tug TSWV kws muaj Fwjchim Luj kawg nkaus has kuas mej quaj hab nyav, chais mej tej plaubhau hab naav ntaub tsaaj.

¹³Tabsis mej tseem zoo sab hab khaav, mej tua nyuj hab tua yaaj lug noj, hab muab cawv txiv maab lug haus. Mej has tas, “Peb ca le noj hab haus kuas txaus! Vim pigkig peb yuav tuag taag.”

¹⁴Tug TSWV kws muaj Fwjchim Luj kawg nkaus tau has rua kuv tas, “Tej kev phem kev qas nuav yuav tsi muaj kev zaam txim rua puab moog txug thaus puab tuag taag. Kuv kws yog Vaajtswv tug TSWV kws muaj Fwjchim Luj kawg nkaus, yog tug has tej lug nuav ntaag.”

¹⁵Tug TSWV kws muaj Fwjchim Luj kawg nkaus khaiv kuas kuv moog cuag Senas kws yog tug thawj saib lub tuamtsev, hab has rua nwg tas,

¹⁶“Koj tuaj ua dlaabtsi hab leejtwg tso cai rua koj tuaj khawb qhov ntxaa faus koj, txaug koj lub qhov ntxaa rua sau ncov roob sab, hab puab koj qhov chaw su rua sau roob zeb nuav?

¹⁷Saib maj, tug tuabneeg kws muaj zug, tug TSWV yuav tuaj nqaa koj moog povtseg. Nwg yuav tuav koj ca,

¹⁸hab nwg yuav muab koj dlov ua ib thooj hab muab koj pov moog rua ntawm lub tebchaws kws dlaav heev. Koj yuav tuag rua qhov ntawd, hab koj tej tsheb neeg ua rog yuav nyob rua qhov ntawd, vim koj tau ua rua koj tug tswv tsev tuabneeg raug kev txaajmuag.

¹⁹Tug TSWV yuav tshem koj tawm ntawm koj lub chaw ua num hab yuav txu kuas koj poob koj lub meejmom.”

²⁰Tug TSWV has rua Senas has tas, “Nub ntawd kuv yuav hu kuv tug tubkhai Eli-akees kws yog Hilekiyas tug tub tuaj,

²¹kuv yuav muab mej cov numtswv tej tsho ntev rua nwg naav, hab muab mej tej hlaab rua nwg sa; hab kuv yuav muab mej tej meejmom cob rua nwg teg; nwg yuav ua cov tuabneeg huv lub nroog Yeluxalees hab cov Yudas leej txiv.

²²Kuv yuav muab tug yumsij kws qheb Daviv lub tsev tso rua sau nwg xubpwg; nwg qheb, yuav tsi muaj leejtwg kaw; hab nwg kaw, yuav tsi muaj leejtwg qheb tau.

²³Kuv yuav muab nwg cog rua ntawm lub chaw kws ruaj khov ib yaam le tug ntsa hlau kws tub ntsa khov lawm, hab nwg yuav yog lub zwmtxwv kws luas fwm rua ntawm nwg yawmkoob caajceg.

²⁴“Tabsis taagnrho nwg cov kwvtij hab nwg tej tubki yuav ua ib lub nraa nyaav heev rua nwg; puab yuav khuam rua sau nwg ib yaam le tej laujkaub hab tej taig phab kws khuam rua ntawm tej ncej!

²⁵Txug nub ntawd, thaus muaj tej xwmtxheej nuav tshwmsim tuaj, tug ncej kws cog rua qhov chaw ruaj yuav rhu tawm hab yuav qaug. Txhua tsaav yaam kws yog lub nraa nyaav khuam sau nwg yuav poob taag.” Tug TSWV has le ntawd.