Read Hmong Njua Yaxayas 38 Bible Online

Yaxayas 38 - Hmong Njua bible

Yaxayas 38

¹Thaus ntawd Vaajntxwv Hexekiyas mob nyaav heev hab nwg yuav zoo tsi taug. Amauxes tug tub Yaxayas kws yog tug cev Vaajtswv lug tau moog saib Hexekiyas hab has tas, “Vaajtswv has tas koj yuavtsum npaaj txhua yaam kuas txhij txhua tseg rua koj tsev tuabneeg, rua qhov koj yeej yuav tsi zoo, koj yuav tuag xwb.”

²Hexekiyas txawm tig hlo rua tim phaab ntsaa hab thov tug TSWV has tas,

³“Tug TSWV, thov koj ncu ntsoov has tas, kuv ua koj teg num ntawm lub sab ncaaj nceeg hab muab sab npuab koj, hab kuv rau sab ntso ua txhua yaam zoo kws koj xaav kuas kuv ua.” Hab nwg quaj tu sab kawg le.

⁴Tug TSWV rov has rua Yaxayas has tas,

⁵“Koj ca le rov moog cuag Hexekiyas hab has rua nwg tas, ‘Kuv yog tug TSWV kws yog koj yawmkoob Daviv tug Vaajtswv, kuv tub nov koj tej lug thov hab pum koj tej kua muag lawm; kuv yuav ntxiv noobnyoog rua koj ua neej nyob kaum tsib xyoos ntxiv.

⁶Kuv cawm koj hab lub nroog Yeluxalees kuas dlim ntawm cov Axilias tug fuabtais txhais teg, hab kuv tseem yuav tiv thaiv lub nroog nuav moog.’

⁷“Yaxayas has tas, ‘Tug TSWV yuav muab ib yaam lug ua lub cim qha rua koj has tas nwg yuav ua lawv le nwg tej lug cog tseg lawm.

⁸Tug TSWV yuav muab tug dluab nub thim rov qaab kaum theem qeb ntai kws Vaajntxwv Ahaj ua.’ ” Ces tug dluab nub txawm thim rov qaab kaum theem qeb ntai.

⁹Tom qaab kws Hexekiyas tug mob zoo lawm, nwg sau zaaj nkauj nuav hu ua Vaajtswv tsaug:

¹⁰Kuv has tas kuv txujsa kws tseemceeb tshaaj plawg yuav moog rua ntawm lub roojvaag kws yog txujkev tuag; kuv yuav tsi muaj sa nyob ib zag ntxiv le lawm.

¹¹Kuv has tas, kuv yuav tsi pum tug TSWV huv cov tuabneeg kws muaj sa nyob lub tebchaws; kuv lub qhovmuag yuav tsi pum cov tuabneeg kws muaj sa huv lub nplajteb nuav ib zag le lawm.

¹²Kuv txujsa tub raug muab txav tu hab tub kawg lawm, ib yaam le lub tsevntaub kws muab rhuav taag lawm, zoo le tej ntaub kws muab txab txav tu lug. Kuv xaav has tas Vaajtswv tub rhu kuv txujsa lawm.

¹³Kuv quaj ib mos kaaj ntug rua kuv tug mob. Vaajtswv muab kuv tej pobtxhaa luv taag ib yaam le tsuv ntxhuav cua, kuv xaav has tas, Vaajtswv yuav rhu kuv txujsa moog.

¹⁴Kuv ntsaaj mog nyoos ib yaam le tug luv lossis tug noog dlej quaj, hab kuv tsaa hlo suab quaj ib yaam le tug nquab. Kuv qheb tsi taug kuv ob lub qhovmuag saib sau ntuj. Tug TSWV, kuv ntxhuv sab heev, thov paab kuv!

¹⁵Kuv yuav has le caag? Tug TSWV tub has rua kuv, hab nwg tub ua lawv le nwg has lawm. Kuv nyuaj sab heev hab pw tsi tsaug zug le.

¹⁶Tug TSWV, qhov kws tuabneeg muaj txujsa nyob tub yog vim muaj koj tuab leeg xwb, hab qhov kws kuv muaj txujsa nyob, tub yog koj cawm. Thov paab khu kuv tug mob kuas zoo hab pub kuv rov muaj txujsa.

¹⁷Kuv tej kev nyuaj sab yuav hloov moog ua kev kaaj sab lug. Koj cawm kuv txujsa dlim ntawm lub qhov kws yog txujkev puamtsuaj lug; koj zaam taagnrho kuv tej kev txhum.

¹⁸Tsi muaj ib tug nyob huv tubtuag teb yuav txawj ua koj tsaug; cov tuag lawm yeej tsi txawj ca sab rua koj txujkev ncaaj nceeg le.

¹⁹Tsuas yog tug kws muaj sa nyob txhaj txawj ua koj tsaug ib yaam le nub nua kuv ua xwb. Tej lug kws leej txiv qha cov mivnyuas yog tej kws has tas, koj yog tug ncaaj nceeg tag.

²⁰Tug TSWV, koj tau khu kuv tug mob zoo lawm. Peb yuav ntaus nkauj nogncaas hab hu nkauj ua koj tsaug, peb yuav ua koj tsaug huv koj lub Tuamtsev moog taag simneej.

²¹Ces Yaxayas has tas, “Mej ca le muab txiv ncuav pas lug tsoo qhwv vaajntxwv lub rwj, nwg txhaj yuav zoo.”

²²Vaajntxwv Hexekiyas nug has tas, “Yaam dlaabtsi ua lub cim qha rua kuv paub has tas, kuv yuav tau moog rua huv tug TSWV lub Tuamtsev.”