Read Hmong Njua Yaxayas 33 Bible Online

Yaxayas 33 - Hmong Njua bible

Yaxayas 33

¹Thov kuas peb cov yeebncuab raug kev puamtsuaj! Txawm yog tsi muaj leejtwg fuab hab ntxeev sab rua puab los puab moog fuab hab ntxeev sab rua luas. Tabsis thaus kawg puab yuav raug luas fuab hab ntxeev sab rua puab.

²Tug TSWV, thov koj taabncuab peb. Peb ca sab ntsoov rua koj xwb. Thov tsomkwm peb ib nub dlhau ib nub hab cawm peb thaus peb raug kev ntxhuv sab.

³Thaus koj tuaj peb tog tua peb cov yeebncuab, mas puab tawg tsiv ri sua.

⁴Tej khoom kws mej fuab tau lug yuav raug luas muab sau moog tso ua ke ib yaam le nteg tej kooj txomfaav.

⁵Tug TSWV yog tug kws muaj Fwjchim Luj kawg nkaus, nwg kaav txhua tsaav yaam. Nwg yuav ua rua lub nroog Yeluxalees muaj txujkev ncaaj nceeg hab kev tseeb.

⁶Hab nwg ua rua tsaav tuabneeg nyob ruaj khov. Nwg tsomkwm nwg tsaav tuabneeg txhua lub sijhawm, nwg pub puab muaj tswvyim, kev txawj ntse hab kev cawm dlim. Qhov kws puab fwm tug TSWV yog kev vaammeej hab kev npluanuj rua puab.

⁷Cov tuabneeg sab tawv taabtom tsaa suab hu kuas luas paab. Cov numtswv kws nrhav kev sis humxeeb, puab quaj tu sab nrho.

⁸Tej nam kev luj nphob xuav tseg, hab tsi muaj leejtwg tau luag taug. Puab tsi ua lawv le tej lug cog tseg, hab puab tsi ua lawv le tej lug kws ua timkhawv, hab puab ib leeg yuav tsi fwm ib leeg le lawm.

⁹Lub tebchaws quaj ntsuag hab tsaug muas heev; tej ntoo peg Roob Lenpanoos ntsws hab qhuav taag. Lub Haav Saloos kws zoo qoobloo ua suabpuam taag. Tej ntoo huv tebchaws Npasaas hab sau Roob Kalemees tuag hab zeeg nplooj taag huv tuabsi lawm.

¹⁰Tug TSWV has rua txhua tsaav tuabneeg tas, “Nwgnuav kuv yuav ua ib yaam num qha rua suavdlawg pum has tas kuv muaj Fwjchim Luj npaum le caag.

¹¹Mej npaaj sab ua tej kws tsi muaj nqes hab txhua yaam kws mej ua tsi muaj qaabhau dlaabtsi. Mej cov paa zoo ib yaam le cub suavtawg kws yuav kub kuas mej puamtsuaj moog.

¹²Mej yuav tawg ntsoog ntxawg le tej pobzeb kws muab hlawv ua moov sib, ib yaam le tej haav xuavpaug kws muab hlawv ua tshauv taag lawm.

¹³Kuas mej cov kws nyob dleb hab nyob ze tau nov tej kws kuv ua taag lug nuav, hab leeg paub kuv lub fwjchim kws luj kawg nkaus.”

¹⁴Cov tuabneeg txhum huv Xi-oos ntshai tshee nyo. Puab has tas, “Vaajtswv txujkev txav txim zoo le cubtawg kws kub moog ibtxhis. Peb puas yuav tsiv dlim lub cubtawg ntawd?”

¹⁵Yog mej has lug tseeb hab taug txujkev ncaaj nceeg xwb, mej yeej yuav dlim. Mej tsi xob muab mej lub fwjchim moog dlaag ntxag cov pluag hab tsi xob yuav tej nyaj kws luas nqaa tuaj xab mej. Tsi xob koom nrug cov tuabneeg tuav tswvyim tua tuabneeg lossis ua kev phem kev qas.

¹⁶Ces mej yuav tau zoo nyob kaaj sab lug; mej yuav tau nyob ntawm lub chaw kws ruaj khov ib yaam le lub chaw faajxwm. Mej yuav tau mov noj hab tau dlej haus tsau npo.

¹⁷Muaj ib nub mej yuav pum ib tug vaajntxwv kws muaj fwjchim ci ntsaa ab, nwg yuav kaav lub tebchaws kws luj hab dlaav heev.

¹⁸Qhov kws mej ibtxwm ntshai lwm tsaav tuabneeg cov numtswv, cov sau se, hab cov tuabneeg tshuajxwm thaus u los tsuas zoo le mej ua npau suav lawm xwb.

¹⁹Mej yuav tsi pum lwm tsaav tuabneeg kws has lug khaavtheeb hab has tej lug txawv kws mej tsi paub ntxiv le lawm.

²⁰Ca le tsaa qhovmuag saib lub nroog Xi-oos kws yog qhov chaw peb ua kevcai fwm Vaajtswv. Ca le tsaa qhovmuag saib lub nroog Yeluxalees kws yog qhov chaw suavdlawg yuav nyob kaaj sab lug! Hab nwg yuav zoo le lub tsevntaub kws luas tsi tshem, tej tswg los tsi rhu hab tej hlua khi los yeej tsi tu le.

²¹Tug TSWV yuav ua rua peb pum nwg tug tshwjchim ci ntsaa ab. Peb yuav nyob huv tej taj nraag kws dlaav lawv tej ntug dlej luj hab tej dlej miv, yeebncuab yuav tsi tsaav nkoj moog lug huv tej dlej ntawd le lawm.

²²Vim tug TSWV yog tug kws txav txim, tug TSWV yog tug kws kaav peb, hab tug TSWV yog peb tug vaajntxwv; nwg yuav cawm kuas peb dlim.

²³Mej cov hlua tub xoob taag, txhaj khi tug ncej tsi ruaj lawm, dlaim ntaub txhaj le nthuav. Ces peb txhaj le txeeb tau tej khoom ntau heev coj lug sis faib; txawm yog tej tuabneeg saav ceg los puavleej tau huv tuabsi.

²⁴Cov tuabneeg kws nyob huv peb lub tebchaws yuav tsi muaj leejtwg nroo has tas, “Kuv muaj mob;” hab tug TSWV yuav zaam puab lub txim huv tuabsi.