Read Hmong Njua Yaxayas 24 Bible Online

Yaxayas 24 - Hmong Njua bible

Yaxayas 24

¹Tug TSWV yuav muab lub nplajteb ua kuas puamtsuaj hab muab tso povtseg kuas nyob qhuav qhawv tsi muaj dlaabtsi. Nwg yuav muab lub nplajteb ntxeev kuas tej tuabneeg tawg moog nyob ua saab ua sua.

²Yuav zoo ib yaam le ntawd rua cov povthawj hab cov pejxeem, cov tswv hab cov qhev, cov pujnom hab cov ntxhais qhev, cov muag hab cov yuav, cov qev hab cov txais, cov muaj hab cov pluag.

³Lub nplajteb yuav raug muab tso povtseg kuas tawg ntsoog ntxawg hab puamtsuaj taag. Tug TSWV tau has tej lug nuav hab yuav ua kuas tej ntawd tav.

⁴Nplajteb yuav qhuav nkig nkuav; tuabneeg thoob nplajteb yuav tsaug muas; lub nplajteb hab lub ntuj yuav thooj txhij puamtsuaj moog.

⁵Tuabneeg tau ua rua lub nplajteb poob kev txhum vim puab tsi coj Vaajtswv tej kevcai hab tsi ua lawv le nwg tej lug kws tau cog tseg moog ibtxhis.

⁶Yog le ntawd lub nplajteb txhaj raug Vaajtswv tej lug foom. Tuabneeg txhaj raug kev puamtsuaj lawv le tej kev txhum kws puab tau ua lug lawm. Vim le ntawd txhaj le seem qee leej lawm xwb.

⁷Cawv txiv maab tshab tsawg zuj zug, hab tej tsob txiv maab qhuav taag lawm. Txhua tug kws muaj kev zoo sab nwgnuav ntxhuv sab kawg,

⁸hab puab tej suab nkauj nogncaas hab suab nruag kws nrov lomzem xauv npo puavleej ntsag taag.

⁹Qhov ntawd tsi muaj kev haus cawv hu nkauj lomzem hlo le; cawv ab kawg nkaus rua cov tuabneeg kws haus cawv.

¹⁰Huv lub nroog txhua yaam nyob khoob lug ca, hab tej tuabneeg suavdlawg muab puab ntsug rua huv puab tej tsev kuas tsi muaj tuabneeg moog qheb tau hlo le.

¹¹Tej tuabneeg tuaj quaj qw tom tej plawv kev vim tsi muaj cawv haus. Kev zoo sab yuav tsi muaj moog ibtxhis; txujkev zoo sab tub raug muab tshem tawm huv lub tebchaws moog lawm.

¹²Lub nroog los raug puamtsuaj, hab muab tej roojvaag nroog rhuav povtseg taag.

¹³Tej xwmtxheej nuav yuav lug raug txhua tsaav tuabneeg kws nyob huv lub qaab ntuj nuav. Lub nplajteb yuav zoo ib yaam le lub caij sau qoobloo xaus, hab zoo ib yaam le dle tej txiv ntoo roj sau txhua tsob ntoo hab dle tej nyuas tw txiv maab kawg ntawm cov maab.

¹⁴Cov tuabneeg seem yuav tsaa suab hu nkauj zoo sab. Cov tuabneeg kws nyob saab nubpoob yuav qw zoo sab rua tug TSWV lub fwjchim kws luj kawg nkaus,

¹⁵hab cov tuabneeg nyob saab nubtuaj yuav ua tug TSWV tsaug; tej tebchaws kws nyob lawv ntug havtxwv yuav ua tug TSWV kws yog cov Yixalayees tug Vaajtswv tsaug.

¹⁶Peb yuav nov tsaav tuabneeg Yixalayees hu nkauj dleb dleb tim qaab ntug kawg tuaj qhuas tug kws Ncaaj Nceeg. Tabsis tsi muaj kev ca sab rua kuv le! Kuv raug puamtsuaj lawm, kuv raug puamtsuaj lawm lauj! Kuv raug kev ntxhuv sab kawg le! Cov tuabneeg ntxeev sab yimfuab ntxeev sab. Puab tej kev dlaag hab kev phem fuam luj zuj zug.

¹⁷Tuabneeg nplajteb! Mej ca le noog kuv has, kev txhawj kev ntshai, qhov hlauv hab ntaa npuj cuab rawv tog mej kev lawm.

¹⁸Txhua tug kws tsiv txujkev ntshai yuav moog poob lub qhov hlauv, hab txhua tug kws tsiv kuas dlim lub qhov hlauv, yuav moog maag rooj ntaa npuj. Rooj ntug qheb hlo, tuamtsaam naag laub lug sau ntuj lug, hab ua rua lub nplajteb cu ua zug koog.

¹⁹Lub nplajteb tub tawg ua tej nplais, lub nplajteb faib pis hlo ua tej txaug hab lub nplajteb yoj cuag tug tsi.

²⁰Lub nplajteb ndlog ib yaam le tug tuabneeg qaug cawv, hab ua yoj ua yeeg ib yaam le naag xub naag cua ntsawj lub tsev pheebsuab. Tej kev txhum nyaav kawg tsuam lub nplajteb, nwg txhaj qaug hab sawv tsi taug ib zag ntxiv le lawm.

²¹Nub ntawd tug TSWV yuav rau txim rua cov muaj fwjchim kws nyob sau nruab ntug hab cov vaajntxwv huv lub nplajteb nuav.

²²Vaajtswv yuav sau taagnrho cov vaajntxwv tuaj kaw ua ke rua huv lub qhov aav; nwg yuav muab puab kaw nkaus rua huv tsev lojcuj moog txug nub kws nwg txav txim rua puab.

²³Lub hli yuav tsaus hab lub nub yuav tsi ci lawm, rua qhov tug TSWV kws muaj Fwjchim Luj kawg nkaus yuav ua vaajntxwv kaav sau lub Roob Xi-oos hab huv lub nroog Yeluxalees, nwg tug tshwjchim kws ci ntsaa ab yuav tshwm lug rua nwg cov txwjlaug pum.