Read Hmong Njua Yaxayas 30 Bible Online

Yaxayas 30 - Hmong Njua bible

Yaxayas 30

¹Tug TSWV has tas, “Yudas cov thawjcoj raug puamtsuaj vim puab ntxeev sab rua kuv. Puab ua lawv le puab lub tswvyim kws tsi yog kuv muab rua puab, hab puab moog coglug nrug lwm tsaav tuabneeg tawmtsaam kuv, puab txhaj ua kev txhum tsub kev txhum ntxiv zuj zug.

²Puab moog cuag cov Iziv kuas paab puab, tabsis puab tsi saablaaj rua kuv le. Puab xaav kuas cov Iziv paab puab, yog le ntawd puab txhaj tso sab rua Falaus kws yog cov Iziv tug vaajntxwv.

³Tabsis Falaus txujkev paab yuav ua rua puab raug kev txaajmuag, hab cov Iziv txujkev tiv thaiv yuav ua rua puab poob ntsejmuag.

⁴Txawm yog puab cov numtswv moog txug rua huv cov Iziv lub nroog Xau-as hab lub nroog Hanes lawm los

⁵cov Yudas yuav raug kev txaajmuag, rua qhov tsaav tuabneeg ntawd ibtxwm paab tsi tau puab, tsaav tuabneeg ntawd yeej paab tsi tau lossis tsi muaj nqes rua puab le, tabsis tsuas coj kev txaajmuag hab kev poob ntsejmuag lug rua puab xwb.”

⁶Ntawm nuav yog cov lug kws Vaajtswv has rua cov tsaj kws nyob nraag taj suabpuam tas: “Cov numtswv taug kev moog hlaa huv lub tebchaws kws muaj kev txhawj ntshai, muaj tsuv ntxhuav, muaj naab hab muaj tej zaaj kws txwj yaa nyob. Puab muab puab tej khoom muaj nqes rua puab tej neeg luav hab ntxhuav thauj moog pub tsaav tuabneeg kws paab tsi tau puab.

⁷Cov Iziv txujkev paab tsi muaj nqes dlaabtsi le. Yog le ntawd, kuv txhaj tis ib lub npe tshab rua cov Iziv hu ua, ‘Tug zaaj kws ua tsi tau dlaabtsi.’ ”

⁸Taamsim nuav koj ca le moog nyob taabmeeg puab hab muab sau ua ib phoo ntawv khaws tseg, kuas yaav tom ntej txhaj le muaj ntawv ua povthawj has txug puab tej kev txhum moog ibtxhis le.

⁹Vim puab yog cov tuabneeg ntxeev sab rua Vaajtswv, hab yog cov tuabneeg dlaag kws tsi noog tug TSWV tej lug qhuab qha.

¹⁰Puab has kuas cov cev Vaajtswv lug nyob tuabywv. Puab has tas, “Tsi xob qha tej qhov tseeb rua peb paub. Qha tej kws peb nyam rua peb noog xwb. Ca peb ua lawv le peb lub sab nyam xwb.

¹¹Ca le tsiv moog hab tsi xob thaiv peb kev. Peb tsi xaav nov mej has txug cov Yixalayees tug Vaajtswv kws dlawbhuv hlo le.”

¹²Tabsis cov Yixalayees tug Vaajtswv kws dlawbhuv has tas: “Mej saib tsi taug kuv tej lug qha, mej tsuas nyam ua limham hab dlaag ntxag xwb.

¹³Mej yog tuabneeg txhum plaub. Mej zoo le tug ntsaa yeej sab sab kws tawg pleb thoob plawg lawm; tuab plag ntshis xwb mej yuav qaug tawg taag.

¹⁴Mej yuav tawg ua tej dlaim ib yaam le tej laujkaub aav, tej txhais kws tawg ntawd tsi muaj ib dlaim kws yuav zoo khaws lug yawm hluav ncaig lossis tub tsi zoo has dlej huv thoob lug haus le.”

¹⁵Cov Yixalayees tug TSWV dlawbhuv kws kaav ib puas tsaav yaam has rua suavdlawg has tas, “Ca le tig rov lug hab su, mej txhaj yuav dlim; nyob tuabywv hab ca sab rua kuv, mej txhaj yuav muaj zug.” Tabsis mej tsi kaam ua le ntawd.

¹⁶Tabsis mej caij neeg tsiv kuas dlim mej cov yeebncuab. Mej ca le tsiv los mas! Mej xaav has tas mej cov neeg dlha ceev heev, tabsis cov kws caum mej qaab tseem ceev tshaaj mej lawm hab!

¹⁷Thaus yeebncuab ib tug tubrog tuaj hem mej, txawm yog mej muaj ib txheeb leej los mej yuav ca le tsiv; hab luas tsib tug tubrog tuaj hem mej xwb los mej yuav tsiv taagnrho. Mej yuav tsi tshuav ib yaam dlaabtsi seem le, tsuas tshuav tug ncej chij kws txhus sau ncov roob xwb.

¹⁸Tug TSWV tog ntev lawm yuav foom koob moov rua mej; yog le ntawd, nwg txhaj lug hlub mej. Rua qhov tug TSWV yog Vaajtswv tug kws muaj kev ncaaj nceeg; cov tuabneeg kws tog nwg yuav tau txais koob moov.

¹⁹Mej cov kws nyob huv lub nroog Yeluxalees yuav tsi quaj ib zag ntxiv le lawm. Tug TSWV yog tug kws muaj kev hlub, thaus mej thov nwg paab, nwg yuav teb mej tej lug thov.

²⁰Tug TSWV yuav muab lub ncuav kws yog txujkev txomnyem lug rua mej noj hab cov dlej kws yog kev nyuaj sab lug rua mej haus, txawm le ntawd los mej tug Xwbfwb yuav tsi tsiv nkaum mej le lawm, mej lub qhovmuag yuav pum nwg.

²¹Thaus mej taug kev moog saab xis lossis saab txhumphem, mej yuav nov nwg lub suab hu tom qaab tuaj has tas, “Txujkev tseeb yog txuj nuav. Ca le taug txuj nuav ntaag.”

²²Ces mej yuav muab mej tej mlom kws muab nyaj nchuav hab tej mlom kws muab kub vuam, coj moog povtseg ib yaam le tej quaspuj dlaim khaub dluag coj ntxhua, hab qw has tas, “Ca le tawm ntawm kuv moog.”

²³Tug TSWV yuav tso naag lug ywg mej tej noob qoob kws tseb rua huv aav, kuas tej qoobloo yuav tuaj hlub mog nyoos, hab yuav ua rua mej sau tau qoobloo ntau, hab mej tej tsaj txhu yuav tau lub tshaav zaub kws mog nyoos noj.

²⁴Mej tej nyuj hab tej neeg luav kws laij teb, yuav tau noj tej zaub zoo kws muab dluav hab rawg hlau yawm lug rua noj.

²⁵Nub kws mej txeeb tau mej cov yeebncuab tej chaw faajxwm hab tua puab cov tuabneeg tuag taag lawm, thaus ntawd tej kwj dleg sau tej hauv roob hab tej pov roob sab yuav muaj dlej txhawv ndlwg ntshab si lug.

²⁶Lub hli yuav ci ib yaam le lub nub, hab lub nub yuav ci tshaaj le lub nub ibtxwm ci lug lawm xyaa npaug ntxiv, ib yaam le muab xyaa nub lug ua ib zag ci. Thaus ntawd tug TSWV yuav qhwv hab khu nwg tsaav tuabneeg tej qhov txhaab kws nwg tso lug raug puab.

²⁷Saib maj! Yuav pum tug TSWV tug tshwjchim ci ntsaa ab tim qaab ntuj kawg tuaj. Nplaim tawg hab paa tawg yog nwg txujkev chim. Nwg tej lug kub ib yaam le nplaim suavtawg.

²⁸Nwg tso ib nthwv cua ntsawj ua nwg ntej ib yaam le dlej tshoob txhua yaam moog. Nthwv cua ntawd ua rua ntau tsaav tuabneeg raug kev puamtsuaj, hab muab khawb hlau lug saam xauv rua cov tuabneeg ntawd coj puab moog yuam kev.

²⁹Tabsis mej cov kws yog Vaajtswv tsaav tuabneeg, mej yuav zoo sab hab hu nkauj le mo kws mej ua kevcai noj rooj mov dlawbhuv. Mej yuav zoo sab ib yaam le cov tuabneeg kws tshuab raaj tshuab xyu moog rua sau tug TSWV lub Roob kws yog cov Yixalayees lub Pobzeb.

³⁰Tug TSWV yuav ua rua suavdlawg nov nwg lub suab kws muaj fwjchim hab pum nwg txujkev chim kws luj kawg nkaus. Qhov ntawd yuav muaj nplaim tawg, fuab dlub, lawg pobzeb hab naag xub naag cua tsaus nti nrov nroo ntwg lug.

³¹Thaus puab nov tug TSWV lub suab hab nwg muab nwg raab qws ntaus puab, cov Axilias yuav ntshai heev.

³²Txhua qhov kws tug TSWV muab raab nplawm kws yog txujkev rau txim lug nplawm puab, mas yuav muaj suab raaj suab xyu hab suab nkauj nogncaas nrov ntsoog qeeg; Vaajtswv yuav tua cov Axilias huv tshaav rog kuas puab puamtsuaj taag.

³³Lub cubtawg cig ntsaa thuav kws tub npaaj tseg yuav hlawv cov Axilias tug vaajntxwv ntawd tub hab dlaav heev, hab muab tawg lug teeb puv nkaus rua. Tug TSWV yuav tshuab nplaim tawg leejfaaj moog kub cov tawg kuas cig.