Read Hmong Njua Yaxayas 31 Bible Online

Yaxayas 31 - Hmong Njua bible

Yaxayas 31

¹Cov tuabneeg kws moog thov kuas cov Iziv paab, yuav raug puamtsuaj lauj! Puab ca sab rua cov Iziv cov tubrog caij neeg, tej tsheb neeg ntaus rog, hab cov tubrog, tabsis puab tsi ca sab rua tug TSWV kws yog cov Yixalayees tug Vaajtswv Dlawbhuv kuas nwg paab puab le.

²Tug TSWV yeej paub tej kws nwg ua lawm! Nwg tso kev puamtsuaj lug, nwg tsi thim nwg tej lug rov qaab. Nwg rau txim rua cov tuabneeg kws ua phem ua qas hab cov kws paab cov tuabneeg ua phem ua qas ntawd.

³Cov Iziv yog tuabneeg xwb, tsi yog Vaajtswv; puab tej neeg yog tsaj xwb, tsi yog ntsujplig. Thaus tug TSWV xyaab teg tuaj, cov tuabneeg kws tuaj paab puab yuav raug tsuj, hab puab cov tuabneeg kws tau kev paab los yuav qaug pawg lug, hab puab suavdlawg yuav raug puamtsuaj ua ke.

⁴Tug TSWV has rua kuv tas, “Txawm yog cov tswv yug yaaj qw hab nthe npaum twg los tug tsuv ntxhuav kws tum tau tug yaaj lawm yeej tsi ntshai hab tsi tsiv le; ib yaam le ntawd ntaag, yeej tsi muaj ib yaam dlaabtsi txwv tau kuv kws yog tug TSWV kws muaj Fwjchim Luj kawg nkaus, kuas tsiv tsi xob tsomkwm lub Roob Xi-oos le.

⁵Tug TSWV kws muaj Fwjchim Luj kawg nkaus yuav tsomkwm hab tiv thaiv lub nroog Yeluxalees ib yaam le tug noog yaa sau nwg lub zeg tsomkwm nwg cov mivnyuas ntaag.”

⁶Vaajtswv has tas, “Tsaav tuabneeg Yixalayees, mej ua txhum rua kuv hab tawmtsaam kuv lawm. Tabsis nwgnuav, mej ca le rov lug cuag kuv!

⁷Nub ntawd mej txhua tug yuav muab tej mlom nyaj mlom kub kws mej nchuav ntawd, sau huv tuabsi coj moog povtseg.

⁸Cov Axilias yuav raug puamtsuaj taag rua huv tshaav rog, tabsis tsi yog tuabneeg lub fwjchim ua. Cov Axilias yuav tsiv tawm huv tshaav rog, hab puab cov tub hluas yuav raug nteg moog ua luas qhev.

⁹Puab tug fuabtais ntshai heev hab tsiv tshee nyo lawm, hab cov numtswv los ntshai kawg nkaus le, puab yuav muab puab tej chij ua rog tso povtseg huv tuabsi.” Tug TSWV kws muaj lub chaw pehawm nyob sau lub Roob Xi-oos, hab nwg lub cubtawg kws hlawv khoom fij nyob huv lub nroog Yeluxalees yog tug has ntaag.