Read Hmong Njua Yaxayas 37 Bible Online

Yaxayas 37 - Hmong Njua bible

Yaxayas 37

¹Thaus Vaajntxwv Hexekiyas nov le ntawd, nwg nyuaj sab heev, nwg txhaj dlua rhe nwg lub tsho hab muab ntaub tsaaj lug naav, hab dlha moog rua tom tug TSWV lub Tuamtsev.

²Nwg txhaj tso Eliyakees kws yog tug saib lub loog, Senpanas kws yog tug teev ntawv hab tug povthawj laug moog cuag Yaxayas kws yog tug cev Vaajtswv lug kws yog Amauxes tug tub. Puab puavleej naav ntaub tsaaj taag huv tuabsi.

³Puab has rua Yaxayas has tas, “Vaajntxwv Hexekiyas has le nuav: Nub nua yog nub kws tau kev nyuaj sab; peb taabtom raug luas rau txim hab txaajmuag heev. Peb zoo ib yaam le tug quaspuj kws txug caij yug mivnyuas, tabsis tsi muaj zug yug le.

⁴Cov Axilias tug fuabtais tau khaiv nwg tug thawj tubrog Lasakes tuaj has lug tuam mom Vaajtswv tug kws muaj sa nyob. Thov tug TSWV kws yog koj tug Vaajtswv nrug nov tej lug kws tuam mom nuav hab rau txim rua tug tuabneeg kws tau has tej lug ntawd. Yog le ntawd, koj ca le thov Vaajtswv paab peb cov pejxeem kws seem nyob nuav.”

⁵Thaus Yaxayas nov Vaajntxwv Hexekiyas tej lug lawm,

⁶Yaxayas has rua puab tas, “Ca le rov moog has rua vaajntxwv has tas, tug TSWV has le nuav: ‘Tsi xob ntshai cov Axilias tug fuabtais tej lug kws nwg tso nwg tug tubkhai tuaj has tuam mom kuv rua koj nov ntawd.

⁷Kuv yuav tso ib tug ntsujplig lug tshoov nwg sab kuas nwg nov ib cov lug xaiv, hab tig tsiv rov qaab moog rua peg nwg lub tebchaws; hab nwg yuav moog raug nav ntaaj tuag nyob huv lub tebchaws ntawd.’ ”

⁸Thaus Lasakes nov has tas, cov Axilias tug fuabtais tawm huv lub nroog Lakhis moog lawm, nwg txhaj thim rov qaab hab moog ntsib fuabtais taabtom tua lub nroog Linpenas nyaav heev.

⁹Muaj tuabneeg moog qha rua cov Axilias tug fuabtais nov has tas, “Cov Sudaas tug Vaajntxwv Tilehakas coj ib paab tubrog Iziv tuaj tua koj lawm.” Thaus nwg nov dlheev tej lug nuav, nwg txhaj xaa ib tsaab ntawv moog rua Vaajntxwv Hexekiyas

¹⁰kws kaav tebchaws Yudas has tas, “Tsi xob ca koj tug Vaajtswv kws koj ca sab rua ntxag tau koj has tas, nwg yuav tsi muab lub nroog Yeluxalees cob rua cov Axilias tug fuabtais txhais teg hlo le.

¹¹Koj puas tau nov tej kws cov Axilias tug fuabtais tau ua rua ntau lub tebchaws raug kev puamtsuaj taag lawm. Koj xaav tas, koj tseem yuav tsiv dlim hab nua los?

¹²Thaus u kuv cov yawmkoob tub muab lub nroog Nkauxaas, lub nroog Halaas hab lub nroog Lexefas tua puamtsuaj taag, hab muab cov tuabneeg Npethees kws nyob huv lub nroog Telaxas tua tuag taag huv tuabsi, hab puab tej vaajtswv tub cawm tsi tau puab dlim hlo le.

¹³Lub nroog Hamas, Alepas, Xefavais, Henas hab Ivas tej vaajntxwv nyob qhov twg lawm?”

