Read Hmong Njua Yaxayas 34 Bible Online

Yaxayas 34 - Hmong Njua bible

Yaxayas 34

¹Txhua tsaav tuabneeg, ca le txaav lug kuas ze! Sis sau lug nyob ua ke hab tig qhovntsej noog. Taagnrho lub qaab ntuj hab txhua tug kws nyob huv lub nplajteb ca le lug ntawm nuav hab tig qhovntsej noog.

²Vim tug TSWV chim heev rua txhua tsaav tuabneeg hab puab cov yeebncuab. Nwg txhaj rau txim nyaav rua puab hab muab puab cob rua luas tua kuas taag huv tuabsi.

³Tsi muaj tuabneeg muab puab log, tabsis yuav tso puab tsw lwj ntxag rua qhov ntawd; hab ntshaav yuav ndlwg lab ploog sau tej roob.

⁴Lub nub, lub hli, hab tej nubqub yuav poob taagnrho lug rua huv nplajteb. Lub ntuj yuav pluj moog ib yaam le thooj ntawv kws muab dlov ca, hab tej nubqub yuav poob ib yaam le tej nplooj txiv maab lossis tej nplooj txiv ncuav pas.

⁵Tug TSWV tub npaaj nwg raab ntaaj tseg rua sau ntuj lawm, nwgnuav nwg yuav lug tawmtsaam cov Edoos kws yog cov nwg tub teem txim tuag rua lawm.

⁶Nwg raab ntaaj yuav lu puab tej ntshaav hab tej roj, ib yaam le tej roj hab tej ntshaav yaaj ntshaav tshis kws muab ua khoom fij. Tug TSWV yuav muab tej khoom fij nuav coj moog fij rua huv lub nroog Npauxelas; nwg yuav tua kuas tuabneeg tuag coob heev rua huv tebchaws Edoos.

⁷Tej txiv nyuj qus yuav qaug pawg lug nrug puab, hab tej ntsuag nyuj los qaug nrug cov txiv nyuj kws cejdlaab ntug ntoob. Puab lub tebchaws yuav caam ntshaav lab ploog hab puab tej aav muaj roj meem quas mag.

⁸Vim tug TSWV muab ib nub lug ua pauj, hab muab ib xyoos lug rau txim rua tej kws lub nroog Xi-oos ua taag lug lawm.

⁹Tej dlej huv tebchaws Edoos yuav hloov ua kua roj maab, hab aav yuav hloov ua leejfaaj. Taagnrho lub tebchaws yuav kub nyab ib yaam le roj maab.

¹⁰Lub tebchaws yuav kub nyab taag nub taag mo hab tej paa yuav nchu moog ibtxhis. Lub tebchaws ntawd yuav raug muab tso povtseg nyob qhuav nkuag ca ib tam dlhau ib tam, hab tsi muaj leejtwg yuav kaam taug kev moog hlaa lub tebchaws ntawd le.

¹¹Plaas hab uab laag yuav lug ua zeg nyob huv lub tebchaws ntawd. Tug TSWV yuav rov muab lub tebchaws ntawd tso povtseg dlua ib zag ntxiv kuas nyob qhuav nkuag ib yaam le thaus tsi tau tsim nwg.

¹²Yuav tsi muaj vaajntxwv kaav lub tebchaws ntawd lawm, hab puab tej thawjcoj los tsi paub qaabhau dlaabtsi.

¹³Maab xuavpaug hab ntoo xuavpaug yuav tuaj laum nkaus huv tej loog hab thoob plawg tej ntsaa loog, maa hab plaas yuav lug nyob huv tej nroog ntawd.

¹⁴Tsaj qus yuav nyooj zum zawg qhov ntawd tuaj, hab tej dlaab yuav sis hu ib tug dlhau ib tug. Tug dlaab mo ntuj yuav lug nrhav chaw su qhov ntawd.

¹⁵Plaas yuav lug ua zeg, nteg qai, puag qai hab tu puab tej mivnyuas. Dlaav npoj yuav sis sau lug nyob qhov ntawd.

¹⁶Nrhav tug TSWV thooj ntawv hab muab nyeem saib has le caag: Tej tsaj ntawd tsi muaj ib tug pluj le, hab tsi muaj ib tug kws yuav tsi muaj nkawm le. Vim tug TSWV tau has kuas muaj le ntawd, hab nwg tug ntsujplig yuav coj puab lug ua ke.

¹⁷Tug TSWV yuav muab lub tebchaws faib rua puab kuas nyag muaj nyag tug. Puab yuav nyob huv lub tebchaws ntawd ib tam dlhau ib tam, hab lub tebchaws yuav yog puab tug moog ibtxhis.