Read Hmong Njua Yaxayas 25 Bible Online

Yaxayas 25 - Hmong Njua bible

Yaxayas 25

¹Tug TSWV, koj yog kuv tug Vaajtswv; kuv yuav fwm koj hab qhuas koj lub npe. Koj tau ua ntau yaam txujci tseemceeb tav taag lug lawm, koj ua ncaaj ua nceeg hab ua tseeb lawv le koj tau npaaj tseg thaus u lug lawm.

²Koj tau ua rua ntau lub nroog raug kev puamtsuaj taag, hab muab puab tej chaw faajxwm rhuav povtseg huv tuabsi. Tej loog kws peb cov yeebncuab ua tseg rua huv lub nroog yuav tsi txhim khu ntxiv moog taag ibtxhis.

³Txhua tsaav tuabneeg kws muaj zug yuav qhuas koj; tej nroog kws tej tsaav tuabneeg limham nyob yuav ntshai koj.

⁴Koj ua lub chaw cawm sav rua cov tuabneeg pluag hab txomnyem, hab cawm puab dlim thaus lub sijhawm kws puab ntsib kev nyuaj sab. Koj ua tsev rua puab nraim naag xub naag cua hab ua dluab ntxoov ntxoo rua puab nraim tshaav. Cov tuabneeg limham ntaus puab ib yaam le cua dlaaj cua dlub ntsawj tug ntsaa yeej

⁵hab ib yaam le tshaav kub heev huv lub tebchaws ntuj qhua teb nkig. Tabsis Vaajtswv, koj tau ua rua peb tej yeebncuab pluj taag lawm; koj ua rua cov tuabneeg limham tej suab qw ntsag taag ib yaam le tauv fuab roog tshaav ntuj kub.

⁶Nyob sau Roob Xi-oos, tug TSWV kws muaj Fwjchim Luj kawg nkaus yuav npaaj ib rooj mov rua txhua tsaav tuabneeg huv nplajteb noj, yog ib rooj mov kws muaj tej zaub mov hab tej cawv kws qaab heev.

⁷Thaus nyob sau lub roob nwg yuav muab txhua tsaav tuabneeg tej kev nyuaj sab kws zoo ib yaam le tauv fuab tshem povtseg.

⁸Tug TSWV kws kaav txhua tsaav yaam yuav rhuav txujkev tuag kuas puamtsuaj moog ibtxhis, nwg yuav so txhua tug lub kua muag, hab nwg yuav rhuav qhov kws lub nplajteb nuav tsimtxom nwg tsaav tuabneeg. Tug TSWV yog tug has tej lug nuav.

⁹Thaus muaj tej xwmtxheej nuav lawm, txhua tug tuabneeg yuav has tas, “Nwg yog peb tug Vaajtswv! Peb tso sab plhuav rua nwg, hab nwg tau cawm peb txujsa. Nwg yog tug TSWV! Peb tso sab plhuav rua nwg, nwgnuav peb zoo sab hab xyivfaab heev vim nwg cawm peb dlim lawm.”

¹⁰Tug TSWV yuav tsomkwm lub Roob Xi-oos nuav, tabsis cov Mau-am yuav raug tsuj ib yaam le tsuj tej quavnyaab npleg rua huv paag hawv.

¹¹Puab tsaa teg ib yaam le yuav ua luam dlej, tabsis tug TSWV yuav ua kuas puab poob ntsejmuag, hab puab tej npaab yuav tsaug leeg.

¹²Nwg yuav muab cov Mau-am tej chaw tsomfaaj hab puab tej ntsaa yeej kws sab rhuav kuas puamtsuaj hab tsoo kuas tawg taag xyaw moov aav.