Read Hmong Njua Yaxayas 36 Bible Online

Yaxayas 36 - Hmong Njua bible

Yaxayas 36

¹Thaus Hexekiyas ua vaajntxwv kaav lub tebchaws Yudas tau kaum plaub xyoo lawm, Xenakhelis kws ua fuabtais kaav lub tebchaws Axilias, tau tuaj tua cov Yudas tej nroog kws txhim ntsaa loog ruaj khov hab txeeb tau tej nroog ntawd huv tuabsi lawm.

²Ces nwg tso Lasakes kws yog cov Axilias ib tug thawj tubrog huv lub nroog Lakhis nrug ib paab tubrog moog rua huv Yeluxalees, moog nug vaajntxwv Hexekiyas saib nwg puas zeem. Lasakes txhaj tuaj sawv ze rua ntawm txujkev kws cov tuabneeg nyob ntawm tug kwj dleg kws ndlwg peg lub paag dlej theem sau.

³Muaj peb tug tuabneeg Yudas kws yog Hilekiyas tug tub Eliyakees kws yog tug saib lub loog; Senpanas kws yog tug teev ntawv; hab Asas tug tub Yau-as kws yog tug ceev tej ntaub ntawv txhaj tawm moog cuag Lasakes.

⁴Ces cov Axilias tug thawj tubrog Lasakes has rua puab tas, fuabtais xaav paub saib vaajntxwv Hexekiyas ca sab rua dlaabtsi?

⁵“Koj has tas, koj muaj tswvyim zoo hab tubrog coob, tabsis tej lug kws koj has ntawd tsi muaj qaabhau. Koj ca sab rua leejtwg, koj txhaj ntxeev sab rua kuv?

⁶Koj ca sab rua cov Iziv tuaj paab koj, tabsis puab yuav zoo le muab tauj ab lug ua paas nreg, nwg yuav luv hab chob koj teg. Falaus kws ua vaajntxwv kaav cov Iziv yuav zoo le ntawd rua txhua tug kws ca sab rua nwg ntaag.”

⁷Cov Axilias tug thawj tubrog naam zog moog ntxiv hab has tas, “Puas yog mej has rua kuv tas, mej ca sab rua tug TSWV kws yog mej tug Vaajtswv? Puas yog Hexekiyas muab tej chaw teev dlaab sau roob sab hab tej thaaj rhuav puamtsuaj taag, nwg txhaj has kuas cov Yudas hab cov Yixalayees moog pehawm Vaajtswv rua ntawm tuab lub thaaj nkaus xwb los?

⁸Kuv yuav nrug mej sis coglug ntawm kuv tug tswv kws yog cov Axilias tug fuabtais lub npe: kuv yuav muab ob txheeb tug neeg rua mej, yog mej nrhav tau tuabneeg coob lug caij cov neeg ntawd.

⁹Mej tub tsi muaj peevxwm tawmtsaam tau kuv tug tswv ib tug nyuas tubrog kws miv tshaaj plawg nuav, ua caag mej laam moog ca sab rua cov Iziv tej tsheb neeg hab cov tubrog caij neeg ua dlaabtsi?

¹⁰Mej xaav has tas kuv tuaj tua mej lub tebchaws hab muab ua kuas puamtsuaj, tsi muaj tug TSWV paab kuv nua los? Tub yog Vaajtswv khaiv kuv tuaj tua hab rhuav kuas mej puamtsuaj ntaag.”

¹¹Ces Eliyakees, Senpanas hab Yau-as has rua Lasakes has tas, “Thov koj has lug Alamais rua koj cov tubkhai, peb txhaj totaub; tsi xob has lug Henplais rua peb, rua qhov taagnrho cov tuabneeg kws sawv sau tug ntsaa yeej puavleej noog koj has huv tuabsi.”

¹²Tabsis Lasakes has tas, “Mej xaav has tas kuv tug tswv tso kuv tuaj has cov lug nuav rua mej tug tswv hab mej xwb nuav los? Tsi yog le ntawd, kuv has rua cov tuabneeg kws nyob sau tug ntsaa yeej kws puab yuav rov noj puab cov quav hab haus puab cov zig, kuas nov ib yaam le mej hab.”

¹³Ces Lasakes txhaj sawv tseeg hab has ua lug Henplais nrov nrov has tas, “Ca le noog cov Axilias tug fuabtais tej lug kws has rua mej nuav!”

¹⁴Fuabtais has tas, “Tsi xob ca Hexekiyas ntxag tau mej, vim Hexekiyas yeej cawm tsi tau mej le.

¹⁵Hab tsi xob ca Hexekiyas coj mej moog ca sab rua tug TSWV kws pheej has tas, Tug TSWV yeej yuav cawm tau peb xwb; lub nroog nuav yuav tsi raug muab cob rua cov Axilias tug fuabtais teg ib zag le.

¹⁶Tsi xob noog Hexekiyas tej lug hlo le! Cov Axilias tug fuabtais has tas: Ca le ua phoojywg rua kuv hab tawm tuaj cuag kuv. Mej txhua tug txhaj yuav tau noj mej tej txiv maab, txiv ncuav pas, hab haus tej dlej huv mej tej qhov tshij

¹⁷moog txug thaus kws kuv tuaj coj mej moog nyob huv lub tebchaws kws zoo le mej lub tebchaws kws muaj txiv maab ntau ua cawv hab muaj nplej ntau ua ncuav.

¹⁸Tsi xob ca Hexekiyas dlaag mej has tas, tug TSWV yuav paab kuas mej dlim ntawm txujkev nyuaj sab. Luas lwm tsaav tuabneeg tej vaajtswv puas cawm tau kuas puab tej tebchaws dlim ntawm cov Axilias tug fuabtais txhais teg?

¹⁹Taamsim nuav Hamathas hab Alepas tej vaajtswv nyob qhov twg? Xefavais tej vaajtswv nyob qhov twg? Puab Puas paab tau cov Xamalis dlim ntawm kuv txhais teg?

²⁰Taagnrho cov vaajtswv huv tej tebchaws nuav, tug vaajtswv twg cawm tau nwg lub tebchaws dlim ntawm kuv txhais teg? Tug TSWV yuav ua le caag txhaj cawm tau lub nroog Yeluxalees kuas dlim ntawm kuv txhais teg?”

²¹Tabsis cov pejxeem nyob ntsag tu hab tsi has ib lu lug le, rua qhov Vaajntxwv Hexekiyas saamfwm has tas, “Tsi xob teb nwg hlo le.”

²²Ces Eliyakees kws yog Hilekiyas tug tub kws yog tug saib lub loog, Senpanas kws yog tug teev ntawv, hab Yau-as kws yog Axafes tug tub kws yog tug ceev ntaub ntawv, puab dlua rhe puab tej tsho hab dlha moog qha tej lug kws Lasakes has ntawd rua Vaajntxwv Hexekiyas noog.