¹⁴Vaajntxwv Hexekiyas txais tsaab ntawv ntawm cov tuabneeg xaa ntawv tuaj hab muab nthuav nyeem; Hexekiyas txhaj nqaa tsaab ntawv ntawd moog rua huv tug TSWV lub Tuamtsev, hab muab nthuav tso taabmeeg tug TSWV.

¹⁵Hexekiyas thov tug TSWV has tas,

¹⁶“Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, koj nyob rawv sau tug qhelunpees ob phob tis, koj tuab leeg xwb txhaj yog tug Vaajtswv kws kaav txhua lub tebchaws huv nplajteb nuav. Koj yog tug kws tsim lub nplajteb hab lub ntuj.

¹⁷Tug TSWV, thov tig qhovntsej noog; tug TSWV, thov tsaa qhovmuag saib; thov noog Xenakhelis tej lug kws nwg xaa tuaj has tuam mom koj kws yog Vaajtswv tug muaj sa nyob.

¹⁸Tug TSWV, peb paub has tas, cov Axilias tug fuabtais tau muab ntau tsaav tuabneeg tua puamtsuaj taag hab ua rua puab tej tebchaws nyob dlo dlus ca,

¹⁹hab muab puab tej vaajtswv kws tsi yog Vaajtswv tag, hlawv puamtsuaj taag, tej ntawd tsi yog Vaajtswv, tabsis yog tuabneeg txhais teg muab ntoo hab muab pobzeb lug txua ua xwb.

²⁰Tug TSWV kws yog peb tug Vaajtswv, thov paab kuas peb dlim ntawm cov Axilias txhais teg, txhaj ua rua txhua tsaav tuabneeg kws nyob huv nplajteb nuav paub has tas, koj tuab leeg xwb txhaj yog Vaajtswv.”

²¹Ces Amauxes tug tub Yaxayas khaiv tuabneeg moog has rua Vaajntxwv Hexekiyas has tas, tug TSWV kws yog cov Yixalayees tug Vaajtswv has le nuav: “Vim koj tau thov kuv has txug Xenakhelis kws yog cov Axilias tug fuabtais,

²²cov lug nuav yog tug TSWV has rua Xenakhelis: Xi-oos tug ntxhais yuav luag koj plig hab yuav thuam koj; Yeluxalees tug ntxhais yuav cu hau tom koj qaab.

²³Tug kws koj thuam hab saib tsi taug yog leejtwg? Koj tau qheb koj lub qhovncauj hab tsaa koj lub qhovmuag tawmtsaam leejtwg? Tub yog koj tawmtsaam cov Yixalayees tug Vaajtswv kws dlawbhuv ntaag los sav!

²⁴Koj tau tso koj tug tubkhai tuaj tuam mom tug TSWV, koj has tas, ‘Kuv muaj tsheb neeg ntau heev, kuv yuav coj tuaj nce rua sau tej roob sab kws yog tej roob sab tshaaj plawg peg Lenpanoos, kuv moog txav tej ntoo thuv kws sab tshaaj plawg, hab tej ntoo cab kws zoo tshaaj plawg sau roob, hab moog rua huv lub plawv zoov kws muaj ntoo sab heev.

²⁵Koj khaav has tas, koj tau khawb ntau lub qhov tshij, hab haus tej dlej kws nyob huv luas lwm tsaav tuabneeg tej tebchaws, hab kuv yuav tsuj tej dlej nraag tebchaws Iziv kuas nqhuab huv tuabsi.’

²⁶“Koj tsi tau nov has tas, kuv tub npaaj sab lug tau ntev lawm nua los? Tej kws thaus u kuv npaaj tseg lawm, nwgnuav kuv muab rhu tawm lug. Kuv tub pub fwjchim rua koj muab cov nroog kws ruaj khov tsoo tawg taag huv tuabsi lawm.

²⁷Cov tuabneeg kws nyob huv tej nroog ntawd tsi muaj fwjchim dlaabtsi le; puab ntshai hab yoob taag. Puab zoo ib yaam le tej nroj kws tuaj huv tej teb lossis tej nroj kws tuaj sau ruv tsev, thaus cov cua kub kws ntsawj saab nubtuaj tuaj, puab ca le ntsws taag huv tuabsi lawm.

²⁸“Tabsis kuv paub thaus koj nyob quastsawg, thaus koj tawm moog, hab thaus koj rov qaab lug, hab kuv paub tej lug phem kws koj tshev kuv huv tuabsi.

²⁹Vim koj tau tshev kuv hab kuv tub nov koj tej lug khaavtheeb lawm, nwgnuav kuv yuav muab kuv tug nqailauj lug chaws koj qhovntswg hab kuv muab fwm xauv lug saam koj qhovncauj, hab kuv yuav muab koj tig xubndlag taug txuj qub kev kws koj tuaj rov qaab.”

³⁰Ces Yaxayas has rua Vaajntxwv Hexekiyas tas, “Ntawm nuav yog ib lub cim kws qha rua mej paub. Xyoo nuav hab lwm xyoo mej yuav tau noj tej nplej kws nwg tuaj nwg, tabsis xyoo peb mej yuav cog nplej hab sau qoobloo hab cog txiv maab hab yuav tau tej txiv maab ntawd noj.

³¹Cov tuabneeg kws seem nyob huv tebchaws Yudas yuav vaammeej ib yaam le tej txiv ntoo kws nrhau caag ntsa aav tub tub hab txi txiv ncw heev.

³²Tsuas tshuav cov tuabneeg kws nyob huv lub nroog Yeluxalees hab sau lub Roob Xi-oos txhaj seem xwb, rua qhov tug TSWV kws muaj Fwjchim Luj kawg nkaus npaaj sab kuas muaj tej xwmtxheej nuav lawm.

³³“Cov lug nuav, yog tug TSWV has rua cov Axilias tug fuabtais: ‘Nwg yuav tsi tau tuaj rua huv lub nroog nuav hab tsi tau tua ib xibxub vug rua huv lub nroog nuav le. Tsi muaj tubrog yuav nqaa tej thaiv nav ntaaj tuaj ze lub nroog nuav lossis tuaj puab ntswg vij lub nroog nuav le.

³⁴Nwg taug txujkev twg tuaj, nwg yuav taug txujkev ntawd rov qaab moog tsev, hab nwg yuav tsi tau nkaag lug rua huv lub nroog nuav hlo le. Kuv kws yog tug TSWV, kuv yog tug has tej lug nuav ntaag.

³⁵Kuv yuav tiv thaiv hab tsomkwm lub nroog nuav, vim kuv tej lug cog tseg lawm, hab vim tej lug kws kuv tau cog tseg rua kuv tug tubkhai Daviv lawm?’ ”

³⁶Tug TSWV tug timtswv txhaj lug rua huv cov Axilias lub yeej hab tua ib puas yim caum tsib txheeb leej tubrog tuag taag. Taagkig kaaj ntug txoog kws taav lub caij tuabneeg sawv, puab txawm pum tuabneeg tuag pawg lug.

³⁷Cov Axilias tug fuabtais Xenakhelis txhaj rov qaab moog tsev hab moog nyob huv lub nroog Nineves.

³⁸Muaj ib nub, thaus nwg taabtom moog pe nwg tug mlom Nixelaus huv tsev teev mlom, ces Alamelej hab Salexes kws yog nwg ob tug tub, nqaa obtug ob raab ntaaj moog muab nwg tua tuag rua huv lub tsev teev mlom ntawd, hab obtug tsiv moog nyob rua tim tebchaws Alalaj lawm. Ces Esahadoos kws yog dlua nwg ib tug tub txhaj ua fuabtais hloov nwg chaw.