Read Hmong Njua Yaxayas 29 Bible Online

Yaxayas 29 - Hmong Njua bible

Yaxayas 29

¹Yeluxalees kws yog Vaajtswv lub thaaj hab lub nroog kws Daviv tsuam yeej yuav raug puamtsuaj lauj! Ca le ua kevcai hab ua rooj noj rooj haus ib xyoos dlhau ib xyoos lawv le caij nyoog kws teem tseg,

²Vaajtswv maam tso kev puamtsuaj lug raug lub nroog kws hu ua, “Vaajtswv lub thaaj.” Thaus ntawd yuav muaj kev quaj nyav, hab taagnrho lub nroog yuav zoo ib yaam le lub thaaj kws muaj ntshaav plooj nkaus sau.

³Vaajtswv yuav tsuam yeej hab ua chaw tsomfaaj puagncig lub nroog, hab yuav tawmtsaam koj. Kuv yuav tsuam yeej tawmtsaam koj ib yaam le Daviv.

⁴Ces koj yuav has lug huv lub qhov kws tub heev tuaj, koj yuav has lug huv qaab tivtxwv tuaj; koj lub suab yuav has huv qhov aav tuaj ib yaam le dlaab lub suab, hab koj yuav has lug ntxhi huv aav tuaj.

⁵Yeluxalees, koj cov yeebncuab kws coob ua npoj ntwg tuaj tua koj yuav raug ntsawj yaa ib yaam le moov aav, hab puab cov tubrog kws txaus ntshai, yuav raug ntsawj yaa ib yaam le tej npluag nplej. Tuab plag ntshis xwb

⁶tug TSWV kws muaj Fwjchim Luj kawg nkaus yuav lug cawm mej, nwg yuav ua xub nroo, ua aav qeeg, ua cua dlaaj cua dlub hab ua tej nplaim tawg kws hlawv kuas kub dlu lug lug paab mej.

⁷Txhua tsaav tuabneeg kws tuaj tua lub nroog kws yog Vaajtswv lub thaaj, puab tej cuabyeej ua rog hab txhua yaam puavleej yuav yaaj hab pluj huv tuabsi ib yaam le ua npau suav mo ntuj,

⁸hab zoo le tug tuabneeg tshaib plaab kws ua npau suav noj mov, tabsis thaus tsim lug tseem tshaib plaab le qub lossis zoo le tug tuabneeg nqhes dlej kws nwg ua npau suav haus dlej, tabsis thaus tsim lug tseem nqhes dlej hab qaa qhuav qhawv. Txhua tsaav tuabneeg kws tuaj tua lub nroog Yeluxalees yuav zoo ib yaam le ntawd ntaag.

⁹Ca le ua tuabneeg ruag los mas! Ca le ua tuabneeg dligmuag los mas! Ca le vwm loj vwm leg, tabsis tsi yog vwm cawv, ca le qaug puj poog tabsis tsi yog qaug kua txiv maab.

¹⁰Tug TSWV ua kuas mej ncaws dlaab ndlub hab tsaug zug looj hlas. Tub tsimnyog cov cevlug ua suavdlawg lub qhovmuag pum kev, tabsis Vaajtswv muab puab tej qhovmuag npug lawm.

¹¹Lub ntsab lug kws txhua tug cev Vaajtswv lug ua ywgtoog pum yuav muab zais tsi pub mej paub zoo ib yaam le thooj ntawv kws ntaus homthawj rua lawm. Yog mej coj moog rua ib tug kws paub nyeem hab thov kuas nwg nyeem rua mej noog, nwg yuav teb has tas, “Kuv tsi nyeem rua qhov ntaus homthawj rua lawm.”

¹²Yog mej muab thooj ntawv ntawd rua tug kws tsi paub nyeem hab thov nwg nyeem rua mej noog, nwg yuav teb has tas, “Kuv tsi paub nyeem.”

¹³Tug TSWV has tas, “Cov tuabneeg nuav lub ncauj qhuas kuv, tabsis puab lub sab tsi npuab kuv, tej lug kws puab qhuas kuv tsi muaj qaabhau le. Qhov kws puab pehawm kuv tsuas yog ua lawv le kevcai hab lawv le tuabneeg qha xwb.

¹⁴Vim le ntawd, kuv yuav rov ua tej txujci kws txawv heev rua cov tuabneeg nuav pum dlua, kuas puab xaav tsi thoob le; cov tuabneeg ntse lub tswvyim yuav ruag taag, hab kev txawj ntse ntawm cov tuabneeg ntse yuav pluj taag.”

¹⁵Puab cov kws muab tej tswvyim zais tsi pub tug TSWV paub yuav raug puamtsuaj lauj! Puab ua tej yaam nraim nkoog huv qhov tsaus ntuj nti, hab xaav has tas tsi muaj leejtwg pum hab paub has tas puab ua dlaabtsi.

¹⁶Puab pum qhov zoo yog qhov phem! Tug puab laujkaub aav hab cov aav, yaam twg yog yaam tseemceeb dlua? Yaam kws tug tuabneeg ntawd ua, puab puas muaj cuabkaav has rua tug kws puab tas, “Koj tub tsi tau puab kuv los sav”? Lossis yaam kws nwg puab ntawd puas has rua tug puab tas, “Koj tub tsi muaj kev txawj ntse le.”

¹⁷Puas yog tshuav tsi ntev lawm, lub haav zoov Lenpanoos yuav dlhau moog ua teb, hab tej teb yuav rov ua haav zoov?

¹⁸Thaus ntawd, cov tuabneeg kws laag ntseg yuav nov luas nyeem ntawv, hab cov tuabneeg dligmuag kws ua neej tsaus ntuj nti yuav pum kev.

¹⁹Cov tuabneeg pluag hab cov tuabneeg txu fwjchim yuav tau kev kaaj sab lug ntawm tug TSWV kws yog cov Yixalayees tug Vaajtswv kws dlawbhuv.

²⁰Tug kws tsimtxom luas lwm tug, hab pheej thuam Vaajtswv yuav pluj moog. Txhua tug tuabneeg kws pheej nyam ua txhum yuav raug kev puamtsuaj.

²¹Cov tuabneeg kws saib tsi taug lwm tug, cov tuabneeg kws txheem tej plaub ntug tua tuabneeg, hab cov tuabneeg kws ua timkhawv tsi tseeb ntxo cov tuabneeg ncaaj nceeg kuas raug txav txim, Vaajtswv yuav muab ua kuas puamtsuaj taag.

²²Vim le ntawd tug TSWV kws yog cov Yixalayees tug Vaajtswv kws cawm Anplahaas dlim tej kev ntxhuv sab has tas, “Kuv tsaav tuabneeg, mej yuav tsi raug txaajmuag, hab mej lub ntsejmuag yuav tsi ntshaus ntxiv le lawm.

²³Thaus mej pum tej tubki kws kuv yuav pub rua mej, ces mej yuav paub has tas, kuv yog cov Yixalayees tug Vaajtswv kws dlawbhuv. Mej yuavtsum fwm kuv hab paub ntshai kuv.

²⁴Cov tuabneeg ruag yuav totaub, hab cov kws ywg tujtawg yuav nyam kawm Vaajtswv txuj kevcai.”