Read Hmong Njua Yaxayas 35 Bible Online

Yaxayas 35 - Hmong Njua bible

Yaxayas 35

¹Taj suabpuam hab lub tebchaws kws qhuav nkig nkuav yuav zoo sab heev hab yuav muaj paaj tawg ntsaa ab rua sau tej aav qhuav.

²Taj suabpuam yuav hu nkauj hab qw zoo sab; nwg yuav zoo nkauj ib yaam le tej Roob Lenpanoos, hab aav yuav rog ib yaam le tej teb sau lub Roob Kalemees hab Saloos. Txhua tug yuav pum tug TSWV lub koob meej hab lub fwjchim kws ci ntsaa ab.

³Ca le txhawb txhais teg kws tsaug leeg, hab lub hauvcaug kws tshee naa tsi muaj zug lawm.

⁴Has rua txhua tug kws tsi muaj kev ca sab has tas, “Cuab zug khov kho hab tsi xob ntshai! Vaajtswv yuav lug cawm kuas mej dlim, hab rau txim rua mej cov yeebncuab.”

⁵Tug tuabneeg dligmuag yuav pum kev, hab tug laag ntseg yuav nov lug.

⁶Cov tuabneeg saav ceg yuav sawv dlha cus plawg hab seev cev, hab cov tuabneeg has tsi tau lug yuav qw zoo sab. Dlej cag yuav ndlwg moog rua huv taj suabpuam;

⁷Tej xuabzeb kws kub heev yuav ua paag dlej, hab aav qhuav yuav txhawv dlej txhua qhov. Maa tej chaw nyob yuav tuaj nroj hab lojkov taag.

⁸Nyob qhov ntawd yuav muaj ib txuj nam kev hu ua “Txujkev Kws Dlawbhuv.” Tsi muaj tuabneeg txhum yuav taug txujkev ntawd le; hab cov tuabneeg ruag yuav tsi taug txujkev ntawd ib zag le.

⁹Yuav tsi muaj tsuv ntxhuav nyob qhov ntawd, tsi muaj tej tsaj nyaum taug txujkev ntawd. Cov tuabneeg kws tug TSWV tub txhwv lawm txhaj taug txujkev ntawd xwb.

¹⁰Puab yuav rov lug rua huv lub nroog Yeluxalees zoo sab hlo, hu nkauj hab qw ntshu nrooj zoo sab kawg. Puab yuav muaj kev zoo sab moog ibtxhis, kev quaj ntsuag hab kev tu sab yuav tsi muaj le lawm.