Read Hmong Njua Yaxayas 23 Bible Online

Yaxayas 23 - Hmong Njua bible

Yaxayas 23

¹Cov lug nuav yog has rua lub nroog Tiles. Cov tuabneeg kws ua num huv tej nkoj tom plawv havtxwv, mej ca le quaj tu sab los mas! Mej lub chaw nreg nkoj huv Tiles, tej vaaj tse hab tej chaw nreg nkoj huv lub tebchaws raug puamtsuaj taag. Mej yuav nov xuv thaus mej cov nkoj rov tim tebchaws Xaipas lug.

²Cov tuabneeg kws nyob huv koog povtxwv, hab cov tuabneeg ua laag ua luam huv Xidoos, mej ca le quaj ntsaaj ntsoog qeeg!

³Mej khaiv tuabneeg hlaa havtxwv moog yuav hab muag tej nplej kws luas cog nraag tebchaws Iziv, hab moog cog kev laag kev luam nrug ntau tsaav tuabneeg.

⁴Xidoos, koj ca le txaajmuag los mas! Havtxwv hab qaab thu havtxwv kws tub heev has tas, “Kuv tsi tau muaj dlua mivnyuas. Kuv tsi tau tu dlua tub lossis ntxhais le.”

⁵Thaus cov Iziv nov tej xwmtxheej nuav, puab yuav ceeb hab nyuaj sab txug lub nroog Tiles tej chaw nreg nkoj kws raug puamtsuaj taag lawm.

⁶Cov tuabneeg huv koog povtxwv, ca le quaj qw hab nrhav kev tsiv hlaa kuas dlhau lawm tim Xapees los mas!

⁷Lub nroog Tiles nuav puas yog lub nroog kws thaus u ua rua mej muaj kev lomzem? Lub nroog nuav puas yog lub kws pheej khaiv tuabneeg hlaa havtxwv moog txeeb luas tej tebchaws nyob.

⁸Leejtwg npaaj sab le nuav tawmtsaam lub nroog Tiles kws yog lub nroog num nroog tswv, cov tub laag tub luam kws nyob huv puavleej yog cov numtswv kws muaj meejmom tshaaj plawg huv nplajteb nuav los?

⁹Tug TSWV kws muaj Fwjchim Luj kawg nkaus tub npaaj sab rua lub nroog ntawd lawm. Nwg yuav rhuav puab tej kev khaavtheeb, tej kws puab muaj, hab muab cov tuabneeg kws muaj koob muaj meej txu kuas poob ntsejmuag.

¹⁰Mej cov tuabneeg kws nyob huv Xapees, ca le moog ua mej tej teb kuas thoob plawg huv mej lub tebchaws! Nyob qhov ntawd tsi muaj leejtwg tsomkwm mej lawm.

¹¹Tug TSWV tsaa nwg txhais teg rua sau havtxwv hab nwg muab txhua lub tebchaws cu ua zug koog. Nwg tau saamfwm kuas muab cov tuabneeg kws nyob huv lub xeev Faunikias tej chaw ua laag ua luam rhuav kuas puamtsuaj.

¹²Hab nwg has tas, “Lub nroog Xidoos kws yog tug ntxhais nkaujxwb, koj tej kev zoo sab tsi muaj lawm; hab koj cov tuabneeg puavleej raug tsimtxom. Txawm yog puab tsiv moog rua tim Xaipas los puab yeej tsi muaj kev kaaj sab hlo le.”

¹³(Tub yog cov tuabneeg Npanpiloos muab lub nroog Tiles ua tej tsaj qus lub chaw nyob, tsi yog cov tuabneeg Axilias ua. Tub yog cov tuabneeg Npanpiloos tuaj puab puab tej chaw tsomfaaj rua huv, puab muab lub nroog Tiles tej vaaj tse kws txhim zeb rhuav povtseg, hab muab lub nroog ntawd ua puamtsuaj taag.)

¹⁴Cov tuabneeg ua num huv nkoj, mej ca le quaj nyav! Lub nroog kws mej ca sab rua tub raug puamtsuaj taag lawm.

¹⁵Thaus txug nub ntawd puab yuav tsi ncu qaab txug lub nroog Tiles txug xyaa caum xyoo kws yog taag ib tug vaajntxwv simneej. Thaus taag xyaa caum xyoo lawm, yuav muaj tej yaam tshwmsim rua lub nroog Tiles lawv le tug namndlav zaaj nkauj kws has le nuav:

¹⁶Nqaa koj lub nkauj nogncaas moog ncig kuas thoob lub nroog nuav, Tug namndlav kws tsi muaj tuabneeg ncu txug lawm. Ca le ntaus nkauj nogncaas hab hu koj tej nkauj coj cov txivneej rov qaab lug dlua ib zag ntxiv los mas!

¹⁷Thaus dlhau xyaa caum xyoo lawm, tug TSWV yuav ca lub nroog Tiles rov qaab lug ua namndlav le qub, hab nwg yuav xaa nwg cov tuabneeg moog ua namndlav rua txhua lub tebchaws huv nplajteb nuav.

¹⁸Tej nyaj kws nwg ua laag ua luam tau lug, yuav muab fij rua tug TSWV. Nwg yuav tsi khaws ib qho ca le. Cov tuabneeg kws pehawm tug TSWV ntawd yuav tau cov nyaj ntawd moog yuav zaub mov hab rig tsho naav.