Read Hmong Njua Yaxayas 3 Bible Online

Yaxayas 3 - Hmong Njua bible

Yaxayas 3

¹Tug TSWV kws yog Vaajtswv tug muaj Fwjchim Luj kawg nkaus, muab txhua tsaav yaam hab txhua tug tuabneeg kws nyob huv lub nroog Yeluxalees hab huv lub tebchaws Yudas kws cov tuabneeg ca sab ntsoov rua, tshem huv tuabsi moog. Nwg tseem muab puab tej zaub mov hab puab tej dlej,

²puab cov tuabneeg muaj zug hab cov tubrog, cov txav txim hab cov povthawj, cov tuabneeg ua khawvkoob, hab cov txwjlaug,

³tug thawj kws saib tsib caug leej tubrog hab cov thawjcoj kws nrhav kev vaammeej, cov tuavxaam tebchaws, hab txhua tug tuabneeg kws txawj khawvkoob tshem huv tuabsi moog.

⁴Tug TSWV yuav ca puab cov tub hluas kws tsi tau paub taab ua num ua tswv kaav cov pejxeem.

⁵Cov pejxeem ib leeg yuav tsimtxom ib leeg. Cov tub hluas yuav tsi fwm tej kev txwjlaug, hab cov tuabneeg tsi muaj meejmom yuav tsi fwm puab cov numtswv.

⁶Thaus lub sijhawm ntawd ib tug huv ib xeem yuav has rua puab ib tug kwvtij has tas, “Koj yog tug kws tseem tshuav rig tsho naav; koj ca le lug ua tug coj peb lub sijhawm kws raug kev txomnyem nuav.”

⁷Tabsis nwg teb has tas, “Tsi yog kuv! Kuv tsi kaam paab mej. Kuv los tsi muaj rig tsho naav hab tsi muaj mov noj ib yaam nkaus. Tsi xob tsaa kuv ua tug coj mej.”

⁸Qhov tseeb, lub nroog Yeluxalees taabtom raug kev puamtsuaj lawm! Cov Yudas qaug taag rua huv aav! Tej lug kws puab has hab tej num kws puab ua puavleej tawmtsaam Vaajtswv; puab taabmeeg tuam mom Vaajtswv le ntaag.

⁹Puab tej kev ua tsi ncaaj yuav rov ua povthawj tawmtsaam puab. Puab taabmeeg ua kev txhum ib yaam le cov tuabneeg Xaudoos ua. Kev puamtsuaj lug raug puab, vim puab lob kev phem lug rua puab.

¹⁰Has rua cov tuabneeg ncaaj nceeg tas puab yuav muaj kev zoo sab, rua qhov puab yuav tau txais nqe zug zoo vim tej num kws puab ua.

¹¹Tabsis cov tuabneeg ua phem yuav raug kev puamtsuaj; tej kws puab tau ua rua lwm tug lawm, yuav rov lug raug puab.

¹²Cov tuabneeg qev nyaj tsimtxom kuv tsaav tuabneeg, hab cov tuabneeg txais nyaj qee tug tswv nyaj tug. Kuv tsaav tuabneeg, mej cov thawjcoj coj mej moog yuam kev lawm. Yog le ntawd, mej txhaj tsi paub moog rua txujkev twg le.

¹³Tug TSWV yeej npaaj rawv has nwg rooj plaub; nwg npaaj txhij yuav txav txim rua nwg tsaav tuabneeg.

¹⁴Tug TSWV coj nwg tsaav tuabneeg, cov thawjcoj hab cov kev txwjlaug tuaj txav txim. Nwg has le nuav: “Mej txeeb luas tej vaaj txiv maab, hab mej moog txeeb cov tuabneeg pluag tej khoom lug ca rua huv mej tej tsev puv nkaus le.

¹⁵Mej tsi muaj cai yuam kuv tsaav tuabneeg hab tsimtxom tej tuabneeg pluag. Kuv yog tug TSWV kws muaj Fwjchim Luj kawg nkaus has tej lug nuav.”

¹⁶Tug TSWV has tas, “Mej saib, cov ntxhais kws nyob huv lub nroog Yeluxalees khaavtheeb heev! Puab moog kev tsaa ntswg nuv rua sau ntuj. Puab ob lub qhovmuag saib ntsoov tej kev phem kws puab xaav ua. Puab rhais ruam moog kev mog nyoos, ua rua tej tswb kws puab coj ntawm puab kutaw nrov zum zawg.

¹⁷Tabsis kuv yuav rau txim rua puab, kuv yuav chais puab tej plaubhau kuas dlu lug hab ca puab nyob taubhau dlo dlus, kuas puab txaajmuag.”

¹⁸Nub ntawd tug TSWV yuav muab txhua yaam kws cov quaspuj huv Yeluxalees pheej khaavtheeb: tej saw kws puab coj ntawm cejdlaab taws, sau taubhau, ntawm cejdlaab,

¹⁹tej paugteg kws coj ntawm cejdlaab teg, puab tej phuam kws paav taubhau,

²⁰tej mom, tej hum tshuaj tsw qaab kws puab coj rawv ntawm ncej npaab, hab tej hlaab kws sa ntawm dluav;

²¹puab tej nplhaib kws puab coj ntawm ntivteg, tej kauj ntswg kws coj ntawm qhovntswg;

²²puab tej tab ntev kws zoo heev, tej tsho khuam hab tej naab nyaj;

²³puab tej tsho ntev, tej phuam ntaub maag, tej phuam paav cejdlaab, hab tej phuam ntev kws puab ntoo sau taubhau, sau huv tuabsi coj moog povtseg.

²⁴Puab xaav pleev tshuaj kuas tsw qaab, tabsis puab yuav tsw ntxhab; puab xaav sa tej hlaab kws zoo, tabsis puab yuav rhais tab; puab xaav ntsis plaubhau kuas zoo nkauj, tabsis puab yuav dlo hau; puab xaav naav tej tsoog tsho kws zoo; tabsis puab yuav naav khaub hlaab; puab tej kev zoo nkauj yuav hloov ua kev txaajmuag!

²⁵Cov txivneej huv nroog yuav tuag rua nav ntaaj nav rag, hab tej tubrog yuav tuag taag rua huv tshaav rog.

²⁶Lub nroog Yeluxalees tej roojvaag yuav quaj qw tu sab heev, hab lub nroog ntawd zoo ib yaam le tug quaspuj labqaab kws nyob huv aav.