Read Hmong Njua Yaxayas 28 Bible Online

Yaxayas 28 - Hmong Njua bible

Yaxayas 28

¹Cov Efalayees yuav raug kev puamtsuaj lauj! Cov thawjcoj kws quav cawv lub mom yuav poob sau puab taubhau lug ib yaam le tej paaj ntoos zeeg. Puab pleev roj tsw qaab hab tsaa taubhau sab sab, tabsis puab pw ib yaam le tug tuabneeg qaug cawv kws tub yuav tuag.

²Saib maj, tug TSWV npaaj tau ib tug kws muaj fwjchim hab muaj zug heev tuaj tawmtsaam puab; nwg yuav tuaj ib yaam le ib nthwv cua dlaaj cua dlub nrug lawg, hab zoo ib yaam le ib nthwv naag xub naag cua ua rua dlej nphau nphwv lug nyaab thoob plawg puab lub tebchaws.

³Cov Efalayees tej thawjcoj kws quav cawv hab khaavtheeb yuav raug muab tsuj ntag rua huv xibtaws.

⁴Hab cov thawjcoj kws khaavtheeb ntawd, lub koob meej taabtom yuav pluj moog ib yaam le thawj phaum txiv ncuav pas kws xub sav, hab leejtwg pum los ca le dle noj.

⁵Muaj ib nub tug TSWV kws muaj Fwjchim Luj kawg nkaus yuav ua puab lub mom yeebkoob kws muaj meejmom kawg nkaus, hab ci ntsaa ab rua nwg tsaav tuabneeg kws seem.

⁶Nwg yuav pub lub sab kws muaj kev ncaaj nceeg rua tug tuabneeg kws txav txim hab txhawb cov tubrog kws zuv ntawm cov roojvaag nroog kuas muaj lub sab tawv.

⁷Cov povthawj hab cov cevlug puavleej qaug cawv ndlog puj poog. Vim puab haus cov cawv kws muaj zug heev, puab txhaj tsi sis hum, puab ndlog puj poog tsi meejpem, puab txhaj tsi totaub tej ywgtoog kws Vaajtswv qha, hab tsi paub tu tej plaub ntug kws luas coj tuaj rua puab has.

⁸Puab tej rooj lu ntuav qas quas ntsuav, tsi muaj ib qho kws yuav huv sab hlo le.

⁹Puab ywg kuv kawg le. Puab has tas, “Nwg yuav qha tej kev txawj ntse rua leejtwg? Hab nwg yuav pav nwg tej lug rua leejtwg? Nwg qha rua cov mivnyuas kws nyavnyuas tso mig tseg los?

¹⁰Nwg ua tuab zoo qha rua peb kawg le, nwg qha ib lus rua ib lus, ib kaab rua ib kaab hab ib zaaj rua ib zaaj.”

¹¹Yog mej tsi noog kuv lug, ces Vaajtswv yuav khaiv lwm tsaav tuabneeg kws has lug txawv tuaj qha mej.

¹²Tug TSWV caw kuas mej suavdlawg ca le su hab nyob tso sab plhuav tabsis mej tsi noog nwg lug le.

¹³Tub yog vim le nuav tug TSWV txhaj le qha mej ib lus rua ib lus, ib kaab rua ib kaab hab ib zaaj rua ib zaaj. Mej txhaj dlawm txhua kaujruam; hab mej yuav maag ntaa npuj, raug mob hab raug nteg coj moog kaw.

¹⁴Mej cov thawjcoj khaavtheeb kws kaav cov pejxeem huv lub nroog Yeluxalees, mej ca le noog tug TSWV has.

¹⁵Rua qhov mej has tas, “Peb tau coglug nrug kev tuag hab tubtuag teb lawm, mas peb tso sab has tas thaus kev puamtsuaj lug, peb yuav tsi tuag, vim peb vaamkhom tej lug dlaag ntawd tsomkwm peb.”

¹⁶Tub yog vim le ntawd tug TSWV kws kaav txhua tsaav yaam txhaj has tas, “Kuv muab ib lub pobzeb kws tub sim hab tawv heev kws yog tug caag cog ruaj khov lug tag lub nroog Xi-oos: ‘Yog leejtwg ntseeg nwg, tug ntawd yuav tsi raug kev ntxhuv sab.’

¹⁷Kuv yuav muab kev ncaaj nceeg ua txuj hlua ntsuag qhov ntev, hab kuv muab kev tseeb ua lub thauj ntsuag qhov ntseg;” Hab lawg yuav ntaus tej kev dlaag kws mej vaamkhom, hab dlej yuav kuav mej tej chaw cawm sav kuas puamtsuaj.

¹⁸Tej lug kws mej tau cog nrug kev tuag yuav raug muab rhuav moog, hab tej lug kws mej pum zoo nrug tubtuag teb yuav muab tso povtseg; thaus kev puamtsuaj lug, mej txhaj raug kev pemsij.

¹⁹Txhua zag kws kev puamtsuaj yuav lug coj mej moog, nwg yuav lug ib taagkig dlhau rua ib taagkig, ib nub dlhau rua ib nub hab ib mos dlhau rua ib mos. Txhua zaaj lug kws Vaajtswv has yuav coj kev ntshai lug ntxiv xwb.

²⁰Koj zoo ib yaam le tug tuabneeg nyob huv zaaj paajlug kws has tas, nwg pw lub txaaj kws tuab lu tsi txaus xyaab, hab vuv dlaim choj nqaim kws npug tsi taag nwg lub cev.

²¹Tug TSWV yuav sawv sau lub Roob Pelaxees hab huv lub haav Nkinpe-oos, ua nwg teg num, yog teg num kws suavdlawg tsi tau pum dlua. Nwg yuav ua kuas nwg teg num tav, yog teg num kws txawv kawg le.

²²Tsi xob saib tsi taug kuv tej lug ceebtoom, nyob tsaam txuj saw hlau hajyam yuav khi mej ruaj. Kuv tub nov tug TSWV kws muaj Fwjchim Luj kawg nkaus txav txim sab yuav muab lub tebchaws ua kuas puamtsuaj lawm.

²³Tig qhovntsej noog lub suab kws kuv has; ua tuab zoo noog tej lug kws kuv qha.

²⁴Tug tuabneeg laij teb tseb nplej, nwg naj nub laij le los? Nwg naj nub moog laij hab haiv kuas tej aav ntxheev los?

²⁵Thaus nwg moog pheej cov aav taj lawm, nwg txawm tseb noob zaub txhwb qab hab zaub txhwb nyug rua. Nwg cog nplej ua tej kaab hab cog pobkws rua tej thaaj kws ca cog pobkws, hab muab lwm yaam noob moog tseb rua ntawm nwg tej ntug teb.

²⁶Nwg yeej paub ua nwg yaam num, rua qhov Vaajtswv qha rua nwg.

²⁷Nwg tsi siv qws ntaus nplej moog ntaus zaub txhwb nyug lossis nwg tsi thawb tsheb moog luam zaub txhwb qab le; tabsis nwg siv tug paas kws sib moog ntaus zaub txhwb qab hab zaub txhwb nyug xwb.

²⁸Yuavtsum muab nplej zum ua moov puab ncuav; tsi yog nwg naj nub tsoov nplej moog ibtxhis le. Txawm yog nwg caab neeg hai tsheb moog tsuj nplej los neeg yeej tsi tsuj tej ntsab kuas ntsoog le.

²⁹Tej tswvyim ntawd puavleej yog lug ntawm tug TSWV kws muaj Fwjchim Luj kawg nkaus lug xwb. Nwg yog tug tuavxaam kws zoo heev hab muaj tswvyim kawg nkaus le.