Read Hmong Njua Yaxayas 32 Bible Online

Yaxayas 32 - Hmong Njua bible

Yaxayas 32

¹Mej saib, yuav muaj ib tug vaajntxwv kaav ncaaj nceeg, hab nwg cov numtswv los yuav tswjfwm lawv le txujkev ncaaj nceeg.

²Cov numtswv ntawd txhua tug yuav zoo ib yaam le lub tsev kws thaiv cua hab lub chaw nkaum cua dlaaj cua dlub. Puab yuav zoo ib yaam le tej dlej kws ndlwg huv taj suabpuam, hab zoo ib yaam le lub tsua kws ntxoov lub taj mojsaab qhua.

³Cov tuabneeg kws qhovmuag pum kev yuav pum moog le, hab cov tuabneeg kws qhovntsej nov lug yuav nov moog le.

⁴Cov tuabneeg kws ua dlog ua dlig yuav txawj ntse hab paub qaabhau, hab cov tuabneeg kws nplaig txhaav yuav has tau lug meej.

⁵Yuav tsi muaj leejtwg xaav has tas, tuabneeg ruag yog tuabneeg tsimtxaj lossis has tas tug tuabneeg sab nkhaus yog tuabneeg ncaaj nceeg.

⁶Tug tuabneeg ruag yeej has tej zaaj ruag hab nwg lub sab yeej xaav ntsoov ua tej yaam phem; nwg ua tsi ncaaj, has lug saib tsi taug tug TSWV, nwg tsi pub mov rua cov tuabneeg tshaib plaab noj, hab nwg tsi pub dlej rua cov tuabneeg nqhes dlej haus.

⁷Tug tuabneeg sab nkhaus yeej muaj lub sab phem hab nwg ua kev phem nkaus xwb; nwg dlaag noj dlaag haus hab tuavhuv txuv cov tuabneeg pluag lub neej hab yuam cov tuabneeg txomnyem txuj cai.

⁸Tabsis tug tuabneeg tsimtxaj ua qhov ncaaj hab tuav rawv txuj cai xwb.

⁹Cov quaspuj kws ua neej nyob qhuas ntxhas tsi txob tsi txhawj dlaabtsi, mej ca le noog tej lug kws kuv has!

¹⁰Nwgnuav mej noj nyob tsau npo, tabsis lwm xyoo txug lub caij nuav mej yuav txomnyem ntsuav, vim yuav tsi muaj txiv maab rua mej dle lawm.

¹¹Cov quaspuj kws ua neej nyob qhuas ntxhas tsi txob tsi txhawj dlaabtsi; nwgnuav mej ca le ntshai ua ib ce tshee nyo; ca le hle mej tej tsoog tsho povtseg hab muab ntaub tsaaj lug npua.

¹²Ca le ntaus mej hauvsab hab tu sab, vim mej tej teb kws zoo qoobloo, hab tej vaaj txiv maab kws txi txiv ncw tub puamtsuaj taag,

¹³nroj tsuag hab maab xuavpaug tub tuaj laum kuv tsaav tuabneeg tej aav lawm; txhua lub tsev kws tuabneeg nyob kaaj sab lug, hab tej nroog kws muaj tuabneeg nyob lomzem xauv npo ca le quaj!

¹⁴Txawm yog tug vaajntxwv lub loog los yuav muab tso povtseg hab lub tuamceeb nroog los yuav ua suabpuam taag. Tej tsev hab tej chaw faajxwm yuav raug puamtsuaj moog ibtxhis. Yuav ua qhov chaw rua tej neeg luav qus tau kev zoo sab hab ua tshaav zaub rua yaaj noj.

¹⁵Tabsis tug TSWV yuav khaiv nwg tug ntsujplig lug rua peb dlua ib zag ntxiv. Lub tebchaws kws ua quavpoj yuav rov ua lub tebchaws kws aav zoo, hab tej teb yuav zoo qoob heev.

¹⁶Yuav muaj kev ncaaj nceeg nyob huv taj suabpuam, hab kev ua zoo nyob huv tej teb kws muaj qoobloo nplua mag.

¹⁷Thaus ntawd txhua tug yuav ua ncaaj ua nceeg, yuav muaj kev thaajyeeb hab nyob kaaj sab lug moog ibtxhis.

¹⁸Kuv tsaav tuabneeg yuav nyob tso sab lug ntawm qhov chaw kws muaj kev thaajyeeb huv lub tsev kws nyob kaaj sab lug hab tsi muaj kev ntxhuv sab dlaabtsi.

¹⁹(Txawm yog lawg yuav lug ntaus tej haav zoov, hab lub nroog yuav raug muab tsoo kuas puamtsuaj taag)

²⁰los mej txhua tug ca le zoo sab, vim muaj dlej txaus lug ywg tej noob qoob kws mej tseb, hab muaj tshaav zaub txhua qhov rua mej tej neeg luav hab tej nyuj noj.