Read Hmong Njua Yaxayas 26 Bible Online

Yaxayas 26 - Hmong Njua bible

Yaxayas 26

¹Nub ntawd yuav hu zaaj nkauj nuav nyob huv tebchaws Yudas: “Peb muaj ib lub nroog ruaj khov heev; Vaajtswv yog tug ntsaa yeej kws thaiv lub nroog kuas muaj kev cawm dlim.

²Ca le qheb tej roojvaag moog tso tsaav tuabneeg ncaaj nceeg kws ua lawv le Vaajtswv lub sab nyam moog nyob huv lub tebchaws ntawd.

³Tug TSWV, koj muab txujkev kaaj sab kws zoo kawg nkaus rua cov tuabneeg kws muab sab npuab koj; vim puab tso sab plhuav rua koj.

⁴Ca sab rua tug TSWV, nwg yuav ua phaab pobzeb thaiv peb moog ibtxhis.

⁵Nwg txu kuas cov tuabneeg khaavtheeb poob fwjchim; nwg muab cov tuabneeg kws muaj zug lub nroog rhuav kuas puamtsuaj, hab muab tej ntsaa yeej tsoo kuas qaug taag rua huv aav.

⁶Nwgnuav cov tuabneeg txomnyem hab cov tuabneeg pluag yuav muab lub nroog ntawd tsuj nthi rua huv puab xibtaws.”

⁷Tug TSWV, koj ua txujkev dlu rua cov tuabneeg ncaaj nceeg taug; txujkev kws puab taug taj heev.

⁸Peb yeej coj rawv koj txuj kevcai, hab peb tog rawv koj tuab leeg xwb; peb ncu ntsoov koj lub npe rua nruab sab.

⁹Mo ntuj kuv lub sab xaav ntsoov txug koj; nruab nub kuv lub sab xyivfaab hlo nrhav koj. Thaus koj txav txim rua tuabneeg nplajteb, puab yuav paub koj txujkev ncaaj nceeg.

¹⁰Txawm yog koj ua zoo npaum twg rua cov tuabneeg sab phem los puab yeej tsi paub txujkev ncaaj nceeg hlo le. Txawm yog puab nyob huv lub tebchaws kws muaj kev ncaaj nceeg nuav los puab tseem pheej ua kev txhum tsi tseg, hab tsi leeg paub koj lub fwjchim kws luj kawg nkaus.

¹¹Tug TSWV, koj yeej tsaa teg sab kawg tabsis puab tsi pum le; ca puab pum koj txujkev mob sab rua koj tsaav tuabneeg, hab ca puab raug txaajmuag. Ca cov suavtawg kws koj npaaj tseg rua koj cov yeebncuab kub puab.

¹²Tug TSWV, koj pub kev thaajyeeb rua peb; txhua yaam kws peb ua tav lawm, tub yog koj paab peb ua.

¹³Tug TSWV kws yog peb tug Vaajtswv, peb raug lwm tug tswv kaav peb, tabsis peb leeg paub koj lub npe nkaus xwb.

¹⁴Nwgnuav puab tub tuag taag hab tsi caj sa le lawm. Puab tej ntsujplig yuav tsi sawv; vim koj yog tug rau txim r ua puab hab ua kuas puab puamtsuaj.

¹⁵Tabsis tug TSWV, koj tau ua rua peb tsaav tuabneeg fuamvaam, hab nthuav peb lub tebchaws kuas dlaav; koj yuav tau txais koob meej zoo kawg nkaus le.

¹⁶Tug TSWV, koj rau txim rua koj tsaav tuabneeg, hab puab yuav thov koj thaus puab raug kev nyuaj sab.

¹⁷Tug TSWV, koj ua rua peb quaj, ib yaam le tug quaspuj kws quaj thaus nwg mob plaab yug mivnyuas.

¹⁸Peb suab mivnyuas hab mob plaab, tabsis peb yug tsi tau dlaabtsi. Peb coj tsi tau kev cawm dlim lug rua huv lub nplajteb; hab peb muab tsi tau txujsa rua tuabneeg lug yug huv nplajteb nuav.

¹⁹Peb cov tuabneeg kws tuag lawm, yuav rov muaj sa dlua! Puab tej cev yuav sawv rov qaab lug muaj sa. Cov tuabneeg kws pw huv tej qhov ntxaa yuav sawv lug hu nkauj zoo sab. Yog le ntawd, Vaajtswv yuav tsaa cov tuabneeg kws tuag tau ntev lawm sawv lug; ib yaam le lub lwg dlej kws ci rua lub nplajteb thaus sawv ntxuv.

²⁰Kuv tsaav tuabneeg, mej ca le tsiv rov qaab moog rua huv mej tej tsev, hab kaw qhovrooj rua. Nkaum tog kuas Vaajtswv txujkev chim dlhau tsaiv.

²¹Tug TSWV nqeg sau ntuj kws yog nwg qhov chaw nyob lug rau txim rua tuabneeg nplajteb, vim puab tej kev txhum. Aav yuav tsi nqug cov tuabneeg kws raug luas tua tej ntshaav, hab lub nplajteb yuav tsi faus cov tuabneeg kws raug luas tua tuag lub cev.