Read Hmong Njua Yaxayas 27 Bible Online

Yaxayas 27 - Hmong Njua bible

Yaxayas 27

¹Nub ntawd tug TSWV yuav siv nwg lub fwjchim hab nwg raab ntaaj rau txim rua tug Levi-athas kws yog tug naab txwj naab laug kws tsiv lawm, tug zaaj ntawd yog tug naab txwj naab laug kws nkhaus ntswj pis yog, hab nwg yuav muab tug zaaj kws nyob huv havtxwv tua povtseg.

²Nub ntawd tug TSWV yuav has tas, “Lub vaaj txiv maab kws ntxim sab:

³‘Kuv kws yog tug TSWV, kuv tsomkwm nwg; hab kuv rau sab ntso ywg dlej rua nwg txhua lub sijhawm. Kuv zuv rawv nwg nruab nub mo ntuj, kuas tsi xob muaj leejtwg tuaj ua phem rua nwg.

⁴Kuv tsi chim rua lub vaaj txiv maab lawm. Yog tej maab xuavpaug hab ntoo xuavpaug sawv ua rog tawmtsaam kuv, kuv yuav muab puab hlawv kuas kub nyab taag huv tuabsi.

⁵Tabsis yog kuv tsaav tuabneeg cov yeebncuab xaav kuas kuv tsomkwm puab, ca puab cog kev phoojywg nrug kuv. Ca puab cog phoojywg nrug kuv.’ ”

⁶Muaj ib nub tom ntej nuav, Yakhauj cov xeebntxwv yuav nrhau caag ib yaam le ntoo, tsaav tuabneeg Yixalayees yuav hlaav nplooj hab tawg paaj. Hab tej txiv yuav puv nkaus lub nplajteb.

⁷Nwg puas tau ntaus puab ib yaam le nwg ntaus cov tuabneeg kws tuaj ntaus puab? Lossis puab puas raug hlais ib yaam le hlais cov tuabneeg kws tuaj hlais puab?

⁸Tug TSWV rau txim rua nwg tsaav tuabneeg kws yog tso lwm tsaav tuabneeg tuaj nteg puab. Nwg coj puab tawm nrug cov cua phem kws ntsawj saab nubtuaj tuaj moog.

⁹Qhov kws yuav zaam tau Yakhauj lub txim, yog yuavtsum muab tej pobzeb kws teeb ua lub thaaj tsoo kuas tawg ua moov taag ib yaam le moov sib, hab tsi tseg ib lub thaaj teev tug mlom quaspuj Aselas lossis tej thaaj hlawv moov tshuaj tsw qaab nyob qhov twg le lawm.

¹⁰Lub nroog kws txhim zeb khov kho raug puamtsuaj taag. Nwg yuav ua suabpuam ib yaam le tej roob mojsaab qhua tsi muaj dlaabtsi. Hab nwg yuav caj ua ib lub tshaav zaub rua tej mivnyuas yaaj noj, pw hab zum zaub.

¹¹Thaus tej ceg ntoo qhuav lawm ces yeej yuav luv, hab tej quaspuj yuav moog khaws lug ua tawg rauv. Vim tsaav tuabneeg nuav tsi totaub, mas Vaajtswv tug kws tsim puab yuav tsi hlub puab.

¹²Nub ntawd, txij ndlua ntawm tug dlej Efalates moog txug ndlua nraag cov Iziv tug nrimteb; tug TSWV yuav txheeb nwg tsaav tuabneeg ib tug zuj zug, ib yaam le cais tej npluag nplej tawm ntawm cov tseem nplej.

¹³Hab nub ntawd, luas yuav tshuab raaj tshuab xyu, cov Yixalayees kws moog pluj rua peg tebchaws Axilias hab raug ntab moog rua nraag tebchaws Iziv lawm, yuav rov qaab lug pehawm tug TSWV sau lub roob dlawbhuv huv lub nroog Yeluxalees